2025 جىلعى 16 شىلدەدە مەملەكەت باسشىسى قىلمىستىق زاڭنامانى وڭتايلاندىرۋ ماسەلەلەرى جونىندەگى زاڭعا قول قويدى.

اتاپ ايتقاندا، ازاماتتاردىڭ قاۋىپسىزدىگىن قامتاماسىز ەتۋ شارالارىن كۇشەيتۋ، سونىڭ ىشىندە جەكە ومىرگە قول سۇعاتىن، بىراق كۇش قولدانۋسىز جاسالاتىن قۇقىققا قارسى ارەكەتتەردىڭ اسا اۋىر قىلمىستارعا ۇلاسۋىن بولدىرماۋ ماقساتىندا قىلمىستىق كودەكسكە ستالكينگ ءۇشىن قىلمىستىق جاۋاپتىلىق ەنگىزىلدى (قك-ءتىڭ جاڭا 115-1-بابى).

ستالكينگ - زورلىق-زومبىلىقپەن بايلانىستى ەمەس ادامنىڭ زاڭسىز قۋدالانۋى رەتىندە ايقىندالعان. مۇنداي ارەكەتتە زورلىق بەلگىلەرى بولماعاندىقتان ستالكينگ قىلمىستىق تەرىس قىلىقتار ساناتىنا جاتقىزىلدى.

بۇل باپتىڭ ماقساتى - فيزيكالىق كۇش قولدانۋعا نەمەسە اشىق قاۋىپ-قاتەرگە بارماعان قۋدالاۋشىلاردان ىقتيمالى جوعارى قۇربانداردى قورعاۋ. قولدانىقسا ەنگىزىلگەننەن باستاپ (16.09.2025ج. باستاپ) ەلىمىزدە ستالكينگ فاكتىلەرى بويىنشا 2 قىلمىستىق ءىس تىركەلدى (اتىراۋ جانە پاۆلودار وبلىستارىندا).

ايتا كەتۋ كەرەك، ستالكينگ جاساعان ادامدارعا 200 اەك-كە دەيىن ايىپپۇل سالۋ، نە سول مولشەردە تۇزەۋ جۇمىستارىنا، نە 200 ساعاتقا دەيىنگى مەرزىمگە قوعامدىق جۇمىستارعا تارتۋ، نە 50 تاۋلىككە دەيىن قاماۋعا الۋ تۇرىندەگى جازا كوزدەلگەن.

سونداي-اق ايەلدەردىڭ قۇقىقتارىن قورعاۋدى كۇشەيتۋ شارالارى اياسىندا وسى زاڭمەن نەكە قيۋعا ماجبۇرلەۋ ءۇشىن دە قىلمىستىق جاۋاپتىلىق ەنگىزىلدى (قك-ءتىڭ جاڭا 125-1-بابى).

ەگەر ايەل ادام ۇرلانىپ، كۇش قولدانۋ قاۋپىمەن نەمەسە مۇلكىن جويۋ نە ءبۇلدىرۋ قاتەرىمەن نەكە قيۋعا ماجبۇرلەنسە، كىنالى ادامعا 2000 اەك-كە دەيىن ايىپپۇل سالۋ، نە ءدال سول مولشەردە تۇزەۋ جۇمىستارىنا تارتۋ، نە 2 جىلعا دەيىنگى مەرزىمگە بوستاندىعىن شەكتەۋ، نە سول مەرزىمگە باس بوستاندىعىنان ايىرۋ تۇرىندەگى جازا كوزدەلگەن.

ابايسىزدا اۋىر زارداپتار تۋىنداعان جاعدايدا - كىنالى ادام 5 جىلدان 10 جىلعا دەيىن باس بوستاندىعىنان ايىرۋ جازاسىنا تارتىلادى.

نەكە قيۋعا ماجبۇرلەۋ فاكتىلەرى بويىنشا العاشقى قىلمىستىق ىستەر شىمكەنت قالاسىندا، قىزىلوردا، اقتوبە جانە ماڭعىستاۋ وبلىستارىندا تىركەلدى.

ايتا كەتەرلىگى، ەكى جاعدايدا جابىرلەنۋشىلەر كامەلەتكە تولماعاندار بولعان. اتالعان فاكتىلەر بويىنشا تەرگەۋ جالعاسۋدا جانە پروكۋراتۋرا ورگاندارىنىڭ باقىلاۋىندا تۇر.

Abai.kz