مۋلتفيلم – ناقتى ماقساتپەن جاسالۋى كەرەك!

بيىل ءبىزدىڭ كوميتەت قازاق تىلىندەگى مۋلتفيلمدەرگە رەسپۋبليكالىق بيۋدجەتتى قاراۋ كەزىندە 300 ملن تەڭگە بولىنۋىنە ۇسىنىس جاساپ، قول جەتكىزدى. بۇل — ماڭىزدى قادام. بىراق ەندىگى ماسەلە — ولاردىڭ مازمۇنى، ساپاسى جانە قولجەتىمدىلىگى.
سوندىقتان جاقىندا كوميتەتتىڭ كازمەدياورتالىعىنا جاساعان ارنايى ساپارى بارىسىندا دەپۋتاتتار انيماتسيا ءوندىرىسىنىڭ بارىسىمەن تانىسىپ، اۆتورلارمەن تىكەلەي پىكىر الماستى. ناقتى ۇسىنىستار مەن تالاپتار دا جەتكىزىلدى.
مۋلتفيلمدەر نە ءۇشىن ماڭىزدى؟
مۋلتفيلم — بالانىڭ العاشقى ۇستازى.
ول ارقىلى بالا:
- ءتىلدى ۇيرەنەدى،
- دۇنيەتانىمىن قالىپتاستىرادى،
- قۇندىلىقتاردى بويىنا سىڭىرەدى.
سوندىقتان مۋلتفيلمدەردى جاي عانا كوڭىل كوتەرۋ قۇرالى ەمەس، تاربيە مەن تانىم نەگىزى دەپ قابىلدايمىز.
Balapan — بالالار تىلىنە كوپىر بولعان ارنا
وسى جەردە ەرەكشە اتاپ وتكىم كەلەدى:
مەنىڭ ءوز بالالارىم — “بالاپان” ارناسىن كورىپ، ءتىلى شىقتى.
“بالاپاننىڭ” جاساعان مۋلتفيلمدەرى — ساپالى، كوركەم، تارتىمدى. “قازاقستان” رترك اق ۇلكەن جۇمىس جۇرگىزۋدە.
ەندى وسى تاجىريبەنى كەڭەيتىپ، قولداپ، ساپانى ودان ءارى ارتتىرۋىمىز قاجەت.
YouTube — بالالاردىڭ نەگىزگى الاڭى
بۇگىندە بالالاردىڭ كوبى تەلەۆيزور ەمەس، YouTube كورەدى. بىراق وندا قازاق تىلىندەگى قىزىقتى، زاماناۋي مۋلتفيلمدەر وتە از.
سوندىقتان:
- قازاق تىلىندەگى ساپالى، بالالارعا تارتىمدى مۋلتفيلمدەر YouTube-تا قولجەتىمدى بولۋى قاجەت;
- جاس ەرەكشەلىكتەرىنە ساي پلەيليستتەر مەن سەريالار قۇرىلۋى كەرەك.
مۋلتفيلمدەگى ءتىل — تابيعي بولۋى شارت
كەيبىر مۋلتفيلمدەردە كەيىپكەرلەر كانتسەلياريزممەن، جاساندى تىلمەن سويلەيدى. بۇل — بالانىڭ قۇلاعىنا تۇسىنىكسىز، قىزىقسىز، جات ەستىلەدى.
سوندىقتان:
- قاراپايىم، شىنايى، ءتىرى قازاق ءتىلى قولدانىلۋى ءتيىس;
- بالا تىڭداپ، ءوز تىلىمەن بايلانىس ورناتۋى كەرەك.
انيماتسيا سالاسىنداعى باسەكەلەستىك پەن اشىقتىق
قازاقستاندا وتە تالانتتى انيماتورلار مەن ستۋديالار بار. ولار حالىقارالىق بايقاۋلاردا دا جەتىستىككە جەتىپ ءجۇر. بىراق:
- بارلىق جوبالار اشىق كونكۋرس ارقىلى تاڭدالۋى ءتيىس;
- باعالاۋ ماماندار مەن قوعام وكىلدەرىنىڭ قاتىسۋىمەن جۇرگىزىلۋى كەرەك;
- جەڭىمپاز — تەك ساپالى ءونىم ۇسىنعان ادام بولۋى شارت.
كادر دايىنداۋ — وزەكتى ماسەلە
- جوو-لاردا مۋلتفيلم ماماندارىن دايىندايتىن وقۋ باعدارلامالارىن كەڭەيتۋدى،
- 2D جانە 3D فورماتتاعى انيماتسيانى وقىتۋدى ۇسىندىق.
مۋلتفيلم – ناقتى ماقساتپەن جاسالۋى كەرەك!
ءار مۋلتفيلم ناقتى ماسەلەنى شەشىپ، بالاعا ناقتى داعدى نەمەسە قۇندىلىق بەرۋى ءتيىس.
ناقتى ميسسياسى مەن مازمۇنى بار ءونىم بولۋى ماڭىزدى. مىسالى: «قىزىقتى عىلىم الەمى»، «كيبەرالەمدە قاۋىپسىزدىك»، «دوستىق پەن تابيعات»، «باتىردىڭ ەرتەگىلەرى»، «ەموتس. ينتەللەكت»، «مەن كىم بولامىن؟»، «قازاقستاننىڭ وڭىرلەرى» سياقتى ناقتى مازمۇندى باعىتتار ۇسىنىلۋى مۇمكىن.
اتالعان باستاما مەملەكەت باسشىسى جۇكتەگەن تاپسىرمالارمەن تولىق ۇيلەسەدى.
ءبىز رەسمي تۇردە بارلىق ۇسىنىستارىمىزدى مادەنيەت جانە اقپارات مينيسترلىگىنە جولدادىق.
اسحات ايماعانبەتوۆ،
ءماجىلىس دەپۋتاتى
Abai.kz