مەملەكەتتىك كىرىستەر كوميتەتى بيىل كامەرالدىق باقىلاۋ ناتيجەسىندە 80 مىڭنان استام ازاماتقا سالىق بويىنشا حابارلاما جىبەرگەن ولاردىڭ ىشىندە 854 بلوگەر بار.

مەملەكەتتىك كىرىستەر كوميتەتىنىڭ مالىمەتىنشە، سالىق ورگاندارىنىڭ ماقساتى – بارلىق جەكە تۇلعانىڭ، سونىڭ ىشىندە بلوگەرلەردىڭ دە تابىسىنان سالىق تولەنۋىن قامتاماسىز ەتۋ. بۇل جۇمىس كامەرالدىق باقىلاۋ ارقىلى جۇرگىزىلەدى. ياعني سالىق ورگاندارى سالىقتىق ەسەپتىلىكتەردى، مەملەكەتتىك دەرەكتەردى جانە وزگە دە اقپارات كوزدەرىن ساراپتاپ، سايكەسسىزدىكتەردى انىقتايدى.

«2025 جىلى وسىنداي باقىلاۋ ناتيجەسىندە 80 مىڭنان استام جەكە تۇلعاعا، ونىڭ ىشىندە 854 بلوگەرگە حابارلاما جىبەرىلگەن. بۇل حابارلامالاردا تابىس پەن سالىق ەسەبىندە سايكەسسىزدىك بارى كورسەتىلەدى. بۇگىندە 301 بلوگەر ءوز تابىسىن مويىنداپ، جالپى سوماسى 9,4 ملرد تەڭگەنى دەكلاراتسيالاعان. ناتيجەسىندە ولار مەملەكەتكە 520,7 ملن تەڭگە جەكە تابىس سالىعىن تولەدى، - دەلىنگەن رەداكتسيامىزعا بەرگەن رەسمي جاۋاپتا.

سالىق ورگاندارى بلوگەرلەرگە قاتىستى ەشقانداي ارنايى تەكسەرىس جۇرگىزىلمەيتىنىن مالىمدەدى. كامەرالدىق باقىلاۋ بارلىق سالىق تولەۋشىلەرگە بىردەي جۇرگىزىلەدى. بلوگەرلەر جەكە تۇلعا رەتىندە قاراستىرىلىپ، تەك سالىق تولەمەگەن جاعدايدا عانا ەسكەرتۋ الادى.

حابارلاما العان ازاماتتار وعان 30 جۇمىس كۇنى ىشىندە جاۋاپ بەرۋى كەرەك. ەگەر كورسەتىلگەن زاڭبۇزۋشىلىقتارمەن كەلىسپەسە، سالىق ورگانىنا تۇسىنىكتەمە جولداۋعا قۇقىلى. ال ەش جاۋاپ بەرىلمەسە نەمەسە تۇسىنىك دالەلسىز بولسا، تولىق سالىقتىق تەكسەرىس تاعايىندالادى.

Abai.kz