جىل باسىنان بەرى ەلىمىزدە اليمەنت تولەمەگەنى ءۇشىن 126 قىلمىستىق ءىس قوزعالدى. بۇل تۋرالى ورتالىق كوممۋنيكاتسيالار قىزمەتىندەگى بريفينگتە ادىلەت مينيسترلىگى مىندەتتى اتقارۋ كوميتەتىنىڭ توراعاسى ماحسات بالابەكوۆ ايتتى.

«الەۋمەتتىك ماڭىزدى ساناتتاردىڭ ءبىرى سانالاتىن اليمەنت ءوندىرىپ الۋ بويىنشا ورىنداۋ ءۇشىن 285 مىڭ قۇجات تىركەلگەن. ولاردىڭ ىشىندە 278 مىڭعا جۋىق قۇجات مەرزىمىندە ءوندىرىپ الىنىپ جاتىر. ياعني، اليمەنت بورىشكەردىڭ جۇمىس ورنىنان اي سايىنعى جالاقىسىنان ۇستالادى. 2025 جىلى اليمەنت بويىنشا ءوندىرىپ الىنعان بەرەشەك سوماسى 1,6 ملرد تەڭگەدەن اسادى. ال، پروبلەمالىق اليمەنتتەر سانى 15 مىڭدى قۇرايدى. ولار بويىنشا بەرەشەكتىڭ مولشەرى شامامەن 19 ملرد تەڭگەگە جەتەدى. بۇل قۇجاتتار بويىنشا بورىشكەرلەر تولەم جۇرگىزبەيدى»، - دەدى ول.

ونىڭ ايتۋىنشا اتالعان بورىشكەرلەرگە قاتىستى اتقارۋشىلىق قۇجاتتىڭ ورىندالۋىن قامتاماسىز ەتەتىن ماجبۇرلەپ ورىنداتۋ شارالارى قولدانىلادى.

«اتاپ ايتقاندا، سوت ورىنداۋشىلارى ىشكى ىستەر ورگاندارىمەن بىرلەسە وتىرىپ، بورىشكەرلەردىڭ اۆتوكولىكتەرىن ارنايى ايىپپۇل تۇراعىنا قاماۋ بويىنشا رەيدتىك ءىس-شارالار جۇرگىزەدى. ودان كەيىن بەرەشەكتى ءوندىرىپ الۋ ءۇشىن مۇلىك ساتىلادى. قازىرگى تاڭدا جەكە سوت ورىنداۋشىلارى بورىشكەردىڭ تابىسىن قاساقانا جاسىرۋىنىڭ الدىن الۋ ءۇشىن ولاردىڭ ەلەكتروندىق اقشالارى مەن جاسىرىن كىرىستەرىن انىقتاۋعا باعىتتالعان جۇمىستار جۇرگىزۋدە»، - دەدى كوميتەت باسشىسى.

ماحسات بالابەكوۆ بورىشكەرلەرگە قاتىستى قولدانىلاتىن شارالاردىڭ ەڭ سوڭعىسى اكىمشىلىك جانە قىلمىستىق جاۋاپكەرشىلىككە تارتۋ ەكەنىن اتاپ ءوتتى.

- 2025 جىلى 1 596 بورىشكەر اكىمشىلىك جاۋاپكەرشىلىككە، قىلمىستىق كودەكستىڭ 139-بابى بويىنشا 123 بورىشكەر، 430-بابى بويىنشا 3 بورىشكەر قىلمىستىق جاۋاپكەرشىلىككە تارتىلدى، - دەدى ول.

Abai.kz