قىتايدىڭ چۋنتسين قالاسىندا وتكەن شانحاي ىنتىماقتاستىق ۇيىمى (شىۇ) ەلدەرى حالىقارالىق كينوفەستيۆالىنىڭ سالتاناتتى جابىلۋ ءراسىمى ءوتتى.

قر مادەنيەت جانە اقپارات مينيسترلىگى مالىمەتىنشە، بيىلعى فەستيۆالگە قاتىسۋشى مەملەكەتتەر ەكى تولىقمەتراجدى فيلمنەن ۇسىنىپ، نەگىزگى «التىن كامەليا» بايقاۋ باعدارلاماسىنا قاتىستى. «ۇزدىك اكتەر» اتالىمىن قازاقستاندىق اكتەر باقىت قاجىباەۆ يەلەندى.

بۇل ماراپات وعان «نابات وپەراتسياسى» فيلمىندەگى باستى ءرولى ءۇشىن بەرىلدى.

اكتەردىڭ ايتۋىنشا، بۇل – تەك ءوزىنىڭ عانا ەمەس، فيلمگە جان-تانىمەن ەڭبەك سىڭىرگەن بۇكىل شىعارماشىلىق توپتىڭ جەڭىسى. ول شىنايى وقيعاعا نەگىزدەلگەن بۇل حيكايانى جۇزەگە اسىرۋدىڭ ماڭىزىن اتاپ ءوتىپ، بارلىق كورەرمەنگە العىس ءبىلدىردى.

«نابات وپەراتسياسى» ءفيلمى 1992 جىلى قازاقستاندا بولعان شىنايى وقيعاعا نەگىزدەلگەن. اۆتوبۋستاعى 30 ادامدى كەپىلگە العان لاڭكەستەرگە قارسى قۇقىق قورعاۋ ورگاندارىنىڭ ارنايى وپەراتسياسى ادام شىعىنىنسىز اياقتالادى.

فيلم ش.ايمانوۆ اتىنداعى «قازاقفيلم» كينوستۋدياسىندا قر مادەنيەت جانە اقپارات مينيسترلىگى مەن ۇلتتىق كينونى قولداۋ ورتالىعىنىڭ قولداۋىمەن تۇسىرىلگەن.

بايقاۋعا ۇسىنىلعان ەكىنشى قازاقستاندىق تۋىندى – رەجيسسەر دارحان تولەگەنوۆتىڭ «اعايىندىلار» دراماسى. بۇل فيلم بۇعان دەيىن 15-تەن استام حالىقارالىق ماراپاتقا يە بولعان، ونىڭ ىشىندە Oldenburg حالىقارالىق كينوفەستيۆالىندە Spirit of Cinema Award جۇلدەسى بار.

بيىل قازاق كينوسى فەستيۆالدىڭ فوكۋس-سەكتسياسىنا ۇسىنىلىپ، «اعايىندىلار» ءفيلمى ارنايى باعدارلاما اياسىندا كورسەتىلدى.

بايقاۋ باعدارلاماسىن شىۇ ەلدەرىنىڭ تانىمال كينەماتوگرافتارى، توعىز ادامنان قۇرالعان حالىقارالىق قازىلار القاسى باعالادى.

فەستيۆال اياسىندا كينونارىق ۇيىمداستىرىلدى. قازاقستاننىڭ ۇلتتىق ستەندىندە ۇلتتىق كينونى قولداۋ ورتالىعى مەن ش.ايمانوۆ اتىنداعى «قازاقفيلم» كينوستۋدياسىنىڭ نەگىزگى كينوجوبالارى ۇسىنىلدى. وندا 25-تەن استام كوركەم، دەرەكتى جانە انيماتسيالىق ءفيلمنىڭ ترەيلەرلەرى كورسەتىلدى.

چۋنتسيندەگى شىۇ حالىقارالىق كينوفەستيۆالى گۋمانيتارلىق بايلانىستاردى نىعايتۋعا، تاجىريبە الماسۋعا جانە ۇلتتىق كينووندىرىستى دامىتۋعا ارنالعان ماڭىزدى مادەني الاڭعا اينالدى.

باقىت قاجىباەۆ «مىرجاقىپ. ويان، قازاق!» تەلەحيكاياسىندا باستى ءرولدى سومداعانىن ەسكە سالا كەتەيىك.

ايتا كەتەيىك، پاۆلوداردا شاكەن ايمانوۆتىڭ ءومىرى جايىندا جازىلعان «سۇڭعىلا» كىتابى جارىق كوردى.

Abai.kz