2025 جىلعى 27 مامىر مەن 2 ماۋسىم ارالىعىندا «قازاقستان بالالارى» ونكۇندىگى اياسىندا «مينيسترگە حات» اتتى اكتسيا ءوتتى. بۇل تۋرالى قر وقۋ-اعارتۋ ءمينيسترى عاني بەيسەمباەۆ ءوزىنىڭ پاراقشاسىندا جازبا جاريالادى.

عاني بەيسەمباەۆ، مينيستر:

- وزدەرىڭىزگە بەلگىلى، ماۋسىم ايىنىڭ باسىندا «مينيسترگە حات» اكتسياسىن باستاعان بولاتىنبىز. بۇگىنگى كۇنى 235 حات كەلىپ ءتۇستى. ەلىمىزدىڭ تۇكپىر-تۇكپىرىنەن كەلگەن حاتتاردىڭ ارقايسىن زەيىن قويىپ، اسىقپاي، مۇقيات وقىپ شىقتىم. شىندىعىندا اشىق جازىلعان ۇسىنىس پىكىرلەر، جۇرەك جاردى تىلەكتەر مەن جاس بالاعا ءتان تازا بۇلاقتاي ويعا تولى حاتتار مەنى قاتتى تولعاندىردى.

ولار مەكتەبى مەن سۇيىكتى ۇستازدارى، باستارىنان وتكەن قىم-قيعاش قىزىقتى وقيعالارى، العا جەتەلەگەن ماقسات-مۇراتتارى تۋرالى جازۋلارى مەنى زور اسەرگە بولەگەنى سونشا بالالارمەن جەكە سويلەسىپ وتىرعانداي اسەر قالدىردى. حاتتاردى وقي وتىرىپ، ەڭ الدىمەن اتا-انا رەتىندە قۋانىش، مۇعالىم رەتىندە بالالارىمىز ءۇشىن ماقتانىش سەزىم بويىمدى بيلەدى. اسىرەسە مىنا ءبىر حات ەرەكشە كوڭىل ءبولدىردى.

تاراز قالاسىنداعى №66 مەكتەپتىڭ 7-سىنىپ وقۋشىسى ارتەم پوگورەلوۆتىڭ حاتى. ارتەم – تاعدىرى جەڭىل بولماسا دا، جىگەرى مۇقالماعان باتىر بالا ەكەن. ول پاتروناتتىق وتباسىندا تاربيەلەنۋدە، ءارى قازاق مەكتەبىندە وقيدى. مەكتەپ جاڭالىقتارىنان حابار جۇرگىزەدى ەكەن. بولاشاقتا جۋرناليست بولۋدى ارماندايدى. ءوز حاتىن «عاني اكە…» دەپ باستاعان ەكەن. ءار ءسوزى مەيىرىم مەن ىزگىلىككە تولى. سوزدەرى دە، سەزىمى دە شىنايى، جۇرەككە جىلى ءتيدى. ارتەمنىڭ حاتىن بىرنەشە رەت قايتالاپ وقىپ شىقتىم.

اينالايىن ارتەم! ەگەر وسى جازبانى وقىپ وتىرساڭ، وزىڭمەن استانادا كەزدەسۋدى جوسپارلاپ وتىرمىن. سول كەزدەسۋ ءوزىڭ ايتقان اكە مەن بالا اراسىنداعى اڭگىمەدەي بولادى دەپ سەنەمىن.

بۇل اكتسيا ءبىز ءۇشىن دە جاڭاشا باستاما بولدى. ولار تەك ورىندى سۇراق قويىپ قانا قويماي، جاۋابىن تابۋعا ۇمتىلعان. ەڭ باستىسى – بىزگە ياعني ۇلكەندەرگە، بولاشاققا سەنەدى. بۇل سەنىم — جۇرەكتەن شىققان ءسوزدىڭ، تازا كاۋسار بۇلاعى.

قاراپايىم ارمانداردان باستالىپ، شىنايى ءارى ماعىنالى ديالوگقا اينالعان اكتسيا مىندەتتى تۇردە جالعاسىن تابۋى ءتيىس. ءار بالاعا شىن جۇرەكتەن العىس ايتامىن. حاتتاعى ءار ءسوز — ءبىز ءۇشىن باعىت ءارى باعدار. قازىرگى ۋاقىتتا حاتتا كورسەتىلگەن ماسەلەلەر بويىنشا جان-جاقتى جۇمىستار جۇرگىزىلۋدە. وتىنىشتەردىڭ بارلىعى جۇيەلەنىپ، پىسىقتالۋدا. كەيبىرىن ناقتى شەشۋ ءۇشىن الداعى ۋاقىتتا تالقىلاۋلار مەن پىكىر الماسۋلار ۇيىمداستىرىلادى. ءار وي، ءاربىر پىكىر مەن ۇسىنىس نازاردان تىس قالمايتىن بولادى.

Abai.kz