مەملەكەت باسشىسى قاسىم-جومارت كەمەلۇلى توقاەۆتىڭ تاپسىرماسىمەن ءماجىلىس سپيكەرى ەرلان قوشانوۆ قاتار استاناسى دوحادا وتكەن توتەنشە اراب-يسلام سامميتىنە قاتىستى. القالى جيىندا پالاتا توراعاسى ءسوز سويلەپ، حالىقارالىق قاقتىعىستاردى رەتتەۋ بويىنشا مەملەكەتىمىزدىڭ ۇستانىمدارىن ورتاعا سالدى.

سۋرەتتى تۇسىرگەن: ج. جۇمابەكوۆ.

سامميت بارىسىندا ەرلان قوشانوۆ قاتار ءامىرى شەيح ءتاميم بەن حاماد ءال تانيمەن جەكە كەزدەسىپ،  قازاقستان پرەزيدەنتى قاسىم-جومارت توقاەۆتىڭ شىنايى سالەمى مەن ىزگى تىلەكتەرىن جەتكىزدى.

قاتار ءامىرى يزرايل بيلىگى جاساعان اسكەري ارەكەتكە قاتىستى قازاقستاننىڭ ۇستانىمىن جوعارى باعالاپ، ريزاشىلىعىن ءبىلدىردى.

سۋرەتتى تۇسىرگەن: ج. جۇمابەكوۆ.

– قازاقستاننىڭ بۇل ارەكەتتى العاشقى بولىپ ايىپتاپ، قاتارعا قولداۋ بىلدىرگەنىن جاقسى بىلەمىن. سول ءۇشىن العىسىمىز زور. قازاقستان پرەزيدەنتىمەن ەرەكشە باۋىرلىق، دوستىق قارىم-قانىتاسىمىز بار. سونى مەن ماقتان تۇتامىن. بۇگىنگى سامميتە قازاق دەلەگاتسياسىنىڭ وسىنداي جوعارى دەڭگەيدە قاتىسقانى ءبىز ءۇشىن وتە ماڭىزدى، – دەدى قاتار ءامىرى.

سامميت وتىرىسىندا ءسوز سويلەگەن ءماجىلىس توراعاسى قازىرگى تاڭدا تاياۋ شىعىس ايماعى ۇلكەن گەوساياسي قيىندىقتارعا تاپ بولعانىن ايتىپ، بۇگىنگى سامميت حالىقارالىق احۋالدىڭ كۇرت ناشارلاۋىمەن بايلانىستى ەكەنىنە نازار اۋداردى.

– قازاقستان ءيزرايلدىڭ قاتار مەملەكەتى اۋماعىنداعى اسكەري ءىس-ارەكەتىن قاتاڭ ايىپتايدى. بۇل ۇستانىمدى پرەزيدەنتىمىز قاسىم-جومارت كەمەلۇلى توقاەۆ العاشقى بولىپ مالىمدەپ، قاتار مەملەكەتىنە تاباندى قولداۋىن ءبىلدىردى. جاسالعان شابۋىل قانداي ماقساتتى كوزدەسە دە، مۇنداي ارەكەتتەرگە جول بەرىلمەۋگە ءتيىس. بۇل قاتار مەملەكەتىنىڭ ەگەمەندىك قۇقىعىن بۇزادى جانە حالىقارالىق قۇقىق قاعيداتتارىنا قايشى كەلەدى. وسىنداي شابۋىل مەملەكەتتىڭ قاۋىپسىزدىگىنە عانا ەمەس، حالىقارالىق ءتارتىپتىڭ نەگىزىن باسشىلىققا الاتىن مەملەكەتتەردىڭ تەڭدىگى مەن ەگەمەندىگىنە دە نۇقسان كەلتىرەدى, – دەدى ەرلان قوشانوۆ.

سۋرەتتى تۇسىرگەن: ج. جۇمابەكوۆ.

ءماجىلىس سپيكەرى قاتاردىڭ ءوز بىتىمگەرشىلىك ساياساتى ارقاسىندا جاھاندىق تۇراقتىلىق پەن قاۋىپسىزدىكتى قامتاماسىز ەتۋگە وراسان ۇلەس قوسىپ كەلەتىنىن اتاپ ءوتىپ،  حالىقارالىق قاقتىعىستار مەن جانجالداردى رەتتەۋ ماسەلەسى بويىنشا قازاقستاننىڭ ۇستانىمدارىن ورتاعا سالدى.

– كەز-كەلگەن داعدارىس بىرىككەن ۇلتتار ۇيىمىنىڭ جارعىسى مەن حالىقارالىق قۇقىق نورمالارى نەگىزىندە بەيبىت ديالوگ ارقىلى شەشىلۋى كەرەك. قازاقستان پرەزيدەنتى قاقتىعىستاردى شەشۋدە وسى قاعيدالاردى تولىققاندى قولدانۋعا، ولاردىڭ مىزعىماستىعىن قامتاماسىز ەتۋگە شاقىرىپ كەلەدى. اسكەري كۇش قولدانۋ تەك زورلىق-زومبىلىقتىڭ جاڭا تولقىنىن تۋعىزادى، بەيكۇنا جانداردىڭ قازاسىنا اكەپ سوقتىرادى, – دەدى ەرلان قوشانوۆ.

وسى ورايدا ءماجىلىس توراعاسى گازادا بولىپ جاتقان قايعىلى وقيعالارعا دا توقتالىپ ءوتتى.

سۋرەتتى تۇسىرگەن: ج. جۇمابەكوۆ.

قازاقستان پرەزيدەنتى اۋەل باستان گازا سەكتورىنداعى اسكەري ارەكەتتەردى دەرەۋ توقتاتۋعا جانە ونىڭ تۇرعىندارىنا گۋمانيتارلىق كومەك كورسەتۋگە تۇراقتى تۇردە شاقىرىپ كەلەدى. ەلىمىز گازاعا قارجىلاي جانە ماتەريالدىق كومەك كورسەتۋدە.

بۇل ءۇردىس بيىل قاڭتار ايىندا شتاب-پاتەرى استانادا ورنالاسقان ازىق-تۇلىك قاۋىپسىزدىگى جونىندەگى يسلام ۇيىمى ارقىلى دا جالعاستى. وسى تۇرعىدا ەرلان قوشانوۆ پالەستينا حالقىنا گۋمانيتارلىق كومەكتى ارتتىرۋ ءۇشىن يسلام ەلدەرىن اتالعان ۇيىمنىڭ الەۋەتىن پايدالانۋدىڭ ماڭىزدىلىعىن اتاپ ءوتتى.

سونىمەن بىرگە سامميت الاڭدارىندا ءماجىلىس سپيكەرى قاتار مەملەكەتىنىڭ پرەمەر-ءمينيسترى – سىرتقى ىستەر ءمينيسترى شەيح مۇحاممەد بەن ابدۋلراحمان ءال تانيمەن پىكىر الاماسىپ، ەكى ەل اراسىنداعى ىنتىماقتاستىقتى جوعارى باعالادى.

Abai.kz