ەلىمىزدە 2025 جىلدىڭ ءبىرىنشى جارتىجىلدىعىندا 465 150 تەڭگە جالعان اقشا انىقتالدى. ونىڭ ىشىندە 93 بانكنوتا جانە 3 مونەتا بار.  

كوبىنەسە 5000 تەڭگەلىك نومينال قولدان جاسالعان. 85 دانا بانكنوتا جالپى تاركىلەنگەن اقشالاردىڭ 88,5%-ىن قۇرادى.

ودان كەيىن 5 دانا (5,2%) – 2000 تەڭگەلىك نومينالعا، 3 دانا (3,1%) – نومينالى 10000 تەڭگەلىك بانكنوتالارعا، قالعان 3,2% – مونەتالارعا تيەسىلى.

ۇلتتىق بانك شىنايى بانكنوتالاردى قولدان جاسالعان اقشادان ءوز بەتىنشە اجىراتۋعا كومەكتەسەتىن قاراپايىم ەرەجەلەردى ۇسىندى.

"جالعان بانكنوتالار كادىمگى وفسەتتىك قاعازعا ءتۇرلى ءتۇستى پرينتەر ارقىلى جانە كومپيۋتەرلىك تەحنيكانىڭ كومەگىمەن جاسالادى. ميكروتەكستەر بۇلىڭعىر بولادى جانە ۇلعايتقان سايىن انىقتىعىن جوعالتادى.

پاتچ ەلەمەنتىنىڭ كولەمدى بەينەسى جوق جانە كادىمگى بوياۋمەن باسىلعان، كۇن بەلگىسى ساۋلەسىنىڭ جان-جاققا شاشىراعان گولوگرافيالىق اسەرى مەن نومينالدىڭ تسيفرلىق كەسكىنىنەن ويۋ-ورنەككە اۋىسۋ اسەرى بولمايدى. قورعانىش ءجىبى ديناميكالىق جانە ءتۇسىن وزگەرتە الاتىن اسەردەن ادا، ءارى جارىققا توسىپ قاراعاندا تۇتاستىعى بايقالمايدى", – ءتۇسىندىرىپ ءوتتى ۇلتتىق بانك وكىلدەرى.

Abai.kz