قىتاي بيلىگى ۆيزالىق ساياساتتى جەڭىلدەتىپ، شەتەلدىك تۋريستەردىڭ كوپتەپ كەلۋىنە مۇمكىندىك جاساپ جاتىر.

ەندى 74 ەلدىڭ ازاماتتارى قىتايعا ۆيزاسىز كىرىپ، 30 كۇنگە دەيىن بولا الادى. مۇنداي قادامنىڭ باستى ماقساتى ءتۋريزمدى دامىتۋ، ەكونوميكانى جانداندىرۋ. 2024 جىلى 20 ميلليوننان استام شەتەلدىك ازامات قىتايعا ۆيزاسىز كىرگەن.

قىتاي COVID-19 شەكتەۋلەرىن الىپ تاستاعاننان كەيىن 2023 جىلدىڭ باسىندا شەكاراسىن قايتا اشتى. الايدا سول جىلى ەلگە تەك 13,8 ملن شەتەلدىك كەلگەن. بۇل پاندەمياعا دەيىنگى 2019 جىلعى 31,9 ملن اداممەن سالىستىرعاندا ەكى ەسە از.

2023 جىلعى جەلتوقساندا قىتاي فرانتسيا، گەرمانيا، يتاليا، نيدەرلاند، يسپانيا جانە مالايزيا ازاماتتارىنا ۆيزاسىز كىرۋگە رۇقسات بەردى. سول ۋاقىتتان بەرى دەرلىك بۇكىل ەۋروپا قامتىلدى. سوڭعى ايلاردا لاتىن امەريكاسىنىڭ بەس ەلى مەن وزبەكستان، كەيىن ءتورت تاياۋ شىعىس مەملەكەتى ۆيزاسىز رەجيمگە قوسىلدى. 2024 جىلعى 16 شىلدەدە ازەربايجان قوسىلىپ، بۇل ءتىزىم 74 ەلگە جەتتى.

بۇل ەلدەردىڭ شامامەن ۇشتەن ەكىسى ۆيزاسىز كىرۋ قۇقىعىن سىناق مەرزىمىنە، ياعني ءبىر جىلعا العان.

"جاڭا ۆيزالىق ساياسات ءبىز ءۇشىن 100% ءتيىمدى،" - دەيدى WildChina تۋريستىك اگەنتتىگىنىڭ باس ديرەكتورى دجەنني چجاو.

كومپانيا حالىقارالىق ساياحاتشىلارعا ارنالعان ەكسكليۋزيۆتى تۋرلارعا ماماندانعان. ونىڭ ايتۋىنشا، پاندەمياعا دەيىنگى كەزەڭمەن سالىستىرعاندا بيزنەسى 50%-عا وسكەن.

Trip.com Groupونلاين-تۋراگەنتتىگى ۆيزاسىز ساياساتتىڭ تۋريزمگە وڭ اسەر ەتكەنىن ايتادى. 2024 جىلدىڭ العاشقى ءۇش ايىندا قىتايعا باعىتتالعان رەيستەر، قوناقۇيلەر جانە باسقا دا تۋرلار بويىنشا برونداۋلار ەكى ەسەگە ارتقان جانە ولاردىڭ 75%-ى ۆيزاسىز رەجيمدەگى ەلدەردەن كەلگەندەرگە تيەسىلى بولعان.

افريكانىڭ ءىرى ەلدەرىنىڭ ەشقايسىسى ءالى دە ۆيزاسىز رەجيمگە ەنبەگەن، دەگەنمەن قىتايمەن بايلانىستارى تىعىز. ال سولتۇستىك امەريكا مەن كەيبىر ەلدەردىڭ ازاماتتارىنا ترانزيتتىك ۆيزامەن 10 كۇنگە دەيىن ەلدە بولۋعا رۇقسات بەرىلگەن.

ۆيزاسىز تىزىمگە كىرمەگەن 10 ەلدىڭ ازاماتتارى قىتايعا باسقا ەلگە ۇشقان جاعدايدا 10 كۇنگە دەيىن كىرۋ مۇمكىندىگىنە يە. بۇل ەرەجە قىتايداعى 60 شەكارالىق باقىلاۋ بەكەتىندە عانا قولدانىلادى.

ترانزيتتىك ۆيزا ساياساتى 55 ەلگە تارالعان، بىراق ولاردىڭ كوبى 30 كۇندىك ۆيزاسىز تىزىمدە دە بار. ال 10 كۇندىك شەكتەۋلى ۆيزاسىز رەجيمگە كىرەتىن ەلدەر قاتارىندا: چەحيا، ليتۆا، شۆەتسيا، رەسەي، ۇلىبريتانيا، ۋكراينا، يندونەزيا، كانادا، اقش جانە مەكسيكا بار.

ەسكە سالايىق، بۇعان دەيىن 80 مەملەكەتپەن ۆيزاسىز رەجيمدەگى قازاقستان ديپلوماتياسىنىڭ اۋقىمى قانداي ەكەنى جازىلعان بولاتىن.

Abai.kz