قازاقستان رەسپۋبليكاسىنىڭ دەنساۋلىق ساقتاۋ مينيسترلىگى مەديتسينالىق ءتۋريزمنىڭ نەگىزگى باعىتتارىنىڭ ءبىرى رەتىندە ساناتورلىق-كۋرورتتىق ايماقتاردى دامىتۋعا باعىتتالعان كەشەندى شارالاردى جۇزەگە اسىرۋدا.

مەديتسينالىق ءتۋريزمدى دامىتۋ اياسىندا جىل بويى ەمدىك-ساۋىقتىرۋ قىزمەتتەرىنىڭ ۇسىنىسىن كەڭەيتۋ ماقساتىندا مەديتسينالىق ۇيىمدار، ساناتوريلەر مەن تۋروپەراتورلار اراسىندا ىنتىماقتاستىقتى نىعايتۋ كوزدەلگەن.

سۋرەت: قر دەنساۋلىق ساقتاۋ مينيسترلىگىنىڭ تەلەگرام ارناسىنان الىندى.

بۇگىندە قازاقستاننىڭ ساناتورلىق-كۋرورتتىق ۇيىمدارىنا جىل سايىن شامامەن جارتى ميلليون ادام كەلەدى. الداعى جىلدارى بۇل كورسەتكىشتى ينفراقۇرىلىمدى جەتىلدىرۋ، «Kazakhstan Health Travel» برەندىن ىلگەرىلەتۋ جانە شەتەلدىك پاتسيەنتتەردى تارتۋ ارقىلى ارتتىرۋ جوسپارلانۋدا.

«ءبىزدىڭ تابيعي بايلىقتارىمىز — ەل يگىلىگى عانا ەمەس، حالىق دەنساۋلىعىن نىعايتۋدىڭ جانە مەديتسينالىق ءتۋريزمدى دامىتۋدىڭ ستراتەگيالىق قۇرالى. قازاقستان ورتالىق ازياداعى ساناتوريلىك-كۋرورتتىق ەمدەۋدىڭ ورتالىعىنا اينالۋعا تولىق الەۋەتكە يە»،—دەدى دەنساۋلىق ساقتاۋ ءمينيسترى اقمارال ءالنازاروۆا بۇگىن استانادا وتكەن «قازاقستان رەسپۋبليكاسىنداعى مەديتسينالىق ءتۋريزمدى دامىتۋ: بولاشاعى مەن مۇمكىندىكتەرى» اتتى العاشقى حالىقارالىق كونفەرەنتسيادا سويلەگەن سوزىندە.

سۋرەت: قر دەنساۋلىق ساقتاۋ مينيسترلىگىنىڭ تەلەگرام ارناسىنان الىندى.

فورۋم بارىسىندا اتاپ وتكەندەي، ەلىمىزدىڭ ستراتەگيالىق ارتىقشىلىعى — قايتالانباس تابيعي-كليماتتىق الەۋەتىندە. تاۋلى ايماقتىڭ تازا اۋاسى، ەمدىك كولدەر، مينەرالدى جانە تەرمالدى سۋلاردىڭ بىرەگەي ۇيلەسىمى شەتەلدىك پاتسيەنتتەر مەن مەديتسينالىق تۋريستەردىڭ ەرەكشە قىزىعۋشىلىعىن تۋدىرادى.

وسى تابيعي فاكتورلار قالپىنا كەلتىرۋ مەديتسيناسى، وڭالتۋ جانە اۋرۋلاردىڭ الدىن الۋ سالالارىن بىرىكتىرەتىن ماڭىزدى نەگىزگە اينالۋدا.

سۋرەت: قر دەنساۋلىق ساقتاۋ مينيسترلىگىنىڭ تەلەگرام ارناسىنان الىندى.

Abai.kz