سولتۇستىك ماكەدونيادا جاسوسپىرىمدەرگە ارنالعان بالقان ماتەماتيكالىق وليمپياداسى (JBMO) ءوز مارەسىنە جەتتى.

قازاقستان قۇراماسى جارىسقا قاتىسۋ تاريحىنداعى ەڭ ۇزدىك ناتيجەسىن كورسەتىپ، ءتورت التىن، ءبىر كۇمىس جانە ءبىر قولا مەدال جەڭىپ الدى. كوماندالىق ەسەپتە 24 ەل قاتىسۋشىلارى اراسىندا ءبىزدىڭ وقۋشىلارىمىز ەكىنشى ورىندى يەلەندى.

جەڭىمپازدار:

انۋار اعىباەۆ – الماتى قالاسىنداعى NurOrda حالىقارالىق مەكتەبىنىڭ 9-سىنىپ وقۋشىسى;

الەكساندر ولەينيكوۆ – الماتى قالاسىنداعى NurOrda حالىقارالىق مەكتەبىنىڭ 9-سىنىپ وقۋشىسى;

جاڭگىر بۋلات – الماتى قالاسىنداعى رەسپۋبليكالىق فيزيكا-ماتەماتيكا مەكتەبىنىڭ 8-سىنىپ وقۋشىسى;

باتىرحان بەيعانوۆ – الماتى قالاسىنداعى رەسپۋبليكالىق فيزيكا-ماتەماتيكا مەكتەبىنىڭ 9-سىنىپ وقۋشىسى;

نۇرتاي مالىك – اقتوبە وبلىستىق ء"بىلىم-يننوۆاتسيا" ليتسەي-ينتەرناتىنىڭ 9-سىنىپ وقۋشىسى;

ميراس كەڭەسبەك – قاراعاندى وبلىستىق ء"بىلىم-يننوۆاتسيا" ليتسەي-ينتەرناتىنىڭ 9-سىنىپ وقۋشىسى.

قۇرامانىڭ جەتەكشىلەرى: تالدىقورعان قالاسىنداعى نازارباەۆ زياتكەرلىك مەكتەبىنىڭ ماتەماتيكا ءپانى مۇعالىمى سەرگەي پوليانسكيح جانە "دارىن" رەسپۋبليكالىق عىلىمي-پراكتيكالىق ورتالىعىنىڭ ادىسكەرى پەريزات ساۋتبەكوۆا.

انىقتاما ءۇشىن: JBMO – 16 جاسقا دەيىنگى وقۋشىلارعا ارنالعان بەدەلدى حالىقارالىق وليمپيادا. قاتىسۋشى ەلدەردىڭ قاتارىندا البانيا، بولگاريا، گرەكيا، رۋمىنيا، سەربيا جانە باسقا دا مەملەكەتتەر بار.

قازاقستان بۇل دوداعا 2004 جىلدان بەرى قاتىسىپ كەلەدى جانە ءداستۇرلى تۇردە ۇزدىكتەر قاتارىندا. وتكەن جىلى تۇركيادا وتكەن وليمپيادادا كوماندا 6 مەدال جەڭىپ العان بولاتىن.

Abai.kz