ورال قالاسىندا «اق بيداي» VIII وبلىستىق اۋىل سپورتى ويىندارىنىڭ سالتاناتتى اشىلۋى ءوتتى. جارىسقا باتىس قازاقستان وبلىسىنىڭ بارلىق اۋداندارىنان كەلگەن سپورتشىلار قاتىسۋدا.

اتالعان شارانىڭ ماقساتى – اۋىلدىق جەرلەردە بۇقارالىق سپورتتى دامىتۋ، تۇرعىندار اراسىندا سالاۋاتتى ءومىر سالتىن قالىپتاستىرۋ جانە ۇلتتىق سپورت تۇرلەرىن كەڭىنەن ناسيحاتتاۋ.

سالتاناتتى اشىلۋ راسىمىنە وبلىس اكىمى ناريمان تورەعاليەۆ قاتىسىپ، قاتىسۋشىلارعا ساتتىلىك تىلەپ، اۋىل سپورتىنىڭ دامۋىنا مەملەكەت تاراپىنان تۇراقتى قولداۋ كورسەتىلىپ وتىرعانىن اتاپ ءوتتى.

«بۋرابايدا وتكەن ۇلتتىق قۇرىلتايدىڭ 4-ءشى وتىرىسىندا پرەزيدەنتىمىز قاسىم-جومارت كەمەلۇلى توقاەۆ: «سپورتتى ناسيحاتتاۋ، ونى اسىرەسە بالالار مەن جاسوسپىرىمدەر اراسىندا دارىپتەۋ – ۇلت ساۋلىعىنىڭ كەپىلى. سوڭعى جىلدارى مەملەكەت قولداۋىنىڭ ناتيجەسىندە بالالار سپورتى قارقىندى دامي باستادى» دەپ سپورتتىڭ دامۋىنا باسا نازار اۋدارعان بولاتىن. وسى ورايدا وڭىرىمىزدە سپورتتىڭ دامۋىنا جان-جاقتى جاعداي جاسالىپ كەلەدى. 2024 جىلعا دەيىن وبلىسىمىزدىڭ بارلىق اۋدان ورتالىقتارى زاماناۋي دەنە شىنىقتىرۋ-ساۋىقتىرۋ كەشەندەرىمەن قامتاماسىز ەتىلدى. سونىمەن قاتار، مەملەكەت باسشىسىنىڭ وڭىرگە جۇمىس ساپارى بارىسىندا بەرگەن تاپسىرماسىنا سايكەس وتكەن جىلى  ورال قالاسىندا - «جايىق ارەنا» كوپ فۋنكتسيونالدى سپورت كەشەنى ەل يگىلىگىنە بەرىلدى. ەندىگى كەزەكتە وبلىستىڭ ءىرى اۋىلدارى 14 سپورت نىساندارىمەن قامتىلاتىن بولادى»، – دەدى ايماق باسشىسى.

سپارتاكيادا باعدارلاماسىنا قازاق كۇرەسى، ۆولەيبول، كوكپار، اسىق اتۋ، ساداق اتۋ، توعىزقۇمالاق جانە وزگە دە سپورت تۇرلەرى ەنگىزىلگەن. جالپى سانى 1000-نان استام سپورتشى قاتىسپاق.

«اق بيداي» اۋىل سپورتى ويىندارى 9 تامىزعا دەيىن جالعاسادى. جەڭىمپازدار كوماندالىق جانە جەكەلەي ەسەپتە انىقتالاتىن بولادى. شارانى ۇيىمداستىرۋشىلار – وبلىستىق دەنە شىنىقتىرۋ جانە سپورت باسقارماسى مەن اۋدان اكىمدىكتەرى.

«اق بيداي» اۋىل سپورتى ويىندارى باتىس قازاقستان وبلىسىندا 2010 جىلدان بەرى وتكىزىلىپ كەلەدى. جارىس بۇقارالىق جانە ۇلتتىق سپورت تۇرلەرىن دامىتۋعا، سونداي-اق وڭىرىشىلىك ىنتىماقتاستىقتى نىعايتۋعا باعىتتالعان.

جالپى بۇگىندە وبلىستا دەنە شىنىقتىرۋ جانە سپورتپەن تۇراقتى شۇعىلدانۋشىلاردىڭ جالپى سانى 286 مىڭ ادامدى، ول وبلىس حالقىنىڭ 41,2 %قۇرايدى. 2029 جىلى دەيىن بۇل كورسەتكىشتى 50%-عا جەتكىزۋ جوسپارلانىپ وتىر. بۇل ماقساتتا وبلىس كولەمىندە 1563 سپورتتىق قۇرىلىم جۇمىس ىستەيدى. 

Abai.kz