دوستىق ۇيىندە قالانى دامىتۋعا ارنالعان باس جوسپار جوباسىنا تۇزەتۋلەر ەنگىزۋ بويىنشا قوعامدىق تىڭداۋلار ءوتتى. قاتىسۋشىلاردىڭ باستى نازارىندا قاراعاندىنىڭ بولاشاق ەكولوگيالىق احۋالى تۇردى.

تىڭداۋلاردى قالالىق اكىمدىك ۇيىمداستىردى. ءىس-شاراعا شامامەن 200 قالا تۇرعىنى، مەملەكەتتىك ورگانداردىڭ وكىلدەرى، جوبانى ازىرلەۋشىلەر مەن ساراپشىلار قاتىستى.

سۋرەت: قاراعاندى وبلىسى اكىمدىگىنىڭ ءباسپاسوز قىزمەتىنەن الىندى.

اكىمدىك تاراپىنان تىڭداۋعا قاراعاندى قالاسىنىڭ اكىمى مەيرام كوجۋحوۆ جانە جەر قاتىناستارى، ساۋلەت جانە قالا قۇرىلىسى ماسەلەلەرى بويىنشا ورىنباسارى قايرات قامزين قاتىستى. جوبانى «بيوسفەرا قازاقستان» كومپانياسى ۇسىندى، ازىرلەۋشىنىڭ وكىلى – ۆالەنتين جيركوۆ.

باسىمدىقتار: ەكولوگيا جانە جايلى ءومىر ءسۇرۋ

اكىم ورىنباسارى قايرات كامزيننىڭ ايتۋىنشا، جاڭارتىلعان باس جوسپار جۇيەلى سيپاتقا يە. وندا جاڭا ءوسۋ نۇكتەلەرى انىقتالىپ، رەكرەاتسيالىق اۋماقتار كەڭەيتىلگەن، كولىك ينفراقۇرىلىمىن جاڭعىرتۋ قاراستىرىلعان.

سۋرەت: قاراعاندى وبلىسى اكىمدىگىنىڭ ءباسپاسوز قىزمەتىنەن الىندى.

ونىڭ ايتۋىنشا، تۇرعىنداردىڭ ءومىر ءسۇرۋ ساپاسىن ارتتىرۋ مەن ەكولوگيالىق تۇراقتىلىق – باستى باسىمدىقتار.

وسى ماقساتتا قالادا زاماناۋي تازارتۋ تەحنولوگيالارىن ەنگىزۋ، جاسىل ايماقتاردى كوبەيتۋ جانە قالدىقتاردى باسقارۋ جۇيەسىن دامىتۋ جوسپارلانۋدا. جوباعا سونداي-اق شۋدى ازايتۋ مەن قورشاعان ورتانىڭ لاستانۋىن باقىلاۋ شارالارى ەنگىزىلگەن.

سۋرەت: قاراعاندى وبلىسى اكىمدىگىنىڭ ءباسپاسوز قىزمەتىنەن الىندى.

اۋماقتى دامىتۋ جانە ەكولوگيا

ۆالەنتين جيركوۆتىڭ ايتۋىنشا، اۋماقتى دامىتۋدىڭ نەگىزگى باعىتى وڭتۇستىك-شىعىس، مايقۇدىق جانە پريشاحتينسك اۋداندارىنا قاراي ىعىسادى. جوبا اياسىندا جەو-3 الاڭىندا جاڭا قازاندىق سالۋ جانە جەو-1-دە ەكولوگيالىق جاعىنان تيىمدىرەك قازاندىقتاردى ورناتا وتىرىپ، قايتا جاڭعىرتۋ كوزدەلگەن. بۇل زياندى زاتتاردىڭ اتموسفەراعا تارالۋىن ازايتۋعا مۇمكىندىك بەرەدى.
گازداندىرۋ جۇمىستارى دا اۋقىمدى تۇردە جالعاسادى – نەگىزىنەن جەكە تۇرعىن ءۇي سەكتورى بويىنشا 28 مىڭنان استام جاڭا ابونەنت گازعا قوسىلادى.

كولىك ينفراقۇرىلىمىن دامىتۋ

باس جوسپارداعى ماڭىزدى باعىتتاردىڭ ءبىرى – كولىك ينفراقۇرىلىمىن دامىتۋ. جوبادا كەلەسى باستامالار قامتىلعان:

* كوشە-جول جەلىسىن جانە قوعامدىق كولىك جۇيەسىن كەڭەيتۋ;
* «CargoHUB Karaganda» مۋلتيمودالدى لوگيستيكالىق ورتالىعى اياسىندا «سارى-ارقا» اۋەجايىن دامىتۋ;
* جىلدامدىقتى جەرۇستى كولىگىن ەنگىزۋ جانە قالا ماڭى – قالاارالىق تەمىرجول جەلىسىن قۇرۋ;
* اينالما جولدىڭ جاڭا باتىس بولىگىن سالۋ;
* ۆەلوسيپەد جولدارىنىڭ جەلىسىن دامىتۋ جانە ولاردىڭ ءوزارا بايلانىسىن قامتاماسىز ەتۋ.

سۋرەت: قاراعاندى وبلىسى اكىمدىگىنىڭ ءباسپاسوز قىزمەتىنەن الىندى.

سۋمەن جابدىقتاۋ جانە قالدىقتاردى باسقارۋ

باس جوسپارعا سايكەس، پريشاحتينسك، مايقۇدىق جانە سورتيروۆكا شاعىن اۋداندارىندا جەرگىلىكتى كارىز تازارتۋ قۇرىلىستارى سالىنادى. بۇل قۇبىر جەلىلەرىنىڭ توزۋىن ازايتىپ، سۋمەن جابدىقتاۋ جۇيەسىن ورتالىقتان تىس ءارى اپاتتارعا ءتوزىمدى ەتۋگە باعىتتالعان. سونداي-اق تازارتىلعان اعىن سۋلاردى قايتا پايدالانۋ قاراستىرىلعان.
2055 جىلعا قاراي قتق كولەمى 267 مىڭ توننادان 385 مىڭ تونناعا دەيىن ارتادى دەپ بولجانۋدا. وسىعان بايلانىستى باس جوسپاردا جاڭا قوقىس پوليگونىن، قالدىقتاردى جاعاتىن زاۋىت سالۋ جانە سۇرىپتاۋ قۋاتتارىن ۇلعايتۋ كوزدەلگەن.

سۋرەت: قاراعاندى وبلىسى اكىمدىگىنىڭ ءباسپاسوز قىزمەتىنەن الىندى.

لاستانۋدى باقىلاۋ جانە مونيتورينگ

باس جوسپار قورشاعان ورتانىڭ جاي-كۇيىن باقىلاۋعا باعىتتالعان شارالاردى دا قامتيدى. اتاپ ايتقاندا، «سارى-ارقا» اەا اۋماعى مەن وندىرىستىك ايماقتاردا «قازگيدرومەت» جاڭا باقىلاۋ بەكەتتەرىن ورناتادى. سۋ ساپاسىن ناقتى ۋاقىت رەجيمىندە باقىلاۋعا ارنالعان گيدروبەكەتتەر ورناتىلادى. تۇرعىن اۋداندارداعى شۋ دەڭگەيى مەملەكەتتىك ورگاندارمەن جىلىنا كەمىندە ءبىر رەت ولشەنىپ وتىرادى.
سونىمەن قاتار، قر ەكولوگيالىق كودەكسىنىڭ 78-بابىنا سايكەس، جوبادان كەيىنگى قورشاعان ورتاعا اسەردى باعالاۋ تالداۋى مىندەتتى تۇردە جۇرگىزىلەدى.

سۋرەت: قاراعاندى وبلىسى اكىمدىگىنىڭ ءباسپاسوز قىزمەتىنەن الىندى.

تىڭداۋلاردىڭ قورىتىندىسى

ءىس-شارا سوڭىندا قاتىسۋشىلاردىڭ باسىم بولىگى باس جوسپارعا ەنگىزىلگەن تۇزەتۋلەر جوباسىن قولدادى. قايرات قامزين بارلىق كونسترۋكتيۆتى ۇسىنىستاردىڭ ەسكەرىلەتىنىن ايتتى. قوعامدىق تىڭداۋلار اياقتالىپ، قاراعاندىنىڭ ەكولوگياعا نەگىزدەلگەن تۇراقتى دامۋىنا قاراي تاعى ءبىر قادام جاسالدى.

Abai.kz