بۇگىن – 11 مامىر، مامىر ايىنىڭ ەكىنشى جەكسەنبىسى، ەلىمىزدە ەڭ مەيىرىمگە تولى، ەڭ جۇرەككە جاقىن مەرەكەلەردىڭ ءبىرى — انالار كۇنى اتالىپ وتۋدە. وسىعان وراي الماتى قالاسىنىڭ جاستارى «اناعا تاعزىم – اناعا قۇرمەت» اتتى ونلاين-چەللەندجدى باستاپ، الەۋمەتتىك جەلىلەردە شىنايى العىس پەن ىستىق ىقىلاستارىن ءبىلدىرىپ جاتىر. 

اتالعان چەللەندج انانىڭ مەيىرىمى مەن ماحابباتىنا، ءتوزىمى مەن دانالىعىنا دەگەن العىستىڭ كورىنىسىنە اينالدى. قاتىسۋشىلار قىسقا Reels/TikTok ۆيدەولاردى، ارحيۆتىك فوتوسۋرەتتەر مەن ستوريستەردى جاريالاپ، اناسىنىڭ ءومىر جولىنداعى ءرولىن، قيىن ساتتەردە دەمەۋ بولعانىن، ومىرلىك باعىت سىلتەگەنىن ەسكە الۋدا. كوپشىلىك انادان العان ءتالىم-تاربيەنىڭ – ءوزىن-ءوزى دامىتۋ، وزگەگە كومەكتەسۋ، مويىماۋ سەكىلدى قۇندىلىقتاردىڭ – بۇگىنگى ومىرىنە ۇلكەن اسەر ەتكەنىن اتاپ وتۋدە. 

پوستتار #AlgysAnama #SpasiboMame #AnagaQurmet #دەنماتەري مىناداي حەشتەگتەرمەن جاريالانىپ,
بۇل ورتاق حەشتەگتەر انالارعا ارنالعان مىڭداعان جۇرەكجاردى جازبالاردى ءبىر ارناعا توعىستىرىپ وتىر. 

چەللەندجگە بەلگىلى بلوگەرلەر، ارتىستەر، سپورتشىلار مەن قوعام قايراتكەرلەرى بەلسەنە قاتىسىپ، اكتسيانىڭ ءمان-ماڭىزىن ارتتىردى. ولار جاستاردى انالاردى تەك ءبىر كۇندە عانا ەمەس، كۇن سايىن قادىرلەۋگە، قۇرمەت كورسەتۋگە شاقىردى. 

«انام – مەنىڭ ىشكى باعدارشامىم. قيىن ساتتەردە ايتقان سوزدەرى ءالى كۇنگە دەيىن سانامدا جاڭعىرىپ تۇرادى. بۇگىنگى جەتىستىكتەرىم – سونىڭ ناتيجەسى»، – دەيدى چەللەندجگە قاتىسۋشى جاس كاسىپكەر نۇربەك سەريكباەۆ.

«اناعا تاعزىم – اناعا قۇرمەت» — جاي عانا ونلاين-اكتسيا ەمەس. بۇل – ۇرپاقتار اراسىن جالعايتىن، قوعامنىڭ رۋحاني ىرگەتاسىن قالىپتاستىراتىن شىنايى باستاما. جىلدام وزگەرىپ جاتقان تسيفرلىق زاماندا وسىنداي جۇرەكتەن شىققان شارالار ادامدى ءوز ءتۇپ-تامىرىنا، ادامي قۇندىلىقتارعا قايتا بەت بۇرعىزادى. 

«وقۋعا تۇسە الماي، بار ءۇمىتىم ءۇزىلىپ، ومىرگە رەنجىپ جۇرگەندە، انام: «سەنىڭ كەزەگىڭ كەلەدى» دەپ سەنىم سىيلادى. قازىر مەن گرانتپەن وقىپ ءجۇرمىن جانە سول كەزدە ايتقان انامنىڭ سوزدەرىنىڭ قانداي ماڭىزدى بولعانىن ءتۇسىندىم»، – دەيدى ستۋدەنت ارۋجان كاناپيانوۆا.

الماتى جاستارى وسى ەرەكشە كۇنى اناڭىزعا دەگەن العىسىڭىزدى ءبىلدىرىپ، جۇرەكجاردى ەستەلىكتەرىڭىزبەن ءبولىسىپ، چەللەندجگە قوسىلۋعا شاقىرادى. 

Abai.kz