كاسپي جاعاسىنداعى اقتاۋ تەڭىز پورتى – ەندى تەك جۇك تيەپ-تۇسىرەتىن ورىن ەمەس. بۇل – قازاقستاندى الەمدىك ساۋدا كارتاسىندا جاڭا دەڭگەيگە شىعاراتىن ماڭىزدى توراپ. 18 ءساۋىر كۇنى مەملەكەت باسشىسى قاسىم-جومارت توقاەۆ وسى ستراتەگيالىق حابقا بارىپ، اقتاۋدىڭ بۇگىنگى تىنىس-تىرشىلىگىمەن تانىستى. 

اقتاۋ پورتى قازىر تاۋلىگىنە 24 ساعات جۇمىس ىستەيتىن زاماناۋي تەرمينالمەن جابدىقتالعان. ول ءبىر مەزەتتە شىعىس–باتىس پەن سولتۇستىك–وڭتۇستىك باعىتتارىنان كەلەتىن جۇكتىڭ ءبارىن قابىلداي الادى. مۇنداي اۋقىمدى ترانزيتتىك مۇمكىندىكتەر – ەل ەكونوميكاسىنىڭ جاڭا تىنىسى. بىلتىردىڭ وزىندە ترانسكاسپي ءدالىزى ارقىلى وتكەن جۇك كولەمى 62 پايىزعا ءوسىپ، 4,5 ميلليون تونناعا جەتتى. بۇل باعىتپەن 358 كونتەينەرلىك پويىز جانە 27 مىڭنان استام اۆتوكولىك وتكەن. 

"پورتتى دامىتۋ ارقىلى ءبىز قازاقستاندى ەۋروپا مەن ازيانى جالعايتىن نەگىزگى كولىك حابىنا اينالدىرا الامىز", – دەدى كولىك ءمينيسترى مارات قاراباەۆ. ونىڭ ايتۋىنشا، وڭىردە جالپى قۇنى 1,9 تريلليون تەڭگە بولاتىن 24 ءىرى ينفراقۇرىلىمدىق جوبا جۇزەگە اسىرىلۋدا. 

پرەزيدەنت ساپارلارى: گەوساياسات قانا ەمەس، ىشكى ساياسات تا نازاردا 

اقتاۋعا ساپار – بيىلعى جىلدىڭ العاشقى ايلارىنان بەرى جالعاسىپ كەلە جاتقان وڭىرلىك جۇمىس ساپارلارىنىڭ جالعاسى. بۇل ءۇردىس جاي عانا حاتتاماعا اينالعان ءىس-شارا ەمەس. پرەزيدەنت ءار ساپارىندا ناقتى ماسەلەلەر كوتەرىپ، حالىقتى الاڭداتقان تۇيتكىلدەرگە تىكەلەي نازار اۋدارىپ ءجۇر. 

ساياساتتانۋشى پەردەحان شامشيەۆ بۇل تۋرالى بىلاي دەيدى: 

«پرەزيدەنت الدىمەن رەسپۋبليكالىق ماڭىزى بار قالالارعا باردى. 14 اقپاندا – استانا، ناۋرىزدا – الماتى، ساۋىردە – شىمكەنت. بۇل كەزدەيسوق ەمەس. ءىرى ورتالىقتاردان كەيىن ەندى وڭىرلىك پروبلەمالارعا نازار اۋدارىپ جاتىر. اقتاۋعا ساپار سونىڭ دالەلى. بۇعان دەيىن دە قوعامدا «ىشكى ساياسات ەكىنشى ورىندا قالىپ قويدى» دەگەن پىكىر ايتىلىپ جۇرگەن ەدى. پرەزيدەنت ەندى بۇل باعىتقا سالماق سالا باستاعانىن سوزىمەن ەمەس، ىسىمەن دالەلدەپ وتىر». 

ماڭعىستاۋدىڭ ماسەلەسى – ەلدىڭ ماسەلەسى 

اقتاۋدا وتكەن كەڭەستە ءوڭىردىڭ وزەكتى پروبلەمالارى دا كوتەرىلدى. سونىڭ ىشىندە سۋ تاپشىلىعى، جىلۋمەن قامتۋ سياقتى ماسەلەلەرگە ەرەكشە نازار اۋدارىلدى. قۋاڭشىلىق جىلدارى قاتتى زارداپ شەككەن حالىقتىڭ جاعدايىن ەسكەرە وتىرىپ، پرەزيدەنت ۇكىمەتكە، وبلىس اكىمدىگىنە جانە "سامۇرىق-قازىنا" قورىنا ناقتى تاپسىرمالار بەردى. 

اقتاۋدا باستالعان جۇمىس ساپارى – ەكونوميكالىق كورسەتكىشتەردەن بولەك، ەلدەگى وڭىرلىك تەڭگەرىم مەن الەۋمەتتىك ادىلەتتىلىكتى قامتاماسىز ەتۋگە باعىتتالعان قادام. جول، پورت، سۋ – قاراپايىم بولعانىمەن، ەل دامۋى ءۇشىن اسا قاجەت تىرەكتەر. پرەزيدەنت بۇل تىرەكتەردىڭ بەرىكتىگىنە ءوزى بارىپ كوز جەتكىزۋدە. 

گۇلميرا سىزدىققىزى 

Abai.kz