كامەلەتكە تولماعان شەرزات بولاتتى ءولتىرۋ قىلمىسى بويىنشا الدىن الا سوت تىڭداۋى 10 ساۋىردە ساعات 12-دە جەتىسۋ وبلىسىنىڭ ورتالىعى تالدىقورعان قالاسىندا باستالادى. بۇل اقپاراتتى الماتى وبلىستىق سوتىنىڭ ءباسپاسوز قىزمەتىنىڭ حابارلاماسىنا سۇيەنىپ جەرگىلىكتى باسىلىمدار حابارلادى.

الدىن الا تىڭداۋ جەتىسۋ وبلىسىنىڭ قىلمىستىق ىستەر جونىندەگى اۋدانارالىق سوتىندا وتپەك. اقپاراتتا اشىق سوت وتىرىسى قازاق تىلىندە وتەدى دەپ جازىلعان. بۇل ءىس سوتقا 12 ناۋرىزدا تۇسكەن.

16 جاستاعى شەرزات بولات 2024 جىلعى 4 قازاندا ءوزىنىڭ وتباسى جالعا الىپ وتىرعان تالعارداعى دۇكەن ماڭىندا قازا بولعان. ساتىپ الۋشىلاردىڭ بىرىمەن بولعان داۋدىڭ اياعى جانجالعا ۇلاسىپ، ول دوستارىن شاقىرىپ، سۋىق قارۋ قولدانىلعان. سالدارىنان شەرزات مەرت بولىپ، ونىڭ نەمەرە اعاسى جارالانعان.

وسى وقيعادان ءبىر اپتا وتكەندە قارا جامىلعان وتباسىنىڭ ءۇيى تۇگى قالماي ورتەنىپ كەتكەن، ول ءتۇنى ۇيدە ەشكىم بولماعان، وتباسى مۇشەلەرى شەرزاتتىڭ اتاسىنىڭ ۇيىندە اس بەرۋگە دايىندالىپ جاتقان. پوليتسيا ءورت ادەيى قويىلعان دەپ حابارلاپ، اۋداندا كۇزەتتى كۇشەيتكەن. وعان دەيىن مارقۇمنىڭ تۋىستارى اكىمدىك الدىنا جينالىپ، تەرگەۋدى اشىق ءارى ءادىل جۇرگىزۋدى تالاپ ەتكەن. ناۋرىز ايىندا قازاقستاننىڭ باس پروكۋراتۋراسى شەرزات پولاتتىڭ ءۇيىن ورتەگەندەر ءالى تابىلماعانىن ايتتى.

دەرەككوزى: ازاتتىق راديوسى

Abai.kz