قازاقستان پرەزيدەنتى قاسىم-جومارت توقاەۆ رەسمي ساپارمەن قىرعىزستانعا باردى. ماناس حالىقارالىق اۋەجايىندا ونى قىرعىزستان پرەزيدەنتى سادىر جاپاروۆ سالتاناتتى تۇردە قارسى الىپ، ەكى ەلدىڭ مەملەكەتتىك ءانۇراندارى شىرقالدى. پرەزيدەنتتەر قۇرمەت قاراۋىلى روتاسىنىڭ الدىنان ءوتىپ، رەسمي دەلەگاتسيا مۇشەلەرىمەن تانىستى.

ساپاردىڭ العاشقى كۇنى پرەزيدەنت «اتا بەيىت» ۇلتتىق تاريحي-مەموريالدىق كەشەنىنە زيارات ەتىپ، قىرعىز حالقىنىڭ داڭقتى پەرزەنتتەرى مەن ستاليندىك رەپرەسسيا قۇرباندارىنا قۇرمەت كورسەتتى. مەموريالدىق كەشەنگە اتاۋىن جازۋشى شىڭعىس ايتماتوۆ ۇسىنعان. توقاەۆ 1916 جىلعى ۇركىنشىلىك قۇرباندارىنا ارنالعان ەسكەرتكىشكە گۇل شوعىن قويىپ، قىرعىز حالقىنىڭ كەمەڭگەر جازۋشىسى شىڭعىس ايتماتوۆتىڭ بەيىتىنە زيارات جاساپ، قالامگەردىڭ رۋحىنا قۇران باعىشتادى.

ودان كەيىن «ىنتىماق وردو» رەزيدەنتسياسىندا پرەزيدەنت رەسمي دەلەگاتسيا مۇشەلەرىمەن تانىسىپ، ەكى ەل اراسىنداعى ساۋدا، ەكونوميكالىق ارىپتەستىك پەن وڭىرارالىق بايلانىستاردى دامىتۋ ماسەلەلەرىن تالقىلادى. ەرتەڭ ولار جوعارى مەملەكەتارالىق كەڭەستىڭ جەتىنشى وتىرىسىنا قاتىسادى.

بۇل ساپار ەكى باۋىرلاس حالىق اراسىنداعى ءداستۇرلى دوستىق پەن ستراتەگيالىق سەرىكتەستىكتى ودان ءارى نىعايتۋعا باعىتتالعان ماڭىزدى قادام بولىپ تابىلادى.

Abai.kz