تۇركيا سوڭعى ون جىلدا قورعانىس ونەركاسىبىن دامىتۋدا ايتارلىقتاي ىلگەرىلەدى. سونىڭ ەڭ باستى دالەلى – وتاندىق نەگىزگى جاۋىنگەرلىك تانك Altay-دىڭ سەريالىق ءوندىرىسىن جولعا قويۋىن اتاپ ايتۋعا بولادى. بۇل تۇرىك اسكەري ءوندىرىسىنىڭ بۇگىنگى كۇندەگى ەڭ ءىرى ءارى ستراتەگيالىق ماڭىزى بار جوباسى. تانكتىڭ جاسالۋى ءۇشىن ارنايى جاڭا زاۋىت سالىنىپ، وندا كورپۋستان باستاپ سوڭعى بۇرانداسىنا دەيىنگى بارلىق بولشەكتەر شىعارىلدى.

BMC Defense كومپانياسى سالعان زاۋىتتا تانكتىڭ جۇرەگى سانالاتىن BATU قوزعالتقىشى دا وندىرىلەدى. كەزىندە تۇركيا جىلدار بويى ەۋروپا مەن كورەيادان قوزعالتقىش ساتىپ الىپ كەلگەن-ءدى. ەندى قۋاتى 400-دەن 1500 ات كۇشىنە دەيىنگى وتاندىق قوزعالتقىش جاساۋ ءىسى جولعا قويىلدى.

Altay جوباسىنىڭ تاريحى دا وڭاي ەمەس. اۋەلگى يدەياسى 1990-جىلدارى تۋعانىمەن، ناقتى كەلىسىمدەر تەك 2010 جىلداردان كەيىن قوزعالا باستادى. 2013 جىلى العاشقى پروتوتيپ جاسالىپ، تالاي سىناقتان ءوتتى. بىراق ءتۇرلى سەبەپتەرمەن ءوندىرىس كەشەۋىلدەگەنىن بىلەمىز.

اقىرى 2018 جىلى تۇركيا قورعانىس ونەركاسىبى باسقارماسى BMC كومپانياسىنا كەلىسىمشارت بەرىپ، ناقتى قادام جاسادى. 2023 جىلى اسكەريلەر العاشقى ۇلگىلەرىن سىناپ كورسە، 2024 جىلى تولىققاندى سەريالىق ءوندىرىس تۋرالى كەلىسىم جاسالدى.

جوسپارعا سايكەس، العاشقى ءۇش تانك وسى جىلى اسكەرگە جەتكىزىلەدى. كەلەسى جىلى تاعى 11 ماشينا تاپسىرىلماق. ال ەكى جىلدان سوڭ بۇل كورسەتكىش 41-گە جەتىپ، كەيىن جىلىنا شامامەن 30 تانك تۇراقتى تۇردە وندىرىستەن شىعىپ تۇرادى. دەمەك، تۇرىك ارمياسى الداعى ون جىلدا جۇزدەگەن جاڭا بۋىندى تانكپەن قارۋلانباق.

Altay-دىڭ ەرەكشەلىگى تەك قۋاتتى قوزعالتقىشىندا عانا ەمەس. ول كورەيانىڭ K2 تانكتەرىندە قولدانىلاتىن زاماناۋي برونمەن جابدىقتالادى. بۇل – تۇرىك اسكەري تەحنيكاسىن الەمدىك ستاندارتقا جاقىنداتا تۇسەتىن ارتىقشىلىق. سونىمەن قاتار، تسيفرلىق باسقارۋ جۇيەلەرى مەن زاماناۋي قارۋ-جاراقپەن جاراقتالعان Altay تۇركيانى تەك ايماقتا عانا ەمەس، حالىقارالىق قارۋ نارىعىندا دا مىقتى ويىنشىعا اينالدىرۋى ىقتيمال.

نۇرلان جۇماقانوۆ

Abai.kz