قر ەڭبەك جانە حالىقتى الەۋمەتتىك قورعاۋ ءمينيسترى سۆەتلانا جاقىپوۆا قر ورتالىق سايلاۋ كوميسسياسى جانىنداعى مۇگەدەكتىگى بار ادامداردىڭ سايلاۋ قۇقىقتارىن قامتاماسىز ەتۋ جونىندەگى جۇمىس توبىنىڭ وتىرىسىنا قاتىستى. ءىس-شارا اياسىندا تاراپتار مۇگەدەكتىگى بار ازاماتتار ءۇشىن سايلاۋ پروتسەسىنىڭ قولجەتىمدىلىگىن قامتاماسىز ەتۋگە باعىتتالعان بىرلەسىپ ازىرلەنگەن جول كارتاسىنا قول قويدى.

وتىرىستا ءسوز سويلەگەن مينيستر قازاقستاننىڭ بارلىق ازاماتتار ءۇشىن تەڭ قۇقىقتار مەن مۇمكىندىكتەر قاعيداتتارىنا نەگىزدەلگەن ساياساتى دايەكتى تۇردە جۇزەگە اسىرىلىپ كەلە جاتقانىن اتاپ ءوتتى:

«قازاقستان ينكليۋزيۆتى قوعامدى دامىتۋدا. وندا ءاربىر ازامات – فيزيكالىق نەمەسە وزگە دە شەكتەۋلەرىنە قاراماستان – ەل ومىرىنە بەلسەنە قاتىسۋعا تەڭ قۇقىلى. سايلاۋ پروتسەسىنىڭ قولجەتىمدىلىگىن قامتاماسىز ەتۋ – بۇل تەك تەحنيكالىق جاعدايلاردى جاساۋ ماسەلەسى ەمەس، مۇگەدەكتىگى بار ادامداردىڭ ازاماتتىق ۇستانىمىنا قۇرمەت كورسەتۋدىڭ، ولاردىڭ داۋىس بەرۋ جانە ەل بولاشاعىنا ىقپال ەتۋ قۇقىقتارىن تانۋدىڭ ايقىن كورىنىسى», – دەپ اتاپ ءوتتى سۆەتلانا جاقىپوۆا.

مەملەكەت باسشىسىنىڭ باستاماسىمەن 2025–2030 جىلدارعا ارنالعان ينكليۋزيۆتى ساياسات تۇجىرىمداماسى بەكىتىلدى. اتالعان قۇجات مۇگەدەكتىگى بار ادامداردى قوعامدىق-ساياسي ومىرگە بەلسەندى تارتۋعا جانە ولاردىڭ سايلاۋ قۇقىقتارىن جۇزەگە اسىرۋىنا قاجەتتى جاعدايلار جاساۋعا باعىتتالعان كەشەندى شارالاردى كوزدەيدى.

تۇجىرىمداما اياسىندا مۇگەدەكتىگى بار جانداردىڭ قاجەتتىلىكتەرىن ەسكەرە وتىرىپ، سايلاۋ ۇيىمداستىرۋ تاسىلدەرىن جەتىلدىرۋگە باعىتتالعان ءىس-شارالار قاراستىرىلعان. اتاپ ايتقاندا: كورۋ قابىلەتى بۇزىلعان سايلاۋشىلارعا ارنالعان بيۋللەتەندەرگە ترافارەت دايىنداۋ; سايلاۋ كوميسسيالارىنىڭ قىزمەتكەرلەرىنە ارنالعان قولجەتىمدى وقىتۋ ماتەريالدارىن ازىرلەۋ.

Abai.kz