Жұма, 4 Сәуір 2025
Өзекті 685 0 пікір 2 Сәуір, 2025 сағат 13:22

Мультфильм – нақты мақсатпен жасалуы керек!

Сурет: minber.kz сайтынан алынды.

Биыл біздің Комитет қазақ тіліндегі мультфильмдерге республикалық бюджетті қарау кезінде 300 млн теңге бөлінуіне ұсыныс жасап, қол жеткізді. Бұл — маңызды қадам. Бірақ ендігі мәселе — олардың мазмұны, сапасы және қолжетімділігі.

Сондықтан жақында Комитеттің Казмедиаорталығына жасаған арнайы сапары барысында депутаттар анимация өндірісінің барысымен танысып, авторлармен тікелей пікір алмасты. Нақты ұсыныстар мен талаптар да жеткізілді.

Мультфильмдер не үшін маңызды?

Мультфильм — баланың алғашқы ұстазы.

Ол арқылы бала:

  • Тілді үйренеді,
  • Дүниетанымын қалыптастырады,
  • Құндылықтарды бойына сіңіреді.

Сондықтан мультфильмдерді жай ғана көңіл көтеру құралы емес, тәрбие мен таным негізі деп қабылдаймыз.

Balapan — балалар тіліне көпір болған арна

Осы жерде ерекше атап өткім келеді:

Менің өз балаларым — “Балапан” арнасын көріп, тілі шықты.

“Балапанның” жасаған мультфильмдері — сапалы, көркем, тартымды. “Қазақстан” РТРК АҚ үлкен жұмыс жүргізуде.

Енді осы тәжірибені кеңейтіп, қолдап, сапаны одан әрі арттыруымыз қажет.

YouTube — балалардың негізгі алаңы

Бүгінде балалардың көбі телевизор емес, YouTube көреді. Бірақ онда қазақ тіліндегі қызықты, заманауи мультфильмдер өте аз.

Сондықтан:

  • Қазақ тіліндегі сапалы, балаларға тартымды мультфильмдер YouTube-та қолжетімді болуы қажет;
  • Жас ерекшеліктеріне сай плейлисттер мен сериялар құрылуы керек.

Мультфильмдегі тіл — табиғи болуы шарт

Кейбір мультфильмдерде кейіпкерлер канцеляризммен, жасанды тілмен сөйлейді. Бұл — баланың құлағына түсініксіз, қызықсыз, жат естіледі.

Сондықтан:

  • Қарапайым, шынайы, тірі қазақ тілі қолданылуы тиіс;
  • Бала тыңдап, өз тілімен байланыс орнатуы керек.

Анимация саласындағы бәсекелестік пен ашықтық

Қазақстанда өте талантты аниматорлар мен студиялар бар. Олар халықаралық байқауларда да жетістікке жетіп жүр. Бірақ:

  • Барлық жобалар ашық конкурс арқылы таңдалуы тиіс;
  • Бағалау мамандар мен қоғам өкілдерінің қатысуымен жүргізілуі керек;
  • Жеңімпаз — тек сапалы өнім ұсынған адам болуы шарт.

Кадр дайындау — өзекті мәселе

  • ЖОО-ларда мультфильм мамандарын дайындайтын оқу бағдарламаларын кеңейтуді,
  • 2D және 3D форматтағы анимацияны оқытуды ұсындық.

Мультфильм – нақты мақсатпен жасалуы керек!

Әр мультфильм нақты мәселені шешіп, балаға нақты дағды немесе құндылық беруі тиіс.

Нақты миссиясы мен мазмұны бар өнім болуы маңызды. Мысалы: «Қызықты ғылым әлемі», «Киберәлемде қауіпсіздік», «Достық пен Табиғат», «Батырдың ертегілері», «Эмоц. интеллект», «Мен кім боламын?», «Қазақстанның өңірлері» сияқты нақты мазмұнды бағыттар ұсынылуы мүмкін.

Аталған бастама Мемлекет басшысы жүктеген тапсырмалармен толық үйлеседі.

Біз ресми түрде барлық ұсыныстарымызды Мәдениет және ақпарат министрлігіне жолдадық.

Асхат Аймағанбетов,

Мәжіліс депутаты

Abai.kz

0 пікір

Үздік материалдар

46 - сөз

Қайраулы қара семсер

Есболат Айдабосын 1327
Анық-қанығы

Еуропаға Ресей аумағынсыз шығу жолы

Асхат Қасенғали 3935
46 - сөз

Бізге беймәлім Барақ хан

Жамбыл Артықбаев 2878