ماڭعىستاۋدا 12 تامىز - كاسپي كۇنىنە وراي سۇڭگۋىر كەزەكتى رەت تەڭىز ءتۇبىن قوقىستان تازالاۋ جۇمىستارىن جۇرگىزدى. ول سۋ استىنان پلاستيك بوتەلكەلەر، تەمىر سىنىقتارى، بالىق اۋلاۋ قۇرالدارىنىڭ قالدىقتارى جانە باسقا دا تۇرمىستىق قالدىقتاردى شىعارىپ، جاعالاۋدىڭ ەكولوگيالىق جاعدايىن جاقسارتۋعا ۇلەس قوستى، دەپ حابارلايدى قوعامدىق كوممۋنيكاتسيا ورتالىعى.

ءىس-شارا ماڭعىستاۋ وبلىستىق تابيعي رەسۋرستار جانە تابيعات پايدالانۋدى رەتتەۋ باسقارماسىنىڭ باستاماسىمەن وڭىردەگى ەرىكتىلەر قوزعالىسىن قولداۋعا جانە كاسپي تەڭىزىنىڭ بىرەگەي ەكوجۇيەسىن ساقتاۋعا باعىتتالعان. تابيعات جاناشىرى، كاسىبي سۇڭگۋىر جەڭىس شاكاەۆتىڭ ايتۋىنشا، 2-3 مەتر تەرەڭدىككە ءتۇسىپ، باقىلاۋ جۇرگىزىلگەن. تەڭىز ءتۇبىن تازالاۋ جۇمىستارى الداعى ۋاقىتتا دا جالعاسادى.

تەڭىز تازالىعىنا بەيجاي قارامايتىن سۇڭگۋىر كوپشىلىكتى قورشاعان ورتاعا قۇرمەتپەن قاراپ، دەمالىس كەزىندە قوقىستى تاستاماۋعا، تابيعاتتى تازا ۇستاۋعا شاقىردى.

-اقتاۋ قالاسىنىڭ تەڭىز جاعاسىندا تازالىق جۇمىستارى، الداعى ۋاقىتتا دا جالعاساتىن بولادى. بۇل باستاما تەڭىزدىڭ ەكولوگيالىق جاعدايىن جاقسارتىپ، تابيعاتتى قورعاۋعا قوعام نازارىن اۋدارۋعا باعىتتالعان. ءبىز بارشا تۇرعىنداردى كاسپيدىڭ تازالىعىن ساقتاۋعا شاقىرامىز. تازا تەڭىز - ورتاق بايلىعىمىز،- دەدى ماڭعىستاۋ وبلىستىق تابيعي رەسۋرستار جانە تابيعات پايدالانۋدى رەتتەۋ باسقارماسىنىڭ باس مامانى ىلەس قىدىرباەۆ.

Abai.kz