بىلتىر جول-كولىك وقيعالارى الدىڭعى جىلمەن سالىستىرعاندا ەكى ەسەگە جۋىق كوبەيىپ كەتكەن. سونىمەن قاتار، جاراقات العان بالالار سانى 4 مىڭنان 10 مىڭعا دەيىن ءوستى. بۇل دەرەكتەردى سەناتور مارات قوجاەۆ ءوز دەپۋتاتتىق ساۋالىندا جاريا ەتتى.

«قۇقىق قورعاۋ ورگاندارىنىڭ مالىمەتىنشە، 2024 جىلدىڭ 12 ايىندا ەلىمىزدە 31 597 جول-كولىك وقيعاسى تىركەلگەن، ءوسىم 99 پايىزعا جۋىق بولدى. ەرەكشە الاڭداتاتىن جايت، زارداپ شەككەن بالالار سانى ارتقان، ياعني جارالانعاندار 133,7 پايىزعا جانە مەرت بولعاندار سانى 3,5 پايىزعا ءوستى»، - دەدى م. قوجاەۆ ۇكىمەت باسشىسىنىڭ اتىنا جولداعان ساۋالىندا.

دەپۋتاتتىڭ ايتۋىنشا، جول اپاتتارىنىڭ جيىلەۋىنىڭ نەگىزگى سەبەپتەرىنىڭ ءبىرى – جۇرگىزۋشىلەردى دايىنداۋ دەڭگەيىنىڭ تومەندىگى. جول-كولىك وقيعالارىنىڭ 96 پايىزى جول قوزعالىسى ەرەجەلەرىن بۇزۋدان تۋىندايدى. كوپتەگەن جۇرگىزۋشىلەر مەكتەبىنىڭ تۇلەكتەرى ساپالى ءبىلىم المايدى، ال كەيبىر جۇرگىزۋشى كۋالىگىن زاڭسىز جولمەن يەمدەنەدى. تاكسي قىزمەتىندە ەلەۋلى كەمشىلىكتەر بايقالىپ وتىر. تاكسي جۇرگىزۋشىلەرى دەمالىسسىز جۇمىس ىستەيدى جانە مىندەتتى مەديتسينالىق تەكسەرۋدەن وتپەيدى، بۇل اۋىر زارداپتارعا اكەلەدى.

ونىڭ پايىمىنشا، جۇرگىزۋشىلەردى دايارلاۋ جانە اتتەستاتتاۋ جۇيەسىن جەتىلدىرۋ شارالارىن قابىلداۋ قاجەت. بۇل ءۇشىن جۇرگىزۋشىلەردى وقىتاتىن ۇيىمدارعا مەملەكەتتىك باقىلاۋ ەنگىزۋ، ەمتيحان تاپسىرۋ جانە جۇرگىزۋشى كۋالىگىن الۋ ءتارتىبىن قايتا قاراۋ كەرەك.

«سونىمەن قاتار، اينالما جولداردىڭ قۇرىلىسىن جەدەلدەتۋ، ەلدى مەكەندەردە جارىقتاندىرۋ مەن جاياۋ جۇرگىنشىلەر وتكەلدەرىن قامتاماسىز ەتۋ، جول-كولىك وقيعالارىن ەسەپكە الۋدىڭ بىرىڭعاي تسيفرلىق جۇيەسىن ازىرلەۋ جانە زاماناۋي جول ستاندارتتارىن ەنگىزۋ ماڭىزدى. جولداعى قاۋىپسىزدىك پەن ءوزىن-ءوزى ۇستاۋ مادەنيەتىنە نازار اۋدارا وتىرىپ، اۆتومەكتەپتەردىڭ وقۋ باعدارلاماسىن جاڭارتۋ قاجەت. ەمتيحان تاپسىرۋ جانە جۇرگىزۋشى كۋالىگىن الۋ ءتارتىبىن قايتا قاراستىرۋ كەرەك»، – دەپ اتاپ ءوتتى سەناتور.

ەسكە سالساق، بيىل اقپان ايىندا مارات قوجاەۆ جول ەرەجەسىن ءجيى بۇزاتىندارعا ايىپپۇل تولەۋدە 50% جەڭىلدىكتى الىپ تاستاۋدى ۇسىنعان ەدى.

Abai.kz