كولىك قىزمەتى ەلدىڭ ونەركاسىپتىك، تەحنو­لوگيالىق الەۋەتىن نىعايتۋدا، وڭىرارالىق، حالىقارالىق بايلانىستاردى دامىتۋدا ۇلكەن ءرول اتقارادى. ءوندىرىس، ساۋدا، اۋىل شارۋاشىلىعى، قىزمەت كورسەتۋ، لوگيستيكا سياقتى سەكتورلاردىڭ دامۋىنا تىكەلەي اسەر ەتەدى. حالىقتىڭ ءومىر ءسۇرۋ ساپاسى كوبىنەسە وسى سالانىڭ سەنىمدى، ۇزدىكسىز جۇمىس ىستەۋىنە بايلانىستى.

قازىرگى تاڭدا ەلىمىزدىڭ كولىك كەشەنى قۋاتتى وندىرىستىك، عىلىمي-تەحنيكالىق، كادرلىق الەۋەتكە يە. سالا قىزمەتكەرلەرىنىڭ كۇندەلىكتى تىنىمسىز ەڭبەگىنىڭ، كاسىبي­لىگىنىڭ، ىسكە جاۋاپكەرشىلىكپەن قاراۋى­نىڭ ارقاسىندا كەشەندى جاڭعىرتۋ، جولاۋشى­لارعا قىزمەت كورسەتۋ ساپاسىن ارتتىرۋ، جۇكتەردى جەتكىزۋ، قىزمەتتەر مەن جۇمىستاردىڭ اياسىن كەڭەيتۋ، كولىك ينفراقۇرىلىمىن جەتىلدىرۋ، وزىق تەحنولوگيالار ەنگىزۋ، وڭىرلىك، حالىقارالىق بايلانىستاردى نىعايتۋ، قوزعالىس قاۋىپسىزدىگىن قامتاماسىز ەتۋ جونىندەگى ماقسات-مىندەتتەر بارىنشا ويداعىداي جۇزەگە اسىرىلىپ كەلەدى.

جاقسى دامىعان كولىك ينفراقۇرىلىمى – شەتەلدىك، وتاندىق ينۆەستورلار ءۇشىن دە تارتىمدى فاكتور. ول ءوندىرىستى كەڭەيتۋدى جەڭىلدەتەدى، تاۋار مەن قىزمەت اينالى­مىن قامتاماسىز ەتەدى، مىڭداعان ادامدى جۇمىسپەن قامتيدى. قالا مەن اۋىل، ايماقتار مەن ەلدەر اراسىنداعى ەكونو­ميكالىق قاتىناستى نىعايتادى. ىشكى نارىقتى بىرىكتىرىپ، ەكونوميكالىق تەڭگەرىم­دى قامتاماسىز ەتەدى.

سالا قىزمەتى تەمىردەي ءتارتىپتى، جوعارى جاۋاپكەرشىلىكتى تالاپ ەتەدى. وسى تۇرعىدا كۇن-ءتۇن دەمەي، اپتاپ ىستىققا، قاقاعان سۋىققا قاراماي، قوعام ءومىرىنىڭ بارلىق سالاسىندا ەسەلى ەڭبەكتىڭ كورىگىن قىزدىرىپ، ەل ەكونوميكاسىنا ەسەلەپ ۇلەس قوسىپ جۇرگەن بەينەتكەش قاۋىم قانداي قۇرمەت، ماقتاۋعا بولسىن لايىق.

كولىك قىزمەتكەرلەرىنىڭ بۇگىنگىدەي «ادال ازامات» ۇعىمى قادىرلى قۇندىلىقتارى­مىزدىڭ ءبىرى رەتىندە الدىڭعى قاتارعا شىعىپ، جۇمىسشى ماماندىقتار كەڭىنەن ناسيحاتتالىپ جاتقان كەزەڭدە ءمان-ماڭىزى تىپتەن ارتا تۇسەدى. ءبىر سوزبەن، كولىك ينفراقۇرىلىمى – ەكونوميكانىڭ درايۆەرى، ەلدىڭ تىنىس-تىرشىلىگىنىڭ نەگىزگى كورسەتكىشى. دەمەك ونى دامىتۋ بارشا بايلىقتى، رەسۋرستاردى ءتيىمدى پايدالانۋ، حالىقتىڭ ءال-اۋقاتىن ارتتىرۋدىڭ بىردەن-ءبىر جولى، كوزى بولىپ قالا بەرەدى.

Abai.kz