تۇركىستان قالاسىندا مەملەكەت باسشىسىنىڭ تاپسىرماسىن ورىنداۋ اياسىندا بىرەگەي سپورت نىسانى – ەسۋ ارناسى پايدالانۋعا بەرىلدى.

سپورت كەشەنىنىڭ ورتالىق ازيادا تەڭدەسى جوق جانە تولىقتاي حالىقارالىق كانوە فەدەراتسياسى (ICF) مەن حالىقارالىق اكادەميالىق ەسۋ فەدەراتسياسىنىڭ (FISA) ستاندارتتارىنا سايكەس كەلەدى. نىساننىڭ اشىلۋ سالتاناتىنا قازاقستانعا ارنايى كەلگەن ICF پرەزيدەنتى توماس كونيەتستسكو سپورت كەشەنىنە جوعارى باعاسىن بەردى.

«بۇگىن مەملەكەت باسشىسىنىڭ تاپسىرماسى بويىنشا ەلىمىزدەگى ەڭ ءىرى سپورت نىساندارىنىڭ ءبىرىن اشىپ وتىرمىز. قۇرىلىسى حالىقارالىق تالاپتارعا ساي جۇرگىزىلگەن بۇل سپورت كەشەنىندە ەندى حالىقارالىق جارىستاردى قابىلداي الامىز. نىسان تەك كاسىبي سپورتشىلارعا عانا ەمەس، قالا تۇرعىندارىنا دا قولجەتىمدى. ءوڭىر تۇرعىندارى ءۇشىن مۇندا ۆولەيبول، فۋتبول، باسكەتبول الاڭدارى مەن قالالىق جاعاجاي اشىلادى»، – دەدى تۋريزم جانە سپورت ءمينيسترى ەربول مىرزابوسىنوۆ سالتاناتتى اشىلۋ راسىمىندە.

سۋرەت: قر سپورت جانە تۋريزم مينيسترلىگىنەن الىندى.

قازىرگى تاڭدا ەلىمىزدىڭ 12 وڭىرىندە اكادەميالىق ەسۋ، بايداركا مەن كانوەدە ەسۋ، ەسۋ سلالومى سپورتى دامىپ كەلەدى. بۇل سپورت تۇرلەرىمەن جۇيەلى تۇردە 6 131 ادام اينالىسادى. ولارمەن 174 جاتتىقتىرۋشى جۇمىس ىستەيدى.

اكادەميالىق ەسۋ – ەڭ كوپ مەدال جۇلدە ساراپقا سالىناتىن سپورت تۇرلەرىنىڭ ءبىرى. ماسەلەن، وليمپيادادا 14 جيىنتىق مەدال ۇلەستىرىلەدى. ال الەم چەمپيوناتتارىندا 20-دان اسا باعدارلاما بار. وسىلايشا ءبىر ەلدىڭ سپورتشىسى ءبىر مەزەتتە بىرنەشە ساناتتا جۇلدە الىپ، ءوز مىقتىلىعىن دالەلدەي الادى.

بىرنەشە باعدارلاما ارقاسىندا اكادەميالىق ەسۋ ءارى جەكە شەبەرلىكتى، ءارى كوماندالىق جۇمىستى دامىتۋعا مۇمكىندىك بەرەدى. تۇركىستانداعى ەسۋ ارناسىنىڭ جالپى اۋماعى – 100 گەكتار، ۇزىندىعى شامامەن 2,5 شاقىرىم. بىرەگەي سپورت كەشەنى اكادەميالىق ەسۋ، بايداركا مەن كانوە بويىنشا الەمدىك دەڭگەيدەگى جارىستاردان باستاپ الەم جانە ازيا كۋبوگىنە دەيىنگى تۋرنيرلەردى وتكىزۋگە جانە سپورتشىلاردىڭ تۇراقتى جاتتىعۋ جاساۋىنا مۇمكىندىك بەرەدى.

سونىمەن قاتار ارنا سۋى قالاداعى سۋارمالى جۇيەگە، جاسىل بەلدەۋدى سۋارۋعا قولدانىلادى. ال ارنا اۋماعىندا ۇزىندىعى 1 شاقىرىمدىق قالالىق جاعاجاي، قوناق ءۇي، كورەرمەندەرگە ارنالعان تريبۋنا ورنالاسقان.

جوبا تۇركىستاننىڭ سپورتتىق، ەكولوگيالىق جانە تۋريستىك دامۋىنا زور ۇلەس قوسادى ءارى ەلىمىزدەگى اكادەميالىق ەسۋ سپورتىنىڭ جان-جاقتى وركەندەۋىنە جاعداي جاسايدى.

تۇركىستانداعى ەسۋ ارناسى ۇلتتىق قۇرامالاردى دايارلايتىن جانە جاس سپورتشىلاردى تاربيەلەيتىن نەگىزگى ينفراقۇرىلىمدىق ورتالىققا اينالماق.

ايتا كەتەيىك، سپورت ينفراقۇرىلىمىن دامىتۋ – مەملەكەتتىك ساياساتتىڭ باسىم باعىتتارىنىڭ ءبىرى. بيىل جىل سوڭىنا دەيىن تاعى ءبىر ءىرى نىسان – استاناداعى ۇلتتىق سپورت ۋنيۆەرسيتەتى پايدالانۋعا بەرىلەدى دەپ جوسپارلانعان.

Abai.kz