ماجىلىستە وتكەن ۇكىمەت ساعاتىندا ادىلەت ءمينيسترى ەرلان سارسەمباەۆ بورىشكەرلەردىڭ مۇلكىن اۋكتسيون ارقىلى ساتۋ ماسەلەسىندەگى زاڭبۇزۋشىلىقتار مەن ادىلەتسىز سحەمالاردى جايىپ سالدى.

ءمينيستردىڭ سوزىنشە، قازىرگى جۇيەدە تىيىم سالىنعان مۇلىكتى ساتۋعا قاتىستى بىرقاتار كەمشىلىكتەر بار، ولار بورىشكەرلەردىڭ قۇقىقتارىنا ايتارلىقتاي زيان كەلتىرىپ وتىر.

«كەيبىر قاتىسۋشىلار مۇلىكتى تومەن باعامەن ساتىپ الۋ ءۇشىن قاساقانا جوعارى باعا ۇسىنىپ، كەيىن ساتىپ الۋدان باس تارتادى. ناتيجەسىندە مۇلىك ءبىرىنشى اۋكتسيوندا وتپەگەن بولىپ ەسەپتەلىپ، ەكىنشى رەت تومەندەتىلگەن باعامەن قايتا ساۋداعا شىعارىلادى. بۇل ءتاسىل — نارىقتاعى ءادىل باسەكەنى بۇزاتىن “سۇر سحەمالاردىڭ” ءبىرى», - دەءيدى ەرلان سارسەمباەۆ.

مينيستر ناقتى مىسال كەلتىردى: استانا قالاسىندا اۋكتسيون ارقىلى مۇلىك نەبارى 7,5 ملن تەڭگەگە ساتىلعان. بۇل ونىڭ ناقتى نارىقتىق قۇنى — 100 ملن تەڭگەدەن 13 ەسە تومەن. ال اقمولا وبلىسىندا 30 ملن تەڭگەگە باعالانعان جەر تەلىمى نەبارى 2 ملن تەڭگەگە وتكەنى انىقتالعان. مۇنداي جاعدايلار بورىشكەرلەرگە اۋىر سالدار اكەلۋدە، سەبەبى ايىرماشىلىقتى وتەۋ ولاردىڭ موينىنا جۇكتەلەدى.

قازىرگى تاڭدا ادىلەت مينيسترلىگى اۋكتسيونداعى ادىلەتسىزدىكتى بولدىرماۋعا باعىتتالعان زاڭنامالىق تۇزەتۋلەر ازىرلەگەن. جاڭا وزگەرىستەر بويىنشا:

• ەگەر قاتىسۋشىلار بىردەي باعا ۇسىنسا، مۇلىكتى جوعارىلاتۋ ارقىلى ساتۋ جالعاسادى;
• اۋكتسيون جەڭىمپازى ساتىپ الۋدان باس تارتقان جاعدايدا، كەلەسى جوعارى باعا ۇسىنعان قاتىسۋشىعا مۇلىكتى ساتىپ الۋ قۇقىعى بەرىلەدى.

سونىمەن قاتار، مينيستر كەيبىر قاتىسۋشىلاردىڭ اۋكتسيوندا جەڭىسكە جەتۋ ءۇشىن ارنايى باعدارلامالاردى قولداناتىنىن اتاپ ءوتتى. ماسەلەن، استانادا ءبىر قاتىسۋشى مۇلىكتىڭ باعاسىن 0,2 سەكۋندتىڭ ىشىندە راستاعان. بۇل ءادىس قاراپايىم ازاماتتاردىڭ تەڭ دارەجەدە قاتىسۋىنا مۇمكىندىك بەرمەي وتىر.

ادىلەت مينيسترلىگى بورىشكەرلەردىڭ مۇلكىن ساتۋ جۇيەسىندە اشىقتىق پەن ادىلەتتىلىكتى قامتاماسىز ەتۋدى باستى ماقسات ەتىپ وتىر. مينيستر سارسەمباەۆ بۇل باعىتتاعى زاڭنامالىق وزگەرىستەردىڭ الداعى ۋاقىتتا قابىلداناتىنىنا سەنىم ءبىلدىردى.

Abai.kz