2025 جىلدىڭ 10–13 شىلدەسى ارالىعىندا بەلارۋس رەسپۋبليكاسىندا «ۆيتەبسكىدەگى سلاۆيان بازارى» XXXIV حالىقارالىق ونەر فەستيۆالى ءوتتى.

قازاقستان اتىنان بايقاۋعا جەتىسۋ وبلىستىق دانەش راقىشەۆ اتىنداعى فيلارمونياسىنىڭ ءانشىسى الماگۇل باتتاليەۆا قاتىستى.

فينالدا ءانشى «ۆەچنوست» كومپوزيتسياسىن ورىنداپ، كورەرمەندى تالانتىمەن ءتانتى ەتتى. كوپشىلىكتىڭ كوڭىلىنەن شىعىپ، قازىلار القاسىنىڭ جوعارى باعاسىنا يە بولدى. ونەرپاز ەكى بايقاۋ كۇنىنىڭ قورىتىندىسى بويىنشا 137 ۇپاي جيناپ، فەستيۆالدىڭ گران-پري جۇلدەسىن جەڭىپ الدى.

الماگۇل باتتاليەۆا – الماتى قالاسىنىڭ تۋماسى، دارىندى جاس ءانشى. ەرتە جاستان ۆوكالدىق قابىلەتى انىق بايقالعان. 14 جاسىندا پ. ي. چايكوۆسكي اتىنداعى الماتى مۋزىكالىق كوللەدجىنە وقۋعا تۇسكەن. سونىمەن قاتار الماگۇل بىرنەشە اسپاپتى – اككوردەون، فورتەپيانو جانە ۋكۋلەلەنى ەركىن مەڭگەرگەن.

الماگۇل – تەك شەبەر ورىنداۋشى عانا ەمەس، ساحناعا دەگەن قۇرمەتى مەن جاۋاپكەرشىلىگى مول ونەرپاز. ول «جاس قانات – 2023» فەستيۆالى، «الماتىم جۇرەگىمدە» حالىقارالىق بايقاۋى سىندى بەدەلدى مۋزىكالىق جارىستاردا جوعارى دەڭگەيدە ونەر كورسەتىپ، كاسىبي شەبەرلىگىن بىرنەشە مارتە دالەلدەگەن.

قازاقستان رەسپۋبليكاسى مادەنيەت جانە اقپارات مينيسترلىگى الماگۇل باتتاليەۆانى «سلاۆيان بازارى» فەستيۆالىندەگى جارقىن جەڭىسىمەن شىن جۇرەكتەن قۇتتىقتايدى. بۇل جەتىستىك – ونىڭ ونەر جولىنداعى ىزدەنىسى مەن دارىنىنىڭ ايقىن كورىنىسى.

Abai.kz