استانادا قازاقستاننىڭ اۋىلدىق وڭىرلەرىن دامىتۋعا باعىتتالعان ساياسي كۇش – «اۋىل» پارتياسىنىڭ قۇرىلعانىنا 25 جىل تولۋىنا وراي «اۋىل» پارتياسى: 25 جىل بەلەسى» اتتى عىلىمي-پراكتيكالىق كونفەرەنتسيا ۇيىمداستىرىلدى. بۇل ماڭىزدى شارا اۋىل ماسەلەلەرىنە ارنالعان كەڭ اۋقىمدى پىكىر الماسۋ الاڭىنا اينالىپ، پارتيانىڭ بۇگىنگى ورنى مەن بولاشاققا جوسپارلارىن تالقىلاۋعا مۇمكىندىك بەردى.

كونفەرەنتسيا باعدارلاماسى «اۋىل – ەل بولاشاعى» اتتى دەرەكتى ءفيلمنىڭ كورسەتىلىمىمەن اشىلدى. فيلمدە پارتيانىڭ قۇرىلۋ كەزەڭىنەن باستاپ بۇگىنگى كۇنگە دەيىنگى دامۋى، اۋىل شارۋاشىلىعىن قولداۋ باعىتىنداعى باستامالارى، ەل ومىرىندەگى ماڭىزى كەڭىنەن باياندالدى. بۇل كورىنىس قاتىسۋشىلارعا «اۋىل» پارتياسىنىڭ قازاقستاننىڭ الەۋمەتتىك-ەكونوميكالىق دامۋىنا قوسقان ۇلەسىن ايقىن تۇسىنۋگە سەپتىگىن تيگىزدى.

سونىمەن قاتار، كونفەرەنتسيا اياسىندا «اۋىل ناقىشتارى» اتتى شىعارماشىلىق بايقاۋدىڭ ۇزدىك تۋىندىلارى كورمەگە قويىلدى. بۇل بايقاۋ اۋىلدىڭ رۋحاني مادەنيەتىن، ۇلتتىق داستۇرلەر مەن زاماناۋي شىعارماشىلىق ەلەمەنتتەرىن ۇشتاستىرا وتىرىپ، اۋىل ءومىرىنىڭ سان قىرىن اشۋعا باعىتتالدى. كورمەگە قويىلعان جۇمىستار اۋىل تۇرعىندارىنىڭ ءومىرى مەن تۇرمىسىن كوركەم بەينەلەپ، ولاردىڭ مۇددەلەرىن قولداۋعا دەگەن پارتيانىڭ ىقىلاسىن كورسەتتى.

كونفەرەنتسيانى ءماجىلىس دەپۋتاتى، پارتيا توراعاسى سەرىك ەگىزباەۆ اشىپ، «اۋىل» پارتياسىنىڭ تاريحى مەن نەگىزگى باعىتتارىنا توقتالدى. ول اتاپ وتكەندەي، شيرەك عاسىرلىق تاريحىندا پارتيا ءوز ساياسي جانە يدەولوگيالىق ۇستانىمدارىنان ەشقاشان تايماي، اۋىلدىق وڭىرلەر مەن اۋىل شارۋاشىلىعى ماسەلەلەرىن ۇنەمى كوتەرىپ كەلەدى.

«ءبىزدىڭ باستى مىندەتىمىز – حالىقتىڭ سەنىمىن اقتاۋ. ءبىز اۋىل تۇرعىندارىنىڭ الەۋمەتتىك جاعدايىن جاقسارتۋعا، اۋىل شارۋاشىلىعىن دامىتۋعا ناقتى شەشىمدەر ۇسىنۋمەن اينالىسامىز. پارتيانىڭ جۇمىسى ەلىمىزدىڭ اۋىلدىق ايماقتارىن وركەندەتۋگە باعىتتالعان جانە بۇل باعىتتا ءبىز ءوز مىندەتىمىزدى ابىرويمەن ورىنداپ كەلەمىز»، – دەدى سەرىك ەگىزباەۆ.

ايتا كەتۋ كەرەك، «اۋىل» پارتياسىنىڭ اباي وبلىسى بويىنشا وڭىرلىك فيليالىنىڭ توراعاسى – سماعۇلوۆ قايرات قاناتۇلى دا كونفەرەنتسياعا قاتىسىپ، وڭىردەگى اۋىلدى دامىتۋ باعىتىنداعى جۇمىستىڭ ماڭىزدىلىعىن اتاپ ءوتتى. ول اباي وبلىسىنداعى اۋىل شارۋاشىلىعىن قولداۋ جانە اۋىل تۇرعىندارىنىڭ ءومىر ساپاسىن ارتتىرۋ ماسەلەلەرىنە ەرەكشە كوڭىل ءبولىنىپ جاتقانىن جەتكىزدى.

سونىمەن قاتار، كونفەرەنتسياعا «اۋىل» پارتياسىنىڭ باسقا دا مۇشەلەرى بەلسەندى قاتىسىپ، پارتيانىڭ ماقسات-مىندەتتەرى مەن اۋىلدى دامىتۋداعى وزەكتى ماسەلەلەردى تالقىلاۋعا ات سالىستى. بۇل – پارتيا مۇشەلەرىنىڭ ەلدىڭ الەۋمەتتىك-ەكونوميكالىق دامۋىنا، اسىرەسە اۋىلدىق جەرلەردىڭ وركەندەۋىنە دەگەن زور جاۋاپكەرشىلىگىن كورسەتەدى.

«اباي وبلىسى – اۋىل شارۋاشىلىعى مەن اۋىل مادەنيەتى ءۇشىن ماڭىزدى ايماق. ءبىز «اۋىل» پارتياسى رەتىندە جەرگىلىكتى دەڭگەيدە دە حالىقتىڭ سەنىمىن اقتاپ، اۋىلدىڭ وركەندەۋىنە بارىمىزدى سالامىز»، – دەدى سماعۇلوۆ قايرات قاناتۇلى.

«اۋىل» پارتياسىنىڭ 25 جىلدىق مەرەيتويى – بۇل اۋىل مەن اۋىل تۇرعىندارى ءۇشىن ادال قىزمەت پەن سەنىمدىلىكتىڭ بەلگىسى. الداعى جىلداردا دا پارتيا اۋىلدى دامىتۋ، ونىڭ تۇرعىندارىنىڭ تۇرمىسىن جاقسارتۋ باعىتىنداعى جۇمىسىن جالعاستىرا بەرمەك.

«اۋىل» پارتياسى اباي وبلىسى بويىنشا وڭىرلىك فيليالى

Abai.kz