2022 جىلدان بەرى مەملەكەتكە جانە كۆازيمەملەكەتتىك سەكتور سۋبەكتىلەرىنە 1 تريلليون 130 ميلليارد تەڭگەدەن استام اكتيۆ قايتارىلدى. بۇل تۋرالى سىبايلاس جەمقورلىققا قارسى قىزمەتتىڭ رەسمي وكىلى دانيار بيگايداروۆ ايتتى.

ونىڭ ايتۋىنشا، زاڭسىز شىعارىلعان اكتيۆتەردى قايتارۋ – سىبايلاس جەمقورلىققا قارسى قىزمەتتىڭ نەگىزگى مىندەتتەرىنىڭ ءبىرى. بۇل جۇمىس مەملەكەت باسشىسىنىڭ تاپسىرمالارىن ىسكە اسىرۋ اياسىندا Follow the money قاعيداتىمەن جۇرگىزىلۋدە.

اكتيۆتەردىڭ ەداۋىر بولىگى شەتەلدەن قايتارىلدى. مۇنداي اكتيۆتەردىڭ سوماسى 670 ميلليون اقش دوللارىن قۇرادى. بۇل شامامەن 300 ميلليارد تەڭگەگە جۋىق اقشا. ونىڭ ىشىندە اۋستريا، ليحتەنشتەين، ءباا، تۇركيادان قايتارىلعان اقشا بار.

− قىلمىستىق جولمەن الىنعان اقشالاي قاراجات پەن مۇلىكتى ىزدەۋ جۇمىستارى ەل ىشىندە دە، شەت ەلدە دە جۇرگىزىلۋدە. بۇل ماقساتتا قارجى مونيتورينگى اگەنتتىگىنىڭ قارجىلىق بارلاۋ بولىمشەسىمەن جانە حالىقارالىق ارىپتەستەرمەن تىعىز ىنتىماقتاستىق ورناتىلعان. «GlobE»، «CARIN»، «ARIN» جانە باسقا دا بەيرەسمي بايلانىس ارنالارى پايدالانىلىپ، اكتيۆتەردى جەدەل انىقتاۋعا جانە قايتارۋعا مۇمكىندىك بەردى. وسىعان ۇقساس جۇمىستار وڭىرلىك دەپارتامەنتتەردە جۇرگىزىلىپ جاتىر، - دەدى د. بيگايداروۆ سىبايلاس جەمقورلىققا قارسى قىزمەتتە وتكەن بريفينگىدە.

جالپى، قارجىلىق تەرگەۋ كەزىندە كۇدىكتىلەردىڭ تۋىستارىنا، سەنىمدى ادامدارعا جانە ءجيى نومينالدى مەنشىك يەلەرى رەتىندە پايدالانىلاتىن باسقا تۇلعالارعا راسىمدەلگەن اكتيۆتەر تەكسەرىلەدى.

− ادەتتە، ولار مۇلىك پەن ونى ساتىپ الۋعا جۇمسالعان قاراجاتتىڭ زاڭدى شىعۋ تەگىن دالەلدەي المايدى، ال ولاردىڭ رەسمي تابىسى اكتيۆتەر قۇنىنان ەداۋىر تومەن. مىسالى، شقو-دا سىبايلاس جەمقورلىققا كۇدىكتى تۇلعا قىلمىستىق جولمەن الىنعان قاراجاتقا اۆتوكولىك پەن ەكى پاتەر ساتىپ الىپ، جۇمىسسىز تۋىسىنىڭ اتىنا راسىمدەگەن. شىمكەنتتە مەملەكەتتىك قىزمەتكەر ۇرلانعان اقشاعا زايىبىنا ەلەكتروموبيل ساتىپ العان. جەتىسۋ وبلىسىندا قارجىلىق تەرگەۋ ناتيجەسىندە 2,8 ملرد تەڭگە بولاتىن مۇلىك، سونىڭ ىشىندە اقشا قاراجاتى، 6 اۆتوكولىك جانە 1 پاتەر انىقتالىپ، تاركىلەندى، - دەدى د. بيگايداروۆ.

اكتيۆتەردى ىزدەۋ، تىيىم سالۋ جانە قايتارۋ جۇمىستارىن جۇرگىزۋ بارىسىندا ولاردىڭ تۇپكىلىكتى مەنشىك يەلەرىن انىقتاۋ، قاجەتتى مالىمەتتەر مەن دالەلدەردى الۋ بويىنشا باس پروكۋراتۋرانىڭ اكتيۆتەردى قايتارۋ كوميتەتىمەن جانە باسقا دا قۇقىق قورعاۋ ورگاندارىمەن، سونىڭ ىشىندە شەتەلدىك قۇقىق قورعاۋ ورگاندارىمەن تىعىز ءوزارا ءىس-قيمىل ورنتىلعان.

مىسالى، اكتيۆتەردى قايتارۋ كوميتەتىمەن بىرلەسىپ جۇرگىزىلگەن جۇمىس ناتيجەسىندە استانا قالاسىنىڭ ازاماتتىق ىستەر جونىندەگى اۋدانارالىق سوتىنىڭ شەشىمىمەن مەملەكەت پايداسىنا 5 ملرد تەڭگەدەن استام قارجى، زەرگەرلىك بۇيىمدار جانە قىمبات مۇلىكتەر قايتارىلدى.

ايتا كەتەيىك، استانا بانكىنىڭ بۇرىنعى اكتسيونەرى ولجاس توقتاروۆقا سىرتتاي سوت ۇكىمى شىقتى.

Abai.kz