الماتى قالاسىندا الەمدىك كينويندۋستريانىڭ جارىق جۇلدىزى، داڭقتى اكتەر دجەكي چاننىڭ قاتىسۋىمەن «دوسپەحي بوگا: ۋلتيماتۋم» («Armour of God: Ultimatum») اتتى اۋقىمدى حالىقارالىق كوركەم ءفيلمىنىڭ ءتۇسىرىلىم جۇمىستارى رەسمي تۇردە باستاۋ الدى. بۇل وقيعا وتاندىق كينەماتوگرافيا تاريحىنداعى ەلەۋلى كەزەڭدەردىڭ ءبىرى رەتىندە باعالانىپ وتىر.

سالتاناتتى ءىس-شاراعا قر پرەمەر-ءمينيسترىنىڭ ورىنباسارى – مادەنيەت جانە اقپارات ءمينيسترى ايدا بالاەۆا، الماتى قالاسى مەن الماتى وبلىسىنىڭ باسشىلىعى، سونداي-اق قازاقستاندىق جانە شەتەلدىك كينو سالاسىنىڭ كاسىپقوي ماماندارى قاتىستى. مادەنيەت جانە اقپارات ءمينيسترى ءوز سوزىندە دجەكي چاننىڭ قازاقستان مەن قىتاي اراسىنداعى مادەني-گۋمانيتارلىق كوپىردى نىعايتۋداعى ەڭبەگىن ەرەكشە اتاپ ءوتتى. ايدا بالاەۆا حانىم ءوز سوزىندە: «قازاقستاننىڭ مادەني قۇندىلىقتارىن الەمدىك دەڭگەيدە تانىتۋعا جانە ەكى ەل اراسىنداعى دوستىق بايلانىستى نىعايتۋعا قوسىپ وتىرعان ولشەۋسىز ۇلەسىڭىز ءۇشىن ريزاشىلىق بىلدىرەمىن. الداعى ءتۇسىرىلىم پروتسەسىنىڭ تابىستى وتۋىنە جانە شىعارماشىلىق جاڭا بەلەستەردى باعىندىرۋىڭىزعا تىلەكتەسپىن»، – دەپ اتاپ ءوتتى.

كەزدەسۋ اياسىندا دجەكي چان ت. جۇرگەنوۆ اتىنداعى قازاق ۇلتتىق ونەر اكادەمياسىنىڭ تۇلەكتەرى جانە جاس سۋرەتشىلەرمەن ارنايى جۇزدەسىپ، ەركىن پىكىر الماستى. اكتەر جاستارعا ونەر جولىنداعى قيىندىقتارعا مويىماي، ۇزدىكسىز ىزدەنىستىڭ جانە ءوز ىسىنە دەگەن شەكسىز ماحابباتتىڭ ماڭىزدىلىعىن ايتتى. جاستار ءوز كەزەگىندە الەمگە تانىمال ونەر يەسىنە قۇرمەت كورسەتىپ، وزدەرى سالعان پورترەتتەردى سىيعا تارتتى. ءىس-شارا سوڭىندا بارلىق قاتىسۋشى ءداستۇرلى كينو تۇسىرىلىمىندە قولدانىلاتىن «حلوپۋشكا» تاقتايشاسىمەن ەستەلىك سۋرەتكە ءتۇسىپ، جوبانىڭ ءساتتى باستالۋىن ايشىقتادى.

اتالعان جوبا قر مادەنيەت جانە اقپارات مينيسترلىگى مەن قىتايدىڭ ءىرى «China Film Group Corporation» مەملەكەتتىك كينوكومپانياسىنىڭ قولداۋىمەن جۇزەگە اسىرىلىپ جاتىر. ءفيلمنىڭ وندىرىستىك جۇمىستارىنا وتاندىق «ءSاlem Entertainment» كومپانياسى مەن گونكونگتىق «Billion Target» كومپانياسى اتسالىسۋدا.

ءتۇسىرىلىم جۇمىستارى 2026 جىلدىڭ شىلدەسى مەن قازان ايى ارالىعىندا ەلىمىزدىڭ تابيعاتى كوركەم ايماقتارىندا جۇرگىزىلەدى. كارتينانىڭ قويۋشى رەجيسسەرى – تالانتتى قازاقستاندىق مامان روبەرت كۋن. ءفيلمنىڭ باستى ءتۇسىرىلىم الاڭدارى الماتى قالاسى، الماتى جانە ماڭعىستاۋ وبلىستارىنىڭ ەڭ ادەمى لوكاتسيالارىنا ورنالاستىرىلادى.

بۇل تۋىندى قازاقستان ءۇشىن تەك مادەني عانا ەمەس، ستراتەگيالىق تۇرعىدان دا اسا ماڭىزدى. جوبانىڭ جۇزەگە اسىرىلۋى ەلىمىزدىڭ ينۆەستيتسيالىق الەۋەتىن ارتتىرىپ، ءتۋريزمدى دامىتۋعا، سونىمەن قاتار قازاقستاندى الەمدىك دەڭگەيدەگى ءىرى كينوجوبالاردى تۇسىرۋگە بەيىمدەلگەن، ينفراقۇرىلىمى دامىعان زاماناۋي الاڭ رەتىندە تانىتۋعا زور ىقپال ەتەدى. حالىقارالىق پروكاتقا باعىتتالعان بۇل فيلم وتاندىق كينويندۋستريانىڭ دامۋىنا تىڭ سەرپىن بەرەرى ءسوزسىز.

Abai.kz