استانادا «ادىلەت» پارتياسىنىڭ II سەزى ءوتىپ، وندا پارتيا قىزمەتىن جەتىلدىرۋ، وڭىرلەردەگى فيليالدار جەلىسىن كەڭەيتۋ، ۇيىمدىق الەۋەتتى كۇشەيتۋ جانە ەلدىڭ وركەندەۋى جولىنداعى ورتاق ماقساتتارعا ساياسي كۇشتەردىڭ باسىن بىرىكتىرۋ ماسەلەلەرى تالقىلاندى.

سەزد قارساڭىندا وتكەن ستراتەگيالىق سەسسيا بارىسىندا دەلەگاتتار پارتيانىڭ الداعى كەزەڭدەگى قىزمەتىنىڭ نەگىزگى باسىمدىقتارىن ايقىندادى.

سەزد بارىسىندا ءسوز العان پارتيا توراعاسى ايبەك دادەباي قازاقستاننىڭ جاڭا دامۋ بەلەسىنە قادام باسقانىن اتاپ ءوتتى. ونىڭ ايتۋىنشا، قازىرگى جاعدايدا ساياسي ۇيىمداردان رەفورمالاردى قولداۋمەن شەكتەلمەي، حالىقپەن تۇراقتى ءارى مازمۇندى بايلانىس ورناتىپ، ازاماتتاردىڭ وزەكتى ماسەلەلەرى مەن سۇرانىستارىنا ناقتى شەشىم ۇسىنۋ تالاپ ەتىلەدى.

ءىس-شاراعا قۇرىلىس، دەنساۋلىق ساقتاۋ، ءبىلىم بەرۋ، كولىك، تەلەكوممۋنيكاتسيا، تۋريزم، كاسىپكەرلىك، ەنەرگەتيكا، تسيفرلىق تەحنولوگيالار جانە مۇناي-سەرۆيس سالالارىنداعى ءىرى بىرلەستىكتەردىڭ، كاسىبي قاۋىمداستىقتار مەن ساراپشىلىق ۇيىمداردىڭ باسشىلارى قاتىستى.

ولاردىڭ بىرقاتارى «ادىلەت» پارتياسىنىڭ قاتارىنا قوسىلىپ، بۇگىندە ۇيىمنىڭ ينستيتۋتسيونالدىق الەۋەتىن ارتتىرۋعا جانە پارتيا باعدارلاماسىندا بەلگىلەنگەن مىندەتتەردى جۇزەگە اسىرۋعا ۇلەس قوسىپ كەلەدى. اتاپ ايتقاندا، ولاردىڭ قاتارىندا «PARYZ» جۇمىس بەرۋشىلەردىڭ ۇلتتىق كونفەدەراتسياسى، قازاقستاننىڭ ازاماتتىق اليانسى، قازاقستاننىڭ مۇناي سەرۆيستىك كومپانيالار وداعى، قازاقستان ينۆەستورلارى قاۋىمداستىعى، قازاقستان بايلانىس وپەراتورلارى قاۋىمداستىعى، قازاقستان اۆتوموبيل وداعى جانە وزگە دە ۇيىمدار بار.

سەزد بارىسىندا «ادىلەت» پارتياسىنىڭ توراعاسى ايبەك دادەباي AMANAT پارتياسىنا قاتىستى پىكىر ءبىلدىرىپ، ەكى ساياسي ۇيىمدى ءبىر-بىرىنە قارسى قويۋدىڭ ورىنسىز ەكەنىن ايتتى.

ونىڭ سوزىنشە، AMANAT پارتياسىنىڭ وكىلدەرى مەن مۇشەلەرى ەلدىڭ قوعامدىق-ساياسي ومىرىنە ۇزاق جىلدار بويى بەلسەندى ارالاسىپ، وڭىرلەردە اۋقىمدى جۇمىس اتقارۋ ارقىلى ەلەۋلى ساياسي جانە ۇيىمداستىرۋشىلىق تاجىريبە جيناقتاعان. بۇل تاجىريبە ەندى ورتاق ۇلتتىق ماقساتتارعا قىزمەت ەتەتىن ماڭىزدى رەسۋرسقا اينالماق.

ايبەك دادەبايدىڭ ايتۋىنشا، ەكى پارتيانى مىقتى مەملەكەتتىك ينستيتۋتتاردى قالىپتاستىرۋ، ءتيىمدى مەملەكەتتىك باسقارۋ جۇيەسىن ورنىقتىرۋ، باسەكەگە قابىلەتتى ەكونوميكانى دامىتۋ، الەۋمەتتىك ادىلەتتىلىكتى قامتاماسىز ەتۋ جانە زاماناۋي ساياسي مادەنيەتتى نىعايتۋ سەكىلدى ورتاق قۇندىلىقتار بىرىكتىرەدى. ونىڭ پىكىرىنشە، AMANAT پارتياسىنىڭ «ادىلەت» پارتياسىنا قوسىلۋى – تار پارتيالىق مۇددەدەن جوعارى تۇرعان، ۇلتتىق جاۋاپكەرشىلىككە نەگىزدەلگەن بايىپتى قادام.

سونداي-اق ول AMANAT پارتياسىنىڭ قىزمەتىنە باعا بەرۋدە بىرجاقتى كوزقاراستان اۋلاق بولۋ كەرەكتىگىن اتاپ ءوتتى.

– AMANAT پارتياسى ءوز قىزمەتى بارىسىندا حالىقتىڭ تالاپ-تىلەگى مەن مۇڭ-مۇقتاجىن بيلىككە جەتكىزۋ ءۇشىن بار كۇش-جىگەرىن جۇمسادى. سوندىقتان بۇگىن ولاردىڭ نەنى دۇرىس، نەنى بۇرىس ىستەگەنىن تارازىلاپ، ايىرماشىلىق ىزدەۋ ورىنسىز. قازىر ەڭ ماڭىزدىسى – ورتاق ماقسات جولىندا كۇش بىرىكتىرۋ، – دەدى پارتيا توراعاسى.

Abai.kz