دۇيسەنبى, 20 قازان 2025
الاساپىران 161 0 پىكىر 20 قازان, 2025 ساعات 13:00

ءبىر سوعىستا ەكى جەڭىمپاز بولمايدى!

سۋرەت: lrt.lt سايتىنان الىندى.

وتكەن جۇما الەم نازارى تاعى اق ۇيگە اۋدى. ترامپ پەن زەلەنسكي جولىقتى. قوس ەلدىڭ باسشىلارى اۋەلى باق الدىندا ەمەن-جارقىن اڭگىمەلەستى. زەلەنسكي ترامپقا العىس بىلدىرسە، ترامپ زەلەنسكيدى «كوپ قيىندىققا شىداپ كەلە جاتقان مىقتى ليدەر» دەپ ماقتادى. ونان سوڭ كەزدەسۋ جابىق ەسىكتىڭ ارعى جاعىندا جالعاستى. ۇزىن-ىرعاسى 2,5 ساعاتقا سوزىلدى.

ءبىرىنشى اڭگىمە - پۋتينمەن كەزدەسۋ:

ترامپ جاريا اڭگىمە كەزىندە پۋتينمەن كەزدەسۋ تۋرالى: «پۋتينمەن ۆەنگريادا جولىعامىز. سەبەبى ۆيكتور ورباندى مەن دە، پۋتين دە جاقسى كورەمىز. ول مىقتى ليدەر جانە كەزدەسۋىمىزدى ۇيىمداستىرا الادى. ۆەنگريا پۋتين ءۇشىن دە قاۋىپسىز جەر بولماق»، - دەدى.

ونان سوڭ: «پۋتين سوعىستى توقتاتقىسى كەلەدى. ويتپەسە، ول ونى نەگە ايتادى. زەلەنسكي دە سوعىستى توقتاتقىسى كەلەدى. ءبىز ونى كورىپ وتىرمىز»، - دەدى.

ال زەلەنسكي كەرىسىنشە: «ءبىز سوعىستىڭ تەزىرەك توقتاعانىن قالايمىز. ال پۋتين مۇنى قالامايدى. سوندىقتان، رەسەيگە قىسىمدى ارتتىرۋ كەرەك»، - دەدى.

ەكىنشى اڭگىمە - Tomahawk زىمىرانى تۋرالى:

ترامپ: «ۋكرايناعا كوپ قارۋ بەرىلەدى. بىراق، سوعىستى Tomahawk-سىز تامامداعان دۇرىس. ءبىز سوعان جاقىن سياقتىمىز»، - دەدى.

زەلەنسكي ترامپقا ۇسىنىس جاساپ، «Tomahawk زىمىرانىن مىڭداعان درونعا ايىرباستاۋدى» ۇسىندى. ترامپ بۇعان قىزىعۋشىلىق ءبىلدىرىپ: «راس، بۇل ءتيىمدى ۇسىنىس. ءبىز ءوزىمىز دە درون شىعارامىز. وزگەلەردەن دە ساتىپ الامىز. ال ۋكراينانىڭ دروندارى شىنىمەن مىقتى دروندار»، - دەدى.

ال جابىق ەسىكتەگى اڭگىمەدەن كەيىن زەلەنسكي: «Tomahawk - باسى اشىق ماسەلە. ازىرگە اقش جاعدايدى ۋشىقتىرعىسى كەلمەيدى. بىراق، بۇل ءبىرجولا بەرمەيدى دەگەن ءسوز ەمەس. بۇل زىمىرانداردى بەرۋ ماسەلەسى ءالى اڭگىمە بولادى»، - دەدى.

ءۇشىنشى اڭگىمە - ۋكراينا تەرريتورياسى تۋرالى:

اشىق اڭگىمە بارىسىندا ترامپ: «ۋكراينانىڭ ەندى 1991 جىلدىڭ شەكاراسىنا شىعۋى ەكىتالاي»، - دەپ سويلەگەن.

ال جالپى كەزدەسۋدەن سوڭ: «سوعىستى وسى جەتكەن جەردە اياقتاۋ قوس تاراپقا دا ءتيىمدى بولادى»، - دەپ سويلەدى.

ال پرەزيدەنت زەلەنسكي: «ۋكراينا تەرريتورياسىن ۋكرايناسىز ەشكىم شەشپەيدى. رەسەيمەن كەلىسسوزدىڭ ەڭ قيىن تۇسى - تەرريتوريا ماسەلەسى. ءسوز بولىپ وتىرعان تەرريتوريا - ۋكراينانىكى، بىزدىكى. پۋتين ۋكراينانى تۇتاس العىسى كەلدى. ونىڭ ءداپ قازىر ۋكراينانى تۇتاس الماعانىنىڭ سەبەبى نيەتىنىڭ جوقتىعى ەمەس، شاماسىنىڭ وسى بولعانى»، - دەدى.

ترامپتىڭ قورىتىندى ءسوزى:

ترامپ: «زەلەنسكيمەن كەزدەسۋ مازمۇندى، قىزىقتى، جاقسى ءوتتى. مەن پرەزيدەنت پۋتينگە ايتقانىمدى پرەزيدەنت زەلەنسكيگە دە ايتتىم. سوعىستى توقتاتىپ، كەلىسىمگە كەلەتىن ۋاقىت كەلدى.

قازىرگە دەيىن جەتكىلىكتى قان توگىلدى. ال مەنشىك شەكاراسىن سوعىس پەن سوعىستاعى ەرلىك انىقتايدى. ولارعا قازىرگى جەتكەن جەردە توقتاعان دۇرىس!

ەكەۋى دە وزدەرىن جەڭىمپاز دەپ جاريالاسىن. قالعانىن تاريح ءوزى انىقتايدى. اتىستى، ءولىمدى، سوعىسقا قيساپسىز جۇمسالىپ جاتقان شىعىندى توقتاتۋ كەرەك!

ەگەر مەن 2022 جىلى پرەزيدەنت بولسام، بۇل سوعىس مۇلدە باستالماس ەدى. ءار اپتا سايىن مىڭداعان ادام ءولىپ جاتىر. جەتەر وسىمەن. بەيبىتشىلىكتى تۋ ەتىپ، وتباسىلارىڭا ورالىڭدار»، - دەدى.

ترامپ بۇل سوزدەردى ءوزىنىڭ الەۋمەتتىك جەلىدەگى پاراقشاسىندا جازدى.

زەلەنسكيدىڭ جاۋابى:

ال بۇعان پرەزيدەنت زەلەنسكي: «ترامپ دۇرىس ايتادى. ءبىز تۇرعان جەرىمىزدە توقتاۋىمىز كەرەك. ۋكراينا وتە ۇلكەن ەلگە قارسى سوعىسىپ جاتىر. ماسەلە بىزدە ەمەس، ماسەلە پۋتيندە. ول ءبىزدىڭ جەرىمىزگە قايتا سوعىس باستاپ كەلمەۋى ءۇشىن بىزگە وتە سەنىمدى، مىعىم قاۋىپسىزدىك كەپىلدىگى قاجەت. الدىمەن ۇرىس قيمىلدارى توقتاۋى قاجەت، ارتىنشا ناقتى كەلىسسوزدەر ءوتۋى شارت»، - دەدى.

قوسىمشا: زەلەنسكي: «پۋتين مەنى جەك كورەدى. مەن دە ونى جەك كورەم. بىراق، اڭگىمە مەنىڭ جەكە باسىمدا ەمەس. ولار بىزگە سوعىس اشتى. ءبىزدى، ءبارىمىزدى ولتىرگىسى كەلەدى. دەمەك - ول ءبىزدىڭ جاۋىمىز. ولار كۇن سايىن ءبىزدىڭ ادامدارىمىزدى ولتىرۋدە جانە توقتاعىسى جوق. دەمەك - ول ءبىزدىڭ جاۋىمىز. جەك كورۋدىڭ سەبەبى وسى. باسقاشا بولۋى مۇمكىن ەمەس»، - دەدى.

جەر بەرۋگە قوس تاراپ تا كونبەيدى!

ءتۇيىن: ترامپ پەن زەلەنسكي كەلەر اپتادا تاعى سويلەسپەك. ال تەرريتوريا ماسەلەسى – «ايتتىم - ءبىتتى، كەستىم – ۇزىلدىمەن» شەشىلە سالاتىن ماسەلە ەمەس. رەسەي اسكەر كىرگىزىپ، قانقاساپ جاساپ جاتقان جەرلەر - دونباسس (لۋگانسكى مەن دونەتسكى), حەرسون مەن زاپوروج ۋكراينانىڭ جەرى. حالىقارالىق قاۋىمداستىق مويىنداعان اۋماقتار. بۇعان تاعدىرى تالاۋعا ەرتە تۇسكەن قىرىمدى دا قوسىڭىز. ۋكراينا سوعىستىڭ جەتكەن جەرىنەن ۇرىستى توقتاتىپ، كەلىسسوزگە وتىرۋعا كونگەنىمەن، ونى رەسەيدىكى دەپ مويىنداي سالۋعا كونە قويمايدى. ەگەر وپ-وڭاي كونەر بولسا، 4 جىلعا جۋىق نەگە كۇرەستى؟ نەگە سوعىستى؟ جۇزدەگەن مىڭ ادامنىڭ قانى نەگە توگىلدى؟ بۇل زاڭدىق جاعىنان دا، مورالدىق جاعىنان دا وڭاي شەشىلەتىن ماسەلە ەمەس!

بۇل جەرلەردى رەسەي دە پسەۆدورەفەرەندۋم وتكىزىپ، ءوز كونستيتۋتسياسىنا قوسىپ العان (2014-تە). دەمەك، اتالعان 4 وبلىستى جارىم-جارتىلاي ۋكرايناعا بەرۋگە پۋتين ولسە كونبەيدى. رەسەيدىڭ اش-جالاڭاش، جىلتىر كوتەن، جالاڭبۇت قوعامى كرەملدەن: «الاقانداي 4 وبلىستى 4 جىل سوعىسىپ نەگە تۇگەل الا المادىڭ؟ ءبىز ءوزىمىز اشقۇرساق قالساق تا، قازىنانى سوعىسقا جۇمساعانىڭا نەگە كوندىك؟» دەگەن سۇراۋدىڭ سان ءتۇرىن جاقسىلاپ سۇرايدى. ازىردەن مۇنداي سوزدەر ايتىلۋدا. ءتىپتى، سولاي بولعان كۇنى پريگوجين سەكىلدىلەر ماسكەۋگە قايتا جورىققا شىعۋى عاجاپ ەمەس. ويتكەنى رەسەي يدەولوگياسى سوعىس اگيتاتسياسىنا نەگىزدەلگەن. قوعامى ميليتاريستىك-يمپەرياليستىك ۇگىتپەن تاربيەلەنگەن. ال اسكەري قۇرىلىمىندا ءتۇرلى توپتار مەن تۇلعالار سوعىستى تۇراقتى تابىس كوزىنە اينالدىرعان. ولار ەرتەڭ كەشەگى پريگوجيننىڭ «ەرلىگىن» قايتالاپ، بيلىك جۇيەسىن جاعادان الۋعا ابدەن دايىن وتىر. سوندىقتان، ترامپتىڭ ۇسىنىسىنا ءپۋتيننىڭ كونە سالۋى دا ەكىتالاي…

Abai.kz

0 پىكىر

ۇزدىك ماتەريالدار

46 - ءسوز

پروفيلاكتيكا بىتوۆوگو ناسيليا

الماز ەششانوۆ 1000
قاۋىپ ەتكەننەن ايتامىن

جاۋ جوق دەمە – جار استىندا...

قۋات قايرانباەۆ 10297