وتان قورعاۋشى كۇنى مەن ۇلى جەڭىستىڭ 80 جىلدىعى قارساڭىندا «AMANAT» پارتياسىنىڭ «جاستار رۋحى» جاستار قاناتى «Qaisar» اسكەري-پاتريوتتىق ويىندارىن ۇيىمداستىردى. قاراعاندى وبلىسىنداعى سپاسسك وقۋ-جاتتىعۋ ورتالىعىندا وتكەن ءىس-شارادا 300-دەن استام ادام باس قوستى. ولاردىڭ اراسىندا «جاس سارباز» ۇيىمىنىڭ تاربيەلەنۋشىلەرى، «ءالياشىلار» قوزعالىسىنا قاتىسۋشى قىزدار، باستاۋىش اسكەري دايىندىق ءپانىنىڭ مۇعالىمدەرى مەن اسكەري كافەدرالاردىڭ وكىلدەرى، سونداي-اق ەلىمىزدىڭ بارلىق وڭىرىنەن كەلگەن 100 جوعارى سىنىپ وقۋشىسى بار.

سۋرەتتى تۇسىرگەن: ءالي عالىم

اسكەري-پاتريوتتىق ويىنداردىڭ اشىلۋ سالتاناتىنا ءماجىلىس سپيكەرى، «AMANAT» پارتياسىنىڭ توراعاسى ەرلان قوشانوۆ، قاراعاندى وبلىسىنىڭ اكىمى ەرماعانبەت بولەكپاەۆ، پارلامەنت دەپۋتاتتارى، قورعانىس مينيسترلىگى مەن «استانا» وڭىرلىك قولباسشىلىعىنىڭ باسشىلىعى، قارۋلى كۇشتەر ارداگەرلەرى، قوعام وكىلدەرى جانە وزگە دە ازاماتتار قاتىستى.

ءوز سوزىندە ەرلان قوشانوۆ 2022 جىلى «AMANAT» پارتياسىنىڭ كەزەكتەن تىس XXII سەزىندە «جاستار رۋحى» جاستار قاناتى «Qaisar» اسكەري-پاتريوتتىق ويىندارىن تۇراقتى تۇردە وتكىزۋ جونىندە باستاما كوتەرگەنىن اتاپ ءوتتى. بۇل باستاماعا مەملەكەت باسشىسى قاسىم-جومارت توقاەۆ قولداۋ ءبىلدىردى. وسى جىلدار ارالىعىندا «Qaisar» اسكەري-پاتريوتتىق ويىندارى تۇراقتى تۇردە وتكىزىلىپ، جاي عانا اسكەري-سپورتتىق ءىس-شارا ەمەس، ناعىز ەرلىكتىڭ، ءپاتريوتيزمنىڭ، جاۋاپكەرشىلىك پەن ءتارتىپتىڭ مەكتەبىنە اينالدى. جالپى، وسى ۋاقىت ىشىندە جوباعا 5 مىڭعا جۋىق ۇل مەن قىز قاتىستى.

سۋرەتتى تۇسىرگەن: ءالي عالىم

«پرەزيدەنت ايتقانداي، ءبىز ۇرپاعىمىزعا دامىعان ءارى مىقتى مەملەكەت قالدىرۋىمىز كەرەك. ول ءۇشىن جاستاردى دۇرىس تاربيەلەۋ قاجەت. بۇل ىستە اسكەر ەرەكشە ءرول اتقارادى. بۇگىندە قازاقستاننىڭ قارۋلى كۇشتەرى تەك اسكەري دايىندىقپەن شەكتەلمەيدى. كەز كەلگەن توتەنشە جاعداي مەن تابيعي اپات ورىن السا، اسكەرىمىز ءبىرىنشى بولىپ كومەك قولىن سوزادى. بۇل – وتان الدىنداعى پارىز بەن حالىق الدىنداعى جاۋاپكەرشىلىكتىڭ شىنايى كورىنىسى. سىزدەردىڭ بويلارىڭىزدا دا وسىنداي قايسار رۋح پەن وتانشىلدىقتىڭ بار ەكەنىنە كامىل سەنەمىن!»، – دەدى ول.

سۋرەتتى تۇسىرگەن: ءالي عالىم

سونداي-اق پارتيا توراعاسى وسى ويىنداردىڭ ۇلى وتان سوعىسىنداعى جەڭىستىڭ 80 جىلدىعى قارساڭىندا وتكىزىلۋىنىڭ سيمۆولدىق ءمانى زور ەكەنىن جەتكىزدى. سۇراپىل سوعىس جىلدارى 1,7 ميلليوننان استام وتانداسىمىز نەمەسە رەسپۋبليكا حالقىنىڭ ءاربىر ءتورتىنشى تۇرعىنى مايدانعا اتتانىپ، جارتىسىنا جۋىعى قايتىپ ورالمادى. ولاردىڭ جانقيارلىق ەرلىگى مەن قايسارلىعى ۇرپاق جادىندا جانە ەل تاريحىندا ماڭگى ساقتالادى. جەڭىستىڭ 80 جىلدىق مەرەيتويىنا وراي، ەلوردادا قازاقستان ارمياسىنىڭ قۋاتى مەن ۇرپاقتار ساباقتاستىعىن ايقىندايتىن اۋقىمدى پاراد وتەدى.

جالپى، «Qaisar» ويىندارى جاس پاتريوتتاردى تاربيەلەۋ ءىسىنىڭ ماڭىزدى بولىگىنە اينالدى. مۇندا ەل جاستارى قارۋ-جاراقتى دۇرىس قولدانا ءبىلۋدى ۇيرەنىپ، كۇش-قۋاتى مەن ءتوزىمىن شىڭداپ قانا قويماي، كوماندالىق رۋح

قالىپتاستىرۋعا جانە اركەز ەل مۇددەسىن قورعاۋعا دايىن بولۋعا داعدىلانادى. وسىنداي قاسيەتتەر ءار ادامعا كەرەك. ءتىپتى، كەز كەلگەن سالادا قاجەت. ولار ادام مىنەزىن شىڭداپ، العا قويعان ماقساتقا جەتۋگە جانە جاۋاپكەرشىلىكتى سەزىنۋگە ۇيرەتەدى.

ەرلان قوشانوۆ مەملەكەت ساياساتىنا سايكەس، اسكەري قىزمەتشىلەردى قولداۋ جانە اسكەري قىزمەتتىڭ بەدەلىن ارتتىرۋ ماسەلەسىنە ەرەكشە ءمان بەرىلەتىنىن اتاپ ءوتتى. بۇگىندە قازاقستان ارمياسى جاۋىنگەرلىك دايىندىقتىڭ جوعارى دەڭگەيىن كورسەتىپ، ونىڭ الەۋەتى جىلدان جىلعا ارتىپ كەلەدى. مەملەكەت تاراپىنان اسكەري قىزمەتشىلەرگە الەۋمەتتىك قولداۋ كورسەتۋ شارالارى ۇنەمى كۇشەيتىلۋدە. سونىڭ ءبىرى – اسكەردە ازاماتتىق بورىشتى وتەگەننەن كەيىن تەگىن جوعارى ءبىلىم الۋ مۇمكىندىگى. قازىردىڭ وزىندە 4500-دەن استام جاس ازامات وسى مۇمكىندىكتى پايدالانىپ ۇلگەردى.

سونىمەن قاتار «AMANAT» پارتياسىنىڭ باستاماسىمەن اسكەري-پاتريوتتىق تاربيە تۋرالى زاڭ جوباسى ازىرلەندى. قۇجات ازاماتتارعا اسكەري-پاتريوتتىق تاربيە بەرۋدىڭ ءبىرتۇتاس جۇيەسىن قۇرۋعا جانە وسى جۇمىسقا بارلىق مەملەكەتتىك ۇيىمدى بەلسەندى تارتۋعا باعىتتالعان. سونداي-اق زاڭ جوباسى باستاۋىش اسكەري دايىندىق ءپانى مۇعالىمدەرىنىڭ مارتەبەسىن ارتتىرۋدى كوزدەيدى. بولاشاقتا اسكەري-پاتريوتتىق ۇيىرمەلەردىڭ تۇلەكتەرى اسكەري جوعارى وقۋ ورىندارىنا ءتۇسۋ جانە اسكەري قىزمەتكە كەلىسىمشارت بويىنشا ورنالاسۋ كەزىندە جەڭىلدىكتەردى پايدالانا الادى. بۇعان قوسا، اسكەرگە شاقىرىلعان جاستارعا قولداۋ كورسەتۋدىڭ قوسىمشا شارالارى قاراستىرىلۋدا. اتاپ ايتقاندا، جۇمىس ورىندارىن ساقتاپ قالۋدان باستاپ، وقۋ اقىسىن وتەۋ مىندەتىنەن بوساتۋعا دەيىن كوزدەلۋدە.

سۋرەتتى تۇسىرگەن: ءالي عالىم

سونداي-اق زاڭ جوباسىنا باستاۋىش اسكەري دايىندىق ءپانى مۇعالىمدەرىنىڭ كيىم كيۋ ءتارتىبى تۋرالى نورما دا ەنگىزىلدى. بۇل باستامانى كەزىندە «مۇعالىم Talks» پلاتفورماسى اياسىندا پەتروپاۆلدىق باستاۋىش اسكەري دايىندىق ءپانىنىڭ مۇعالىمى دارحان قوسپانوۆ كوتەرگەن بولاتىن. «AMANAT» پارتياسىنىڭ دەپۋتاتتارى بۇل ۇسىنىستى قولدادى.

ويىندار ەكى كۇن جالعاسادى. ەلىمىزدىڭ تۇكپىر-تۇكپىرىنەن كەلگەن جاستار وق اتۋ، اسكەري ەستافەتا، اۆتوماتتى شاشىپ-جيناۋ، زياتكەرلىك سايىستار مەن تاكتيكالىق تاپسىرمالار ارقىلى ءبىلىمىن، كۇش-جىگەرىن، توزىمدىلىگىن جانە جەڭىسكە دەگەن تالپىنىسىن تانىتادى. بيىل ءداستۇر مەن زاماناۋي تەحنولوگيانى ۇشتاستىرۋعا ەرەكشە نازار اۋدارىلدى. باعدارلاماعا العاش رەت ۇلتتىق سپورت تۇرلەرى مەن تسيفرلىق پاندەر ەنگىزىلدى.

اسكەري-پاتريوتتىق ويىندار اياسىندا وقۋ-جاتتىعۋ ورتالىعىنىڭ اۋماعىندا ۇلى جەڭىستىڭ 80 جىلدىعىنا ارنالعان كورمە ۇيىمداستىرىلدى. بۇل قادام مايدانگەرلەردىڭ ەرەن ەرلىگىن جاستار قاۋىمىنىڭ ەسىنە سالىپ، ۇرپاق ساباقتاستىعىنىڭ تاعى ءبىر ماڭىزدى سيمۆولىنا اينالدى.

«AMANAT» پارتياسىنىڭ ءباسپاسوز قىزمەتى

Abai.kz