مەملەكەت باسشىسىنىڭ تاپسىرماسىنا سايكەس قازاقستاندا حالىقتى 100 پايىز تازا اۋىزسۋمەن قامتۋ ماقساتىندا ەلدى مەكەندەردە سۋ قۇبىرى جۇيەلەرىن سالۋ جانە قايتا جاڭارتۋ جۇمىستارى جۇرگىزىلىپ جاتىر.

قۇرىلىس جانە تۇرعىن ءۇي-كوممۋنالدىق شارۋاشىلىق ىستەرى كوميتەتىنىڭ توراعاسى باقىتجان جۇنىسبەكوۆتىڭ ايتۋىنشا، مەملەكەت تەك اۋىزسۋ مەن كارىز جۇيەلەرىنىڭ ساپاسىن جاقسارتىپ قانا قويماي، سۋ ءتاريفىن تومەندەتۋ باعىتىندا دا ناقتى شارالار قابىلداپ وتىر.

سۋ كودەكسى تالاپتارىنا ساي، اۋىزسۋدى جەتكىزۋ قىزمەتىنىڭ قۇنىن سۋبسيديالاۋ – مەملەكەتتىك قولداۋدىڭ نەگىزگى تەتىكتەرىنىڭ ءبىرى. بۇل حالىقتىڭ اۋىزسۋعا قولجەتىمدىلىگىن ارتتىرۋعا مۇمكىندىك بەرەدى، — دەدى ول ورتالىق كوممۋنيكاتسيالار قىزمەتىندە وتكەن ءباسپاسوز ءماسليحاتىندا.

جۇنىسبەكوۆتىڭ ايتۋىنشا، وسى باعىتتاعى قولداۋدى قامتاماسىز ەتۋ ءۇشىن مينيسترلىك ءۇش ماڭىزدى نورماتيۆتىك-قۇقىقتىق اكتىنى بەكىتكەن:

• اۋىزسۋدى جەتكىزۋ قىزمەتىنىڭ قۇنىن سۋبسيديالاۋ قاعيدالارى;
• اۋىزسۋدىڭ ءبىر تەكشە مەترىنىڭ وزىندىك قۇنىن ەسەپتەۋ ادىستەمەسى;
• ەلدى مەكەندەردىڭ سۋ جۇيەلەرىن سۋبسيديالاۋ تىزىمىنە ەنگىزۋ كريتەريلەرى.

بۇل شارالار ەلدىڭ بارلىق وڭىرىندە تۇرعىندارعا ساپالى ءارى قولجەتىمدى اۋىزسۋ جەتكىزۋدى قامتاماسىز ەتۋگە باعىتتالعان.

Abai.kz