قازاقستاندا ەڭبەك قاۋىپسىزدىگى مەن جۇمىسكەرلەردىڭ الەۋمەتتىك قورعالۋى جاڭا كەزەڭگە قادام باسىپ جاتىر. بۇل تۋرالى ەڭبەك جانە حالىقتى الەۋمەتتىك قورعاۋ ءبىرىنشى ۆيتسە-ءمينيسترى اسقاربەك ەرتاەۆ كاسىپوداقتار فەدەراتسياسىنىڭ XXVII سەزىندە مالىمدەدى.

مينيسترلىكتىڭ جانىندا ارنايى جۇمىس توبى قۇرىلىپ، ول وندىرىستىك جاراقاتتار كەزىندە قىزمەتكەردىڭ ءومىرى مەن دەنساۋلىعىنا كەلتىرىلگەن زياندى وتەۋ ءتارتىبىن قاراستىرۋمەن اينالىسادى. سونىمەن قاتار زياندى ەڭبەك جاعدايىندا جۇمىس ىستەيتىن ازاماتتاردى زەينەتاقىمەن قامسىزداندىرۋ ماسەلەسى دە جۇمىس توبىنىڭ كۇن تارتىبىندە.

بۇل باعىتتاعى جۇمىستار 2024–2030 جىلدارعا ارنالعان قازاقستان رەسپۋبليكاسىنىڭ قاۋىپسىز ەڭبەك تۇجىرىمداماسى اياسىندا جۇزەگە اسىرىلىپ جاتىر. تۇجىرىمداما ەڭبەك قاۋىپسىزدىگىن ارتتىرۋدى، الەۋمەتتىك تاۋەكەلدەردەن ساقتاندىرۋدى جانە جۇمىس ىستەيتىن حالىقتىڭ قورعالۋ دەڭگەيىن جاقسارتۋدى كوزدەيدى.

بۇگىنگە دەيىن ەڭبەك جانە الەۋمەتتىك كەپىلدىكتەردى قامتاماسىز ەتۋ بويىنشا كوپ جۇمىس اتقارىلدى. بىراق بۇل جەتكىلىكتى ەمەس — ءبىزدى ءالى دە شەشۋدى قاجەت ەتەتىن ماڭىزدى مىندەتتەر كۇتىپ تۇر، — دەدى اسقاربەك ەرتاەۆ.

وسى مىندەتتەردىڭ ءبىرى رەتىندە ۆيتسە-مينيستر كاسىپوداقتاردىڭ ءرولىن كۇشەيتۋدى اتاپ ءوتتى. وسى ماقساتتا "كاسىپوداقتاردىڭ اۆتوماتتاندىرىلعان جۇمىس ورنى" دەپ اتالاتىن جاڭا تسيفرلىق مودۋل ازىرلەنىپ جاتىر.

بۇل جۇيە كاسىپوداق مۇشەلەرىن اۆتوماتتى تۇردە تىركەۋگە، قاعازباستىلىقتى ازايتۋعا، قوعامدىق باقىلاۋدى ونلاين فورماتتا جۇرگىزۋگە مۇمكىندىك بەرەدى. سونىمەن قاتار كاسىپوداقتار مەن مەملەكەت جانە جۇمىس بەرۋشىلەر اراسىنداعى بايلانىس جەڭىلدەيدى، ال ەڭبەك قۇقىقتارىن قورعاۋ جۇمىسى — تيىمدىرەك ءارى اشىق بولماق.

ەسكە سالايىق، بۇعان دەيىن ۆيتسە-مينيستر قازاقستاندا كاسىپوداقتار سانى ارتىپ، جۇمىسكەر قۇقىقتارى كۇشەيىپ كەلەتىنىن ايتتى.

Abai.kz