ECO VIBE: الماتى جاستارى ءبىر كۇندە قالامىزدىڭ 100 اۋلاسىندا سەنبىلىك وتكىزدى

​الماتىدا جاستار كۇنىنە وراي الماتى قالاسى جاستار ساياساتى باسقارماسىنىڭ قولداۋىمەن ءوتىپ جاتقان اۋقىمدى ALMA LOVE فەستيۆالى اياسىندا ەرەكشە «ECO VIBE» ەكولوگيالىق شاراسى ۇيىمداستىرىلدى. بۇل باستاما جاستاردىڭ ەكولوگيالىق مادەنيەتىن ارتتىرۋ مەن قالاعا دەگەن جاۋاپكەرشىلىگىن ارتتىرۋعا باعىتتالدى.
ECO VIBE — بۇل ەكى نەگىزگى بولىكتەن تۇراتىن ەكولوگيالىق چەللەندج: جاپپاي سەنبىلىك پەن ەكو-فەستيۆال. تاڭەرتەڭنەن باستاپ 300-دەن استام ەرىكتى جاس ءبىر ۋاقىتتا قالانىڭ 100-دەن استام اۋلاسى مەن سكۆەرىن تازارتۋعا شىعىپ، تۇرعىنداردى تازالىق جۇمىستارىنا شاقىردى.
     شارا اياسىندا قالا كوشەلەرىمەنبرەندتەلگەن ەكو-كولىك ءجۇرىپ ءوتىپ، انيماتورلار مەن بەلسەندىلەر، سونىڭ ىشىندە تانىمال جاس بلوگەر ءارى ەكو-اكتيۆيست نابيەۆ دۋلات تۇرعىنداردى اۋلالاردى تازارتۋعا بەلسەندى قاتىسۋعا شاقىرىپ، بەلسەندى قاتىستى.

       شارانىڭ جالعاسى رەتىندە الماتى قالاسى قوعامدىق كەڭەسىنىڭ مۇشەسى، ەكولوگ ەۆگەني مۋحامەدجانوۆتىڭ باستاماسىمەن سايران كولىنىڭ جاعالاۋىندا قالا تۇرعىندارىنا ارنالعان ەكو-فەستيۆال ءوتتى. وندا ەكولوگيالىق ۆيكتورينالار، ويىن-ساۋىق شارالارى ۇيىمداستىرىلدى.

​«ءبىزدىڭ ماقساتىمىز — جاستاردىڭ قالاعا دەگەن جاناشىرلىعىن ارتتىرىپ، ولاردى پايدالى ءارى كرەاتيۆتى باستامالارعا تارتۋ. ECO VIBE — بۇل جاي سەنبىلىك ەمەس، بۇل — تازا قالامىز ءۇشىن جانە جاستاردىڭەكولوگيالىق باستامالارعا قىزىعۋشىلىقتارىنن ارتتىرۋ ماقساتىندا ۇيىمداستىرىلعان جوبا»، — دەدى الماتى قالاسى جاستار ساياساتى باسقارماسىنىڭ باسشىسى ازيز كاجدەنبەك.

       ALMA LOVE فەستيۆالى 12 تامىزعا دەيىن جالعاسىپ، قالا اۋداندارىنىڭ بارلىعىن قامتيتىن بولادى. فەستيۆالدىڭ قورىتىندىسى رەتىندە بالۋان شولاق اتىنداعى سپورت سارايىندا گراند-فينال وتەدى. الماتى جاستارى بۇل كەشتە ەلىمىزدىڭ تانىمال جۇلدىزدارىنىڭ قاتىسۋىمەن بولاتىن ۇلكەن كونتسەرتكە كۋا بولماق. ايتا كەتەيىك، كونتسەرتكە كىرۋ تەگىن.

Abai.kz