«سق-فارماتسيا» جشس-نە قاتىستى سوتقا دەيىنگى تەرگەۋ امالى باستالدى. بۇل اقپاراتتى قارجى مونيتورينگى اگەنتتىگى راستاپ وتىر. 

اگەنتتىكتىڭ مالىمەتىنشە، استانا قالاسى بويىنشا ەكونوميكالىق تەرگەپ-تەكسەرۋ دەپارتامەنتى قىلمىستىق كودەكسىنىڭ 189-بابى 4-بولىگى (سەنىپ تاپسىرىلعان مۇلىكتى يەمدەنۋ نەمەسە ىسىراپ ەتۋ) بويىنشا «سق-فارماتسيا» جشس قىزمەتكەرلەرىنە قاتىستى سوتقا دەيىنگى تەرگەپ-تەكسەرۋ امالدارى ءجۇرىپ جاتىر.

قىلمىستىق-پروتسەستىك كودەكسكە سايكەس، اتالعان ىسكە قاتىستى وزگە مالىمەت جاريا ەتىلمەيدى.
دەنساۋلىق ساقتاۋ مينيسترلىگىنىڭ حالىقتى ءدارى-دارمەكپەن قامتاماسىز ەتۋ قىزمەتىنە جۇرگىزىلگەن اۋديت قورىتىندىسى بويىنشا كەلەسى فاكتىلەر انىقتالدى:

— مينيسترلىك «عىلىمي-ينفەكتسيالىق پرەپاراتتار ورتالىعى» اق-قا كلينيكالىق زەرتتەۋلەر جۇرگىزۋ بويىنشا ءىس جۇزىندە ورىندالماعان جۇمىستار ءۇشىن 166 427,3 مىڭ تەڭگە، سونداي-اق عىلىمي-تەحنيكالىق باعدارلاما اياسىندا ءىس جۇزىندە جەتكىزىلمەگەن 4 بىرلىك جابدىق ءۇشىن 36 634,1 مىڭ تەڭگە كولەمىندە تولەم جاساعان;

— 13 ءتۇرلى پرەپاراتتى ساتىپ الۋ كەزىندە باعا ايىرماشىلىعى انىقتالعان. بۇل رەتتە ساتىپ الۋ باعاسى نارىقتىق باعادان 600%-عا دەيىن جوعارى بولعان. بۇل جاعداي نەگىزىنەن تەگىن امبۋلاتوريالىق كومەككە ارنالعان ءدارى-دارمەكتىڭ زاڭسىز ەسەپتەن شىعارىلىپ، بولشەك ساۋدادا ساتىلۋىمەن بايلانىستى;

— «قازمەدپروم» جشس «سق-فارماتسيا» جشس-نە مەديتسينالىق قولعاپتى نارىقتاعى باعادان جوعارى قۇنمەن ساتقان، بۇل بيۋدجەت قاراجاتىنىڭ ءتيىمسىز جۇمسالۋىنا اكەلگەن;

— اۋديت بارىسىندا ءماجىلىس دەپۋتاتى باقىتجان بازاربەكتىڭ «سق-فارماتسيا» جشس-ءنىڭ ءدارى-دارمەك ساتىپ الۋ كەزىندە مەملەكەت بيۋدجەتىن 35,8 ملرد تەڭگە زالال كەلتىردى دەگەن مالىمدەمەسى راستالدى.

دەنساۋلىق ساقتاۋ مينيسترلىگىنىڭ حالىقتى ءدارى-دارمەكپەن قامتاماسىز ەتۋ قىزمەتى بويىنشا جۇرگىزىلگەن اۋديت كەلەسى زاڭ بۇزۋشىلىقتاردى انىقتادى:

— 203 061,4 مىڭ تەڭگە كولەمىندە وتەلۋگە جاتاتىن قارجىلىق زاڭ بۇزۋشىلىق;
— 24 970 967,7 مىڭ تەڭگە سوماسىندا بيۋدجەت قاراجاتىن ءتيىمسىز پايدالانۋ.

سونداي-اق بيىل ماۋسىمدا قىلمىستىق قۇقىقبۇزۋشىلىق بەلگىلەرى بار اۋديت ماتەريالدارى باس پروكۋراتۋراعا شارا قابىلداۋ ءۇشىن جولدانعانى حابارلاندى.

ەسكە سالا كەتسەك، «سق فارماتسيا» كومپانياسىنداعى سىبايلاستىق ىمىرا ارەكەت تۋرالى 2017 جىلى دا جازعان ەدىك.

2020 جىلى «سق فارماتسيا» قىزمەتىنە تەكسەرىس ءجۇرىپ جاتقانى حابارلاندى.

ايتا كەتسەك، بيىل ءماجىلىس دەپۋتاتى باقىتجان بازاربەك بيۋدجەت قاراجاتىن جىمقىرۋ فاكتىسى بويىنشا باس پروكۋراتۋراعا 4 ارىز بەرەتىنىن ءمالىم ەتتى. ونىڭ ىشىندە «سق فارماتسيا» كومپانياسى دا بار.

ونىڭ اتاپ وتۋىنشە، ارىزدار مىناداي 4 باعىتقا قاتىستى: «سق-فارماتسيا» مەن ءىرى فارماتسەۆتيكالىق كومپانيالار قىزمەتىن قوسا العاندا اتالعان سالاعا جۇرگىزىلگەن اۋديت ناتيجەلەرى، مىندەتتى الەۋمەتتىك مەديتسينالىق ساقتاندىرۋ جۇيەسى اياسىندا قاراجات جىمقىرۋ، اۋىل شارۋاشىلىعىندا سۋبسيديا ءبولۋ ماسەلەسى، سونداي-اق 27 ماۋسىمدا ماقۇلدانعان ۇكىمەت ەسەبى.

Abai.kz