ءاربىر مەملەكەت تۇراقتىلىقتى نىعايتۋعا جاۋاپكەرشىلىكپەن قاراپ، ديالوگ پەن كەلىسىم مادەنيەتىن ىلگەرىلەتۋ ارقىلى الەمدىك قاۋىپسىزدىككە ءوز ۇلەسىن قوسۋعا ءتيىس. بۇل قاعيداتتىڭ جاھاندىق سىن-قاتەرلەردى ەڭسەرۋدەگى ءرولى تۋرالى سەنات توراعاسى، الەمدىك جانە ءداستۇرلى دىندەر ليدەرلەرى سەزى حاتشىلىعىنىڭ باسشىسى ماۋلەن اشىمباەۆ Qogam News جوباسىنا بەرگەن سۇحباتىندا ايتتى. 

ماۋلەن اشىمباەۆتىڭ ايتۋىنشا، بۇگىندە الەمدىك جانە ءداستۇرلى دىندەر ليدەرلەرىءنىڭ سەزى قازاقستانعا حالىقارالىق قوعامداستىقتاعى قاۋىپسىزدىك پەن تۇراقتىلىقتى قامتاماسىز ەتۋگە ۇلەس قوسۋعا مۇمكىندىك بەرەتىن ءتيىمدى قۇرالداردىڭ ءبىرى بولىپ وتىر. 

«سەزد ءوزىنىڭ ءتيىمدى حالىقارالىق الاڭ ەكەنىن دالەلدەدى. قازاقستان بۇل باستامانى 20 جىلدان استام ۋاقىت بويى ىلگەرىلەتىپ كەلەدى. فورۋمنىڭ باستاۋىندا بولىپ، ونىڭ قالىپتاسىپ، دامۋىنا پرەزيدەنتىمىز قاسىم-جومارت كەمەلۇلى توقاەۆ ۇلكەن ۇلەس قوستى. بۇگىندە سەزدى الەمنىڭ باستى رۋحاني كوشباسشىلارى جينالاتىن، تانىمال ءارى بەدەلدى الاڭ دەپ تولىق سەنىممەن ايتا الامىز»، – دەدى الەمدىك جانە ءداستۇرلى دىندەر ليدەرلەرى سەزى حاتشىلىعىنىڭ باسشىسى.

ونىڭ ايتۋىنشا، 2022 جىلى وتكەن VII سەزد ءوزىنىڭ مازمۇنىمەن جانە قاتىسۋشىلاردىڭ جوعارى مارتەبەسىمەن ەستە قالدى. وعان قازىرگى الەمنىڭ باستى رۋحاني كوشباسشىلارى – ريم پاپاسى فرانتسيسك پەن ءال-ازحاردىڭ جوعارعى يمامى شەيح احمەد ات-تايەب قاتىستى. 

«ريم پاپاسى فرانتسيسك تەڭدىك يدەيالارىن دارىپتەۋگە، حالىقتىڭ الەۋمەتتىك وسال توپتارىنىڭ قۇقىقتارىن قورعاۋعا زور ۇلەس قوستى. يسلام جانە حريستيان الەمدەرى اراسىنداعى ءوزارا تۇسىنىستىكتى دامىتۋ باعىتىندا ماڭىزدى ماسەلەلەرگە ۇنەمى نازار اۋدارىپ وتىردى. VII سەزد اياسىندا ول قازاقستاندى ديالوگ پەن كەزدەسۋ الاڭى رەتىندە اتاپ، حالقىمىزدىڭ اشىقتىعى مەن ارالۋاندىقتاعى ءوزارا قۇرمەتىن جوعارى باعالادى. سونداي-اق يسلام الەمىنىڭ بەدەلدى ورتالىعى ءال-ازحاردىڭ جوعارعى يمامى شەيح احمەد ات-تايەب تە سەزگە قاتىستى. ول – قازىرگى يسلام الەمىندەگى اسا سىيلى تۇلعالاردىڭ ءبىرى. ونىڭ وسى سالاداعى ىرگەلى ەڭبەكتەرى كوپكە بەلگىلى. سەزدە قازىرگى زاماندا ديالوگ ايرىقشا ماڭىزعا يە ەكەنىن اتاپ ءوتتى. جالپى، VII سەزد الەمدىك دىندەر اراسىنداعى جاقىنداسۋ، ديالوگ قۇرۋ مادەنيەتىن دارىپتەۋگە تىڭ سەرپىن بەرگەن بىرەگەي فورۋم بولدى. سوندىقتان ءبىز VIII سەزدەن دە مازمۇندى ءارى اۋقىمدى ناتيجە كۇتەمىز»، – دەدى ماۋلەن اشىمباەۆ.

الداعى فورۋمنىڭ كۇن تارتىبىنە توقتالعان ماۋلەن اشىمباەۆ قازىرگى زاماننىڭ بىرقاتار وزەكتى ماسەلەسىنە نازار اۋداردى. ونىڭ ايتۋىنشا، اتالعان سىن-قاتەرلەردى ەڭسەرۋگە رۋحاني كوشباسشىلار جۇمىلدىرىلادى. 

تولىق سۇحباتتى مىنا سىلتەمە ارقىلى كورە الاسىز: [سىلتەمە]

Abai.kz