ءبىر كۇنى كەشكى استا قىزىم ەكى كۇننەن كەيىن كلاۋديا ەسىمدى دوسىمەن بىرگە ويناعىسى كەلەتىنىن，بىراق ول ءۇشىن اتا-انالار الدىن الا حابارلاسىپ،كەلىسۋى كەرەك ەكەنىن ايتتى.

بىرنەشە ساعاتتان كەيىن كلاۋديانىڭ اكەسى تەلەفون شالدى. ەسىمى جاك ەكەن. تەلەفوننىڭ ار جاعىنداعى داۋىس وتە سىپايى ەستىلىپ جاتتى. «ءسىزدى مازالاعانىما كەشىرىم وتىنەمىن. ءلايلا مەن كلاۋديا بىرگە ويناۋعا كەلىسىپتى. قىزىمىز ۇنەمى ءوتىنىش ايتا بەرگەن سوڭ，ونىڭ دوسىنىڭ اتا-اناسى كىم ەكەن دەپ سىزگە حابارلاسىپ تۇرمىن. ءبىز قىزىمىزدى شەشەسى ەكەۋىمىز بىرگە ەرتىپ شىعىپ，بىرگە الىپ قايتامىز. بالالارىمىزدى ويناتۋ ءۇشىن ارنايى ۋاقىت جوسپارلاپ，بىرگە بولامىز» دەمەسى بار ما？

ءسويتىپ ەكى وتباسى ارليڭتون قالاسىنداعى Ashlawn مەكتەبىنىڭ الدىنداعى ساياباقتا كەزدەستىك. بالالارىمىزدى جاپ-جاسىل ساياباقتاعى ويناۋ الاڭىنا ەمىن-ەركىن جىبەردىك. ال اتا-انالار ءبىر-بىرىمىزبەن تانىسىپ，اڭگىمە تيەگىن اعىتتىق. جاكتىڭ ءوزى يتاليادان ەكەن，ايەلى ماريا چەحيا تۋماسى بولىپ شىقتى. بالالارىنىڭ كوپ ۋاقىتى كىتاپ وقۋمەن جانە تابيعات اياسىندا سەيىلدەۋمەن وتەتىنىن ايتتى.

ولارمەن سويلەسە كەلە مەن امەريكالىق اتا-انالاردىڭ بالالارىن قورعاۋ ءۇشىن بارىن سالاتىنىن ءتۇسىندىم.

ول ەلدە ءار اتا-انا بالانىڭ قاۋىپسىزدىگى مەن قۇقىعىن قورعاۋعا زاڭ جۇزىندە مىندەتتى. ەگەر اتا-انا:

• بالاسىن قاراۋسىز قالدىرسا،
• زورلىق-زومبىلىق كورسەتسە نەمەسە
• نەگىزگى قاجەتتىلىكتەرىن قامتاماسىز ەتپەسە وندا بۇل مەملەكەت تاراپىنان تەكسەرىلىپ، كەي جاعدايدا اتا-انالىق قۇقىقتان ايىرۋعا دەيىن بارادى. بۇل – اقش-تا بالانىڭ قۇقىعى اتا-انادان دا جوعارى سانالادى دەگەن ۇستانىمنىڭ ءبىر كورىنىسى ەكەن.

جاك پەن ماريا بىزبەن سويلەسكەن 1 جارىم ساعات ىشىندە كەشىرىڭىز دەگەن ءسوزدى شامامەن 40 رەت ايتتى. سويتسەك，بۇل ولاردىڭ ومىرىنە，تاعدىرىنا ەنىپ كەتكەن ءسوز ەكەن.

جۋرناليست بولعان سوڭ با ايتەۋ تىنىش تۇرماي ولارعا سۇراق قويا باستادىم. اۋەلگى سۇراعىم اتا-انالاردىڭ بەلسەندىلىگى حاقىندا بولدى. جاۋابى مىناداي:"امەريكالىق اتا-انالار بالانىڭ مەكتەبىندەگى ءىس-شارالارعا (اتا-انالار جينالىسى، ەرىكتى كومەك، سپورتتىق جارىستار) بەلسەندى قاتىسادى. ءۇي تاپسىرماسىن ورىنداۋعا، وقۋ پروتسەسىنە كوڭىل بولۋگە كومەكتەسەدى. بالانىڭ ءحوببيىن دامىتۋعا ء(ان، مۋزىكا، سپورت، ونەر) جاعداي جاساۋعا تىرىسادى.

سونىمەن بىرگە，امەريكالىقتار ءۇشىن بالاعا «سەن جاقسىسىڭ»، «سەن ىستەي الاسىڭ» دەپ ءجيى قولداۋ كورسەتۋ — تاربيەنىڭ ماڭىزدى بولىگى. بۇل ولاردىڭ ەموتسيالىق ينتەللەكتىنى دامىتۋعا باعىتتالعانىن كورسەتەدى.

جوسپارلاعان 2 ساعات لەزدە وتە شىقتى. جاك پەن ماريا بىزبەن，كلاۋديا ءلايلا قىزىمىزبەن قوشتاستى. سول ەكى ساعات ىشىندە ءبىز اتا-انانىڭ بالا الدىنداعى جاۋاپكەرشىلىگىن سەزىنگەندەي بولدىق.

 دۇيسەنالى الىماقىن

Abai.kz