2025 جىلدىڭ العاشقى جارتىجىلدىعىندا قازاقستاندا مەملەكەت پەن ازاماتتار اراسىنداعى كەرى بايلانىس تەتىكتەرى قارقىندى دامۋدا. بۇل باعىتتاعى ماڭىزدى قۇرالداردىڭ ءبىرى – epetition.kzپلاتفورماسى. اتالعان تسيفرلىق الاڭ ارقىلى ازاماتتار ءبىر مىڭنان استام پەتيتسيا جولداپ، قوعامدى تولعاندىراتىن ماسەلەلەرمەن تانىسۋعا مۇمكىندىك الدى. پورتال قوعامدىق باستامالاردى ءبىلدىرۋدىڭ جانە مەملەكەتتىك ورگانداردىڭ نازارىن وزەكتى تاقىرىپتارعا اۋدارۋدىڭ ءتيىمدى ارناسىنا اينالۋدا.

مەملەكەتتىك باسقارۋدا اشىقتىق پەن ەسەپتىلىكتى ارتتىرۋ ماقساتىندا قازاقستان رەسپۋبليكاسى مادەنيەت جانە اقپارات مينيسترلىگىنە اقپاراتقا قول جەتكىزۋ سالاسىندا مەملەكەتتىك باقىلاۋ جۇرگىزۋ فۋنكتسياسى جۇكتەلدى. ەسەپتى كەزەڭدە 61 اقپارات يەسىنە قاتىستى تەكسەرۋ جۇرگىزىلىپ، «اقپاراتقا قول جەتكىزۋ تۋرالى» زاڭنىڭ 16-بابىندا كوزدەلگەن نورمالار بويىنشا انىقتالعان قۇقىق بۇزۋشىلىقتاردى جويۋ جونىندە رەسمي حابارلامالار جولداندى.

ازاماتتاردىڭ وتىنىشتەرىن قاراۋ مادەنيەتىن جەتىلدىرۋ ماقساتىندا ەلورداداعى ازاماتتاردى قابىلداۋ ورتالىعىنىڭ تاجىريبەسى ەلىمىزدىڭ بارلىق وڭىرلەرىنە ەنگىزىلدى. بۇگىندە رەسپۋبليكا بويىنشا 150-دەن استام وسىنداي ورتالىق جۇمىس ىستەيدى. بۇل ورتالىقتاردا ازاماتتار مەملەكەتتىك قىزمەتتەرگە جۇگىنىپ، اكىمدىك وكىلدەرىنەن كەڭەس سۇراپ، بەلگىلەنگەن كەستە بويىنشا جەكە قابىلداۋعا جازىلا الادى. ورتالىقتاردىڭ ينفراقۇرىلىمى تۇرعىنداردىڭ ءارتۇرلى ساناتى ءۇشىن قولايلى ءارى قولجەتىمدى بولۋىنا جاعداي جاسايدى.

سونىمەن قاتار، مەملەكەتتىك ورگانداردىڭ اشىقتىق يندەكسى بويىنشا الدىن الا ناتيجەلەر جاسالىپ، ولار مەملەكەت باسشىسى اكىمشىلىگىنىڭ جانە ورتالىق مەملەكەتتىك ورگانداردىڭ قاتىسۋىمەن وتكەن جيىندا ۇسىنىلدى. بۇل باعالاۋ 48 ورتالىق جانە جەرگىلىكتى اتقارۋشى ورگاننىڭ قىزمەتىن قامتىدى.

مەملەكەت پەن قوعام اراسىنداعى ءوزارا ءىس-قيمىلدىڭ تسيفرلىق ءارى ينستيتۋتسيونالدىق تەتىكتەرىن دامىتۋ – ءتيىمدى باسقارۋدى قامتاماسىز ەتۋگە جانە حالىق سەنىمىن نىعايتۋعا باعىتتالعان قازىرگى مەملەكەتتىك ساياساتتىڭ ماڭىزدى باعىتى بولىپ قالا بەرمەك.

Abai.kz