قر پرەمەر-ءمينيسترىنىڭ ورىنباسارى ەرمەك كوشەرباەۆ مىرزانىڭ نازارىنا!

ەكى جىل بويى «جىر» بولعان «اتا جولى» كارتاسى!

اتالعان كارتا پرەزيدەنتىمىز قاسىم-جومارت توقاەۆتىڭ تاپسىرماسىماسىنا ساي، ەڭبەك جانە حالىقتى الەۋمەتتىك قوعارۋ مينيسترلىگى جاعىنان جوباسى جاسالىپ، 2023 جىلى 20 ساۋىردە «حالىقتىڭ كوشى-قونى تۋرالى» زاڭىمەن بەكىتىلگەن بولاتىن.

وكىنىشكە وراي، ءماجىلىس پەن سەنات بۇل جوبانى قاراعان كەزىندە، ونىڭ قولدانىلۋىن توقتاتۋ جانە بەرۋدەن باس تارتۋ ءۇشىن نەگىزدەرىن زاڭداستىرعان دا، ال ونى العان ەتنيكالىق قازاقتاردىڭ قۇقىقتارى مەن مىندەتتەرىن «ۇمىتىپ» كەتكەن.

ءسويتىپ، «اتا جولى» كارتاسى ەكى جىلدان بەرى اتى بار، زاتى جوق جوبا بولىپ كەلدى.

كوشى-قون ساياساتىمەن ۇزاق جىل اينالىسقان تاجىريبەلى مامان رەتىندە اتالعان كارتانىڭ بۇل كەمشىلىگىن ايتىپ، سان مارتە ماسەلە كوتەردىم.

اقىرى، وتكەن جىلدىڭ 14 قازانىندا قر پارلامەنتىنىڭ سەناتى: «اتا جولى» كارتاسىنا قاتىستى شالاعايلىقتى مويىنداپ، «اۋىت مۇقيبەك، ءسىزدىڭ «اتا جولى» كارتاسىنا قاتىستى حاتىڭىزدى قاراستىرىپ، قولدانىستاعى زاڭ نورمالارىندا «اتا جولى» كارتاسىن العان ەتنيكالىق قازاقتاردىڭ قۇقىقتارى مەن مىندەتتەرى بەكىتىلمەگەنىن حابارلايمىز», - دەگەن جاۋاپ بەردى.

سوعان قاراماستان، اتقارۋشى بيلىك پەن زاڭ شىعارۋشى ورگان اتالعان كارتانى پرەزيدەنتىمىز قاسىم-جومارت توقاەۆتىڭ اۋزىنان: «قازاقستان ازاماتتىعى مەن قانداس مارتەبەسىن الۋ ءتارتىبى جەڭىلدەتىلدى. شەتەلدەگى قازاق كاسىپكەرلەرى ءۇشىن ارنايى «اتا جولى» كارتاسى ەنگىزىلدى...»، - دەگىزىپ، ارت-ارتىنان ءۇش مارتە ايتقىزىپ جىبەردى.

ناقتىلاپ ايتساق، اتى بار، زاتى جوق جوبامەن پرەزيدەنتىمىزدى شەتتەگى قازاقتاردىڭ الدىندا وتىرىكشى قىلدى.

بىراق، وسى جوبانى جاساۋعا جانە ونى زاڭداستىرۋعا قاتىسقان بىردە-ءبىر اتقارۋشى بيلىك پەن زاڭ شىعارۋشى ورگاننىڭ جاۋاپتى تۇلعاسى كەتكەن قاتەلىك ءۇشىن نە پرەزيدەنتتەن، نە حالىقتان كەشىرىم سۇراعان جوق!

ءالى دە كەشىرىم سۇراسا، كەش ەمەس!

ال، «اتا جولى» كارتاسىنا كەلسەك، بەكەر وبلى كانە، ەڭبەك جانە حالىقتى الەۋمەتتىك قورعاۋ مينيسترلىگى وزدەرىنىڭ قاتەلىكتەرىن مويىنداپ، ەندى سول كارتانى بەرۋ تەتىگىن جەتىلدىرۋگە، تيىمدىلىگىن ارتتىرۋعا بارىنشا قۇلشىنىپ وتىر.

ولاردىڭ ايتۋىنا قاراعاندا، اتالعان مينيسترلىكتىڭ ۆيتسە-ءمينيسترى اسقاربەك ەرتاەۆ مۇددەلى مەملەكەتتىك ورگانداردىڭ باسىن قوسىپ، التى-جەتى مارتە جينالىس وتكىزگەن. بىراق، سول كەزدەسۋلەردەن تۇشىمدى ناتيجە شىقپاعان.

18 ءساۋىر كۇنى سول قاتىستى مينيسترلىكتەردىڭ جاۋاپتى تۇلعالارىن، «وتانداستار قورى» كەاق، «دۇنيەجۇزىلىك قازاقتار قاۋىمداستىعى» رقب وكىلدەرىمەن جانە تاجىريبەلى مامان رەتىندە مەنى دە (اۋىت مۇقيبەكتى) قوسىپ، تاعى ءبىر مارتە وتىرىس وتكىزىپ، تالقى جۇرگىزدى.

ارينە، «اتا جولى» كارتاسىنىڭ زاڭدىق نەگىزىن جەتىلدىرۋ، تيىمدىلىگىن ارتتىرۋ جالعىز ەڭبەك جانە حالىقتى الەۋمەتتىك قورعاۋ مينيسترلىگىنىڭ اياسىندا شەشىلمەيدى.

ونىڭ ۇستىنە، تاعى قايتالاپ ايتايىن، «اتا جولى» كارتاسى پرەزيدەنتىمىز قاسىم-جومارت توقاەۆتىڭ تىكەلەي تاپسىرماسىمەن جولعا قويىلىپ وتىر.

سوندىقتان، بۇل كارتا ەتنيكالىق قازاقتاردى اشەيىن الداۋسىراتۋ ءۇشىن جولعا قويعان جوبا ەمەس!

ەگەر، ءبىز «اتا جولى» كارتاسىن العان ەتنيكالىق قازاقتاردىڭ مارتەبەسىن «حالىقتىڭ كوشى-قونى تۋرالى» زاڭىنىڭ 5-بابىنا ساي كوشىپ-كەلۋشىلەرگە بەرىلەتىن قۇقىقتار مەن مىندەتتەردىڭ دەڭگەيىندە قاراساق، وندا قاتتى قاتەلەسەمىز.

مىسالى، دونالد ترامپ جاڭا «التىن كارتانى» شەتەلدىك اۋقاتتى ادامدارعا بەس ميلليون اقش دوللاردان ساتۋ تۋرالى شەشىم قابىلدادى. بۇل – ءبىر.

ال، ەستەرىڭىزدە بولسا، قاسىم-جومارت توقاەۆ 22 جىلى inDriver كومپانياسىنىڭ نەگىزىن قالاۋشى ارسەن تومسكيدى قابىلداپ، 2023 جىلى وعان قازاقستان رەسپۋبليكاسى پرەزيدەنتiنiڭ 2005 جىلعى 6 ماۋسىمداعى N1587 جارلىعىنىڭ نەگىزىندە قازاقستان رەسپۋبليكاسىنىڭ ازاماتتىن بەردى.

دەمەك، قاسىم-جومارت كەمەلۇلىنىڭ تاپسىرماسىنا ساي جولعا قويىلعان «اتا جولى» كارتاسى دا اۋقىمى، ماقساتى مەن قۇقىقتىق سالماعى جاعىنان ترامپتىڭ «التىن كارتاسىنىڭ» دەڭگەيىندە بولىپ، ول ارسەن تومسكي سەكىلدى قالتالى، ىسكەر ەتنيكالىق قازاقتاردى قازاقستانعا تارتا الاتىن قۋاتقا يە بولۋى كەرەك!

ءتىپتى، سونداي بولماسا دا، سوعان جەتەعابىل دەڭگەيدە جاسالۋى ءتيىس!

پرەزيدەنت قاسىم-جومارت توقاەۆتىڭ دا «اتا جولى» كارتاسىن جولعا قويۋداعى باستى ماقساتى – وسى دەپ ويلايمىن!

كەشەگى ۆيتسە-مينيستر اسقاربەك ەرتاەۆ شاقىرعان جينالىستان بايقاعانىم، مۇددەلى مينيسترلىك وكىلدەرى «اتا جولى» كارتاسىنىڭ ءمانى مەن ماڭىزىن تۇك تە ءتۇسىنىپ وتىرعان جوق!

مىسالى، جينالىس بارىسىندا ءسوز العان ۇلتتىق ەكونوميكا مينيسترلىگى الەۋمەتتىك سالانى، قۇقىق قورعاۋ جانە ارنايى ورگانداردى دامىتۋ دەپارتامەنتى ديرەكتورىنىڭ ورىنباسارى اسەل سادىقوۆا  ZOOM-نىڭ ءوزىن دۇرىس يگەرە الماي قور بولدى، ونىڭ نە ايتىپ، نە قويعانىن ۇقپادىق;

سىرتقى ىستەر مينيسترلىگى كونسۋلدىق قىزمەت دەپارتامەنتىنىڭ ءبىرىنشى حاتشىسى باقىتجان ساپارباەۆ «اتا جولى» كارتاسىن العان ەتنيكالىق قازاقتار ءۇشىن جاڭا ساناتتاعى ۆيزا بەرۋ ءتارتىبىن ەنگىزۋدەن ات تونىن الا قاشىپ، شەتتەن كەلەتىن اعايىندارعا بەرىلىپ جاتقان ۆيزا بەرۋ ءتارتىبى جەتكىلىكتى دەپ، ءبىر شالقايدى، ارنايى حات تۇسىرىڭدەر دەپ، ەكى شالقايدى. ءۇشىنشى مارتە ءسوز الىپ، تاعى ءبىر تاتىمسىز ۋاجدەر ايتقان بولدى...

ەسىڭىزدە بولسا، وتكەن جىلعى الاپات سۋ تاسقىنى كەزىندە پرەزيدەنتىمىز قاسىم-جومارت توقاەۆ: «قۇزىرلى مەكەمەلەر، ياعني اكىمدىكتەر، توتەنشە جاعدايلار مينيسترلىگى، سۋ رەسۋرستارى مينيسترلىگى بىرلەسىپ جۇمىس جاسامايدى. جاۋاپكەرشىلىك الۋدان قاشادى. جۇمىستى ءبىر-بىرىنە سىلتەپ وتىرادى. مەملەكەتتىك ورگاندار جانە اكىمدىكتەر اراسىندا ناقتى ءارى تۇراقتى بايلانىس الگوريتمى جوق...», -دەپ ەدى عوي.

قىسقاسى، «اتا جولى» كارتاسىنا قاتىستى تالقىلاۋ كەزىندە دە مۇددەلى مينيسترلىكتەر اراسىندا وسى جاعداي تاعى ورىن الۋدا...

قۇرمەتتى ەرمەك بەدەلبايۇلى!

قازاقتىڭ اسا كورنەكتى اقىنى قادىر مىرا-ءالى اعامىزدىڭ مىنا ءبىر كەرەمەت ولەڭى ەسىڭىزدە مە؟

ويقاستاعان جاقسى اتپەن
ورتا جولدا قالمايسىڭ.
كىشىگىرىم ماقساتپەن
ۇلكەن ادام بولمايسىڭ!

«اتا جولى» كارتاسىن العان ەتنيكالىق قازاقتار ويقاستاعان جاقسى ات مىنگەندەي كۇي كەشۋى كەرەك قوي.

كورىپ وتىرسىز، ءبىز مىناداي كىشىگىرىم ماقساتپەن بيىك بەلەستەردى باعىندىرا المايمىز! پرەزيدەنتتى تاعى دا ۇياتقا قالدىرامىز!

سول ءۇشىن، «اتا جولى» كارتاسىن بەرۋ ءتارتىبىن جەتىلدىرۋ ماسەلەسى مىناداي ماقساتى جەر باۋىرلاعان كەراناۋ دەپارتامەنت ديرەكتورلارى مەن تىرسەگىنە سيگەن كوميتەت باسشىلارىنىڭ ەمەس، ەڭ كەمىندە ۆيتسە-مينيسترلەردىڭ دەڭگەيىندە تالقىلانۋى كەرەك!

قىسقاسى، ولجاس بەكتەنوۆ ايتقانداي، «اتا جولى» كارتاسىنىڭ سانىنە ەمەس مانىنە ءمان بەرەتىن كەز كەلدى...

سىزدەن وسى ماسەلەنى ءوزىڭىزدىڭ نازارىڭىزعا الۋدى سۇرايمىن!

زور قۇرمەتپەن،

اۋىت مۇقيبەك،

«ەرەن ەڭبەگى ءۇشىن» مەدالىنىڭ، «قۇرمەت» وردەنىنىڭ يەگەرى

Abai.kz