"ماسكەۋ ورىس ءتىلىن كۇشتەپ انا ءتىلىمىز ەتپەك!", - دەيدى ەتنيكالىق ايماقتارداعى بەلسەندىلەر.

بيىل ورتالىق ماسكەۋ سۇراپىل ءبىر ساياسي-يدەولوگيالىق شەشىم قابىلدادى. رەسەي فەدەراتسياسىنىڭ قۇرامىنداعى ەتنيكالىق سۋبەكتىلەردە ەندى 1 سىنىپتان باستاپ انا تىلدەرىن وقىتۋ ۋاقىتى قىسقارتىلادى. شەشىم بيىلعى جىلدىڭ 1 قىركۇيەگىنەن باستاپ كۇشىنە ەنەدى.

ناقتىلاپ ايتقاندا: ەتنيكالىق از ۇلتتار ءتىلى ەندى ءبىرىنشى سىنىپتارعا اپتاسىنا تەك 1 رەت وقىتىلادى. بۇرىن بۇل نورما ەڭ كەمى 2 ساعات بولاتىن. باستاما اۆتورى – رف پرەزيدەنتىنىڭ كەڭەسشىسى يامپولسكايا ەلەنا الەكساندروۆنا دەيتىن ادام.

بۇعان قوسا: رف ءبىلىم مينيسترلىگى «انا ءتىلى» ءپانىن «رەسەي حالقىنىڭ ءتىلى» دەپ وزگەرتپەك...

بۇل ءوز كەزەگىندە رەسەيدەگى ەتنيكالىق سۋبەكتىلەردىڭ نارازىلىعى مەن قارسىلىعىن وياتتى.

تاتارستان رەسپۋبليكاسى جازۋشىلار وداعىنىڭ توراعاسى، مەملەكەتتىك كەڭەس دەپۋتاتى رقايل زايدۋللا: «انا ءتىلى» ءپانىن «رەسەي حالقىنىڭ ءتىلى» دەپ وزگەرتۋ مەن انا ءتىلىنىڭ ساعاتىن قىسقارتۋ – وتە قورقىنىشتى باستاما. بۇل ۇلتتاردىڭ انا تىلدەرىن ولتىرۋگە باعىتتالعان»، - دەدى اشىنا سويلەپ.

ستاتيستيكاعا كوز سالساق: رەسەي قۇرامىنداعى تاتارستاندا سوڭعى حالىق ساناعى بويىنشا 600 مىڭعا جۋىق تاتار جويىلعان. ال 1 ميلليونعا جۋىق تاتار ءوز انا تىلىنەن باس تارتقان.

وسىلايشا، كرەمل يدەولوگتارى رەسەي قۇرامىنداعى سۋبەكتىلەردى جاپپاي ورىستاندىرۋ ناۋقانىنا قىزۋ كىرىسىپ كەتكەنىن كورىپ وتىرمىز. كرەمل بيلىگى وسىنىڭ الدىندا: «رەسەيدە ءبىر عانا پرەزيدەنت بولۋى كەرەك»، - دەپ باستاما كوتەرىپ، سۋبەكتىلەر باسشىلارىن «پرەزيدەنت» ستاتۋسىنان ايىرعان. ونان سوڭ، ەتنيكالىق از ۇلتتاردىڭ انا تىلدەرىن مەكتەپتە وقىتۋدى شەكتەدى. باستاۋىش سىنىپتارعا اپتاسىنا 2 ساعات وقىتىلاتىن. ال ورتا جانە جوعارعى سىنىپتارعا ەتنيكا تىلدەرى وقىتىلمايتىن. بۇدان بولەك، ايماق-ايماقتاردا ەتنيكالىق ۇلتتار تىلىندە ءبىلىم بەرەتىن مەكتەپتەردى جاپپاي جابا باستادى نەمەسە ارالاس جانە ورىس ءتىلدى مەكتەپتەرگە اينالدىردى. ەندى مىنە، ەتنيكا ءتىلىن 1 سىنىپتارعا عانا اپتاسىنا 1 مارتە وقىتۋ جانە «انا ءتىلى» ءپانىن «رەسەي حالقىنىڭ ءتىلى» دەپ وزگەرتپەك.

بۇعان البەتتە، باس كوتەرۋگە قاۋقارلى ەتنيكالىق سۋبەكتىلەر كەلىسپەيدى. قارسى كۇرەسكە شىعادى. قازىردىڭ وزىندە تاتارستاننىڭ ايماقتىق پارلامەنتى رف پرەزيدەنتىنە، مەملەكەتتىك دۋما مەن ۇكىمەتكە ارنايى تالاپ-ارىز دايىنداپ جولدايتىنىن مالىمدەدى. «ساحا كونگرەسس» دەگەن قوعامدىق ۇيىم باسشىلارى دا، باشقۇرتستان بەلسەندىلەرى دە بۇل باستاماعا قارسى كۇرەس ۇيىمداستىرماق...

Abai.kz