اقتاۋ قالاسىندا قازاقستاننىڭ اسكەري-تەڭىز تۋىنىڭ العاش كوتەرىلگەنىنە 30 جىل تولۋىنا وراي سالتاناتتى شارا ءوتتى. 1996 جىلعى 17 تامىزدا اسكەري-تەڭىز تۋى اسكەري كەمەلەردە العاش رەت كوتەرىلدى. ال قازاقستاننىڭ اسكەري-تەڭىز كۇشتەرى 1993 جىلعى 2 ساۋىردە قازاقستان رەسپۋبليكاسى پرەزيدەنتىنىڭ جارلىعىمەن قۇرىلدى.

سالتاناتتى راسىمگە اسكەري-تەڭىز كۇشتەرىنىڭ قولباسشىلىعى، ماڭعىستاۋ وبلىسىنىڭ اكىمى نۇرداۋلەت قيلىباي، اقتاۋ گارنيزونىنىڭ اسكەري قىزمەتشىلەرى، قر قك اسكەري-تەڭىز كۇشتەرىنىڭ ارداگەرلەرى جانە قوعام وكىلدەرى قاتىستى. اسكەري قىزمەتشىلەر جاۋىنگەرلىك دايارلىق ەلەمەنتتەرىن كورسەتتى. قوناقتار زاماناۋي تەڭىز تەحنيكاسىمەن، قارۋ-جاراقپەن جانە جاراقتاندىرۋ قۇرالدارىمەن تانىستى.

«بۇگىن ءبىز قازاقستاننىڭ كاسپي تەڭىزى سەكتورىندا ۇلتتىق مۇددەلەردى قورعاۋدى قامتاماسىز ەتەتىن اسكەري-تەڭىز كۇشتەرىنىڭ قالىپتاسۋىنا نەگىز بولعان ماڭىزدى وقيعانى اتاپ ءوتىپ جاتىرمىز. اسكەري قىزمەتشىلەردىڭ قازىرگى بۋىنى العاشقى تەڭىزشىلەر قالىپتاستىرعان داستۇرلەردى باعالايدى، اسكەري-تەڭىز كۇشتەرىنىڭ جاۋىنگەرلىك الەۋەتىن نىعايتىپ، حالىقارالىق ىنتىماقتاستىقتى جۇيەلى تۇردە دامىتىپ كەلەدى»، – دەدى اسكەري-تەڭىز كۇشتەرىنىڭ باس قولباسشىسى، 1-سىنىپتى كاپيتان قانات نيازبەكوۆ.

بۇگىندە اسكەري-تەڭىز كۇشتەرى – قازاقستان قارۋلى كۇشتەرىنىڭ دەربەس اسكەرى. ول كاسپي تەڭىزىنىڭ قازاقستاندىق سەكتورىنداعى قاۋىپسىزدىكتى قامتاماسىز ەتۋگە جاۋاپ بەرەدى. قازاقستاننىڭ اسكەري-تەڭىز كۇشتەرىنىڭ كەمەلەرى تەڭىز شەكاراسىن، پورتتاردى، اسا ماڭىزدى ينفراقۇرىلىم نىساندارىن كۇزەتىپ، سۋاستى ديۆەرسيالارىنا قارسى ءىس-قيمىل جۇرگىزەدى.

اسكەري-تەڭىز كۇشتەرىنىڭ سۋداعى قۇرامىنىڭ نەگىزىن «قازاقستان»، «ورال»، «سارىارقا» جانە «ماڭعىستاۋ» زىمىراندىق-ارتيللەريالىق كەمەلەرى قۇرايدى. ولاردىڭ بارلىعى قازاقستاندا ورال قالاسىنداعى «زەنيت» زاۋىتىندا جاسالعان.

كەمەلەر تەڭىزۇستى نىساندارىن جويۋعا ارنالعان جانە كاسپي تەڭىزىندە دەربەس تۇردە 10 تاۋلىككە دەيىن ارەكەت ەتە الادى.

فلوت قۇرامىندا مينالاردى جانە باسقا دا سۋاستى قاۋىپتەرىن انىقتاپ، زالالسىزداندىرۋ مىندەتتەرىن ورىندايتىن «الاتاۋ» رەيدتىك ترالى دا بار. ناۆيگاتسيالىق جانە گيدروگرافيالىق قامتاماسىز ەتۋ ءۇشىن ارنايى كەمەلەر، ونىڭ ىشىندە «جايىق» كەمەسى پايدالانىلادى.

قازاقستان ءوز اسكەري كورابلدەرىن جاساۋدى ودان ءارى دامىتىپ كەلەدى. نەگىزگى وندىرىستىك الاڭ – ورال قالاسىنداعى «زەنيت» زاۋىتى. مۇندا 1990 جىلداردان بەرى پاترۋلدىك جانە جاۋىنگەرلىك كاتەرلەر مەن كەمەلەر جاسالادى.

اسكەري-تەڭىز كۇشتەرى كاسپي ماڭى مەملەكەتتەرىمەن بىرلەسىپ حالىقارالىق وقۋ-جاتتىعۋلارعا قاتىسادى. ونىڭ نەگىزگى ماقساتى – قاۋىپ-قاتەرلەرگە بىرلەسىپ دەن قويۋ، تەڭىز ينفراقۇرىلىمىن قورعاۋ جانە جاۋىنگەرلىك ازىرلىكتى ارتتىرۋ.

سوڭعى وتىز جىلدا قازاقستاننىڭ اسكەري فلوتى العاشقى بولىمشەلەردىڭ قالىپتاسۋ كەزەڭىنەن باستاپ قارۋلى كۇشتەردىڭ دەربەس اسكەر تۇرىنە دەيىنگى دامۋ جولىنان ءوتتى. بۇگىندە ول كاسپي تەڭىزىنىڭ اكۆاتورياسى مەن قازاقستاننىڭ تەڭىز شەكاراسىن سەنىمدى قورعاۋعا قابىلەتتى.

Abai.kz