قاڭتار ايىندا سىرداريا وزەنى ارقىلى شاردارا سۋ قويماسىنا 2,6 ملرد تەكشە مەتر سۋ كەلدى. بۇل باستاپقى بولجامنان 100 ملن تەكشە مەترگە ارتىق.

سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ تۇركىستان وبلىسىنىڭ تۇرعىندارىمەن كەزدەسىپ، وڭىردەگى ءىرى سۋ شارۋاشىلىعى نىساندارىن ارالادى. نۇرجان نۇرجىگىتوۆ ماقتاارال اۋدانىنىڭ مىرزاكەنت كەنتىندە وبلىس تۇرعىندارىمەن كەزدەسۋ وتكىزدى. مينيستر ايماقتى قاجەت سۋ كولەمىمەن تولىق قامتاماسىز ەتۋ بويىنشا اتقارىلعان جۇمىستار تۋرالى باياندادى.

«بىلتىر ءبىز كورشى ەلدەرمەن بەلسەندى كەلىسسوز جۇرگىزدىك، وسىنىڭ ناتيجەسىندە ەلىمىزدىڭ وڭتۇستىگىندەگى شارۋالاردى سۋارمالى سۋمەن تولىق قامتاماسىز ەتتىك. ءبىز «قازسۋشار» مەكەمەسىنىڭ جەرگىلىكتى ديحاندارمەن جاساعان كەلىسىمشارتتارىنىڭ قانشالىقتى ورىندالعانىن مۇقيات تەكسەرەمىز. اتاپ ايتقاندا، كەلىسىمشارتسىز سۋ بەرۋ ارقىلى زاڭ بۇزۋشىلىق فاكتىلەرى بار-جوعىن انىقتايمىز. وسىعان دەيىن وبلىسقا مينيسترلىكتىڭ ىشكى اۋديت دەپارتامەنتىنىڭ وكىلدەرى كەلگەن بولاتىن. دۇيسەنبىدەن باستاپ ءبىزدىڭ مامانداردان جاساقتالعان تاعى ءبىر جۇمىس توبى تەكسەرىس باستايدى»، - دەدى سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ.

تۇركىستان وبلىسىنىڭ تۇرعىندارى مينيسترگە يرريگاتسيا جانە درەناج جۇيەلەرىن رەكونسترۋكتسيالاۋ، جەكەلەگەن گيدروتەحنيكالىق قۇرىلىستاردىڭ جاي-كۇيى، سۋارمالى سۋدى ءبولۋ، سۋ بەرۋ جونىندەگى كەلىسىمشارت جاساۋ، جاڭا سۋ قويمالارىن سالۋ، بىلىكتى مامانداردى دايارلاۋ جانە شارۋالارعا سۋبسيديا بەرۋ جونىندە سۇراقتارىن قويدى.

ازاماتتارمەن كەزدەسۋدەن كەيىن نۇرجان نۇرجىگىتوۆ شاردارا سۋ قويماسىنىڭ جاي-كۇيى مەن 2023 جىلى رەكونسترۋكتسيادان وتكەن بوگەتىنىڭ جۇمىسىن تەكسەردى.

Abai.kz