قورعانىس مينيسترلىگى جاڭا فورماتتاعى مەرزىمدى اسكەري قىزمەتتىڭ SARBAZ+ پيلوتتىق جوباسىن ىسكە اسىرىپ جاتىر. باعدارلاما اسكەري قىزمەتشىلەردى دايارلاۋ ساپاسىن ارتتىرۋعا جانە زاماناۋي تەحنولوگيالاردى كۇندەلىكتى اسكەر ومىرىنە كىرىكتىرۋگە باعىتتالعان. 

وسى كۇزدە الماتى وبلىسىندا ورنالاسقان اۋە قورعانىسى كۇشتەرىنىڭ 78460 اسكەري بولىمىندە 150 اسكەرگە شاقىرىلۋشى جاڭا ۇلگى بويىنشا قىزمەت اتقارا باستايدى. SARBAZ+ ساربازداردىڭ جەكە جانە كاسىبي الەۋەتىن دامىتۋعا، قىزمەت كورسەتۋ جاعدايلارىن جاقسارتۋعا جانە كۇندەلىكتى قىزمەتتى باسقارۋعا تسيفرلىق قۇرالداردى ەنگىزۋگە باعىتتالعان شەشىمدەردى سىناقتان وتكىزۋگە ارنالعان الاڭعا اينالادى.

جوبانى ىسكە قوسۋعا دايىندىق اياسىندا بولىمگە قورعانىس ءمينيسترىنىڭ تسيفرلاندىرۋ جونىندەگى ورىنباسارى دارحان احمەديەۆ كەلدى. دەلەگاتسيا قۇرامىنا پارلامەنت ءماجىلىسىنىڭ دەپۋتاتى ولجاس قۇسپەكوۆ جانە «قازاقتەلەكوم» اق، «ترانستەلەكوم» اق، «BI Group» اق، «Invictus Fitness» جشس، «قازاقستان گاج ورتالىعى» اق جانە الماتى شاحمات كلۋبىنىڭ سەرىكتەس كومپانيالارىنىڭ وكىلدەرى كىردى. قاتىسۋشىلار ينفراقۇرىلىم نىساندارىمەن تانىسىپ، جاڭا فۋتبول الاڭى مەن ەلەكتروندى ءتيردىڭ اشىلۋىنا قاتىستى.

SARBAZ+ جوباسى اسكەري قىزمەتتى كاسىپتىك وقىتۋ ەلەمەنتتەرىن، تسيفرلىق شەشىمدەرىن، مەديتسينالىق مونيتورينگ جۇيەسىن جانە بوس ۋاقىتتى ۇيىمداستىرۋدى كىرىكتىرۋدى كوزدەيدى.

— اربىر اسكەري قىزمەتشىگە ناقتى ۋاقىتتاعى بيومەتريالىق كورسەتكىشتەردى باقىلاۋ ءۇشىن فيتنەس-بىلەزىك بەرىلەدى دەپ جوسپارلانىپ وتىر. دەرەكتەر مەديتسينالىق پەرسونال مەن كومانديرلەرگە قولجەتىمدى ورتالىقتاندىرىلعان مونيتورينگ جۇيەسىنە كەلىپ تۇسەدى، بۇل جەكە قۇرامنىڭ دەنساۋلىق جاعدايىن تۇراقتى باقىلاۋدى قامتاماسىز ەتەدى. بەينە تالداۋ جۇيەسى دە ەنگىزىلىپ جاتىر، — دەلىنگەن مينيسترلىك حابارلاماسىندا.
ءبولىم اۋماعىندا قۇرىلىس جانە جوندەۋ جۇمىستارى اياقتالىپ جاتىر. سپورت نىساندارى جاڭارتىلىپ، ترەناجەرلەر ورناتىلۋدا، ويىن سپورت تۇرلەرىنە ارنالعان الاڭدار مەن كورەرمەندەرگە ارنالعان ايماقتار قۇرىلىپ جاتىر. لوگيكالىق ويلاۋدى دامىتۋ جانە زياتكەرلىك بەلسەندىلىكتى قولداۋ ءۇشىن شاحمات سەكتسيالارىن ىسكە قوسۋ دا جوسپاردا بار.

جوبا اياسىندا تەلەكوممۋنيكاتسيا جانە IT سالاسىندا — «قازاقتەلەكوم» جانە «ترانستەلەكوم» كومپانيالارىمەن بىرلەسىپ بازالىق وقىتۋ باعدارلامالارى كوزدەلگەن. اسكەردەگى قىزمەت اياقتالعاننان كەيىن قاتىسۋشىلار اتتەستاتتاۋدان ءوتىپ، جۇمىسقا ورنالاسۋ كەزىندە پايدالى سەرتيفيكاتتار الا الادى. وعان قوسا ۇشقىشسىز ۇشاتىن قۇرىلعىلار مەن راديوبايلانىستى پايدالانۋ نەگىزدەرىنە وقىتۋ جوسپارلانعان. قوسىمشا قازاق جانە اعىلشىن تىلدەرىندە ساباقتار ۇيىمداستىرىلادى.

اسكەري قىزمەتشىلەردىڭ پسيحولوگيالىق كۇيىن قولداۋ ءۇشىن ەموتسيانى شىعارۋ بولمەسى اشىلادى. وفيتسەرلەر مەن سەرجانتتار ءۇشىن زاماناۋي، قۇزىرەتتى جانە سترەسسكە ءتوزىمدى اسكەري مامان قالىپتاستىرۋعا باعىتتالعان جەكە تۇلعانى دامىتۋ بويىنشا ترەنينگتەر قاراستىرىلعان.

SARBAZ + باعدارلاماسى مەرزىمدى قىزمەت ساربازدارىنا عانا اسەر ەتپەيدى. ءبولىمنىڭ وفيتسەرلىك جانە سەرجانتتىق قۇرامى دا، ونىڭ ىشىندە CCNA Cisco جەلىلىك تەحنولوگيالار سالاسىنداعى حالىقارالىق باعدارلاماسى بويىنشا بىلىكتىلىگىن ارتتىرۋدان وتەدى.

اسكەرگە شاقىرىلۋشىلاردى ىرىكتەۋدىڭ ىڭعايلىلىعى ءۇشىن جوبانىڭ رەسمي سايتى ازىرلەندى. پلاتفورمادا قىزمەتكە كىرۋ ءتارتىبى، ءوتۋ شارتتارى جانە ىرىكتەۋ كەزەڭدەرى تۋرالى اقپارات ورنالاستىرىلعان. اسكەرگە شاقىرىلۋشىلار ونلاين-تىركەۋدەن وتە الادى، سودان كەيىن ولاردىڭ ساۋالنامالارىن ءبولىم وكىلدەرى مەن جەرگىلىكتى اسكەري باسقارۋ ورگاندارىنىڭ قاتىسۋىمەن كوميسسيا قارايدى. ىرىكتەۋدەن وتكەن ۇمىتكەرلەر قابىلدانعانى جايلى حابارلاما الادى.

— SARBAZ+ — اسكەري قىزمەتتىڭ ۇلگىسى عانا ەمەس، سونىمەن قاتار جەكە جانە كاسىبي ءوسۋ مۇمكىندىگى. ءبىز ءاربىر اسكەرگە شاقىرىلۋشىنىڭ ازاماتتىق ومىردە پايدالى بولاتىن ناقتى ءبىلىم مەن داعدى الىپ، اسكەردەن زاپاسقا شىعۋىنا جۇمىس ىستەيمىز، — دەپ اتاپ ءوتتى قورعانىس ءمينيسترىنىڭ ورىنباسارى دارحان احمەديەۆ.
جوبا ءساتتى ىسكە اسىرىلعان جاعدايدا ونى قازاقستان رەسپۋبليكاسى قارۋلى كۇشتەرىنىڭ باسقا دا بولىمشەلەرىنە كەزەڭ-كەزەڭىمەن ەنگىزۋ جوسپارلانىپ وتىر.

Abai.kz