.png)
ءاربىر بالانىڭ ءومىرىن ساقتاپ قالۋ ءۇشىن بىرىگىپ ارەكەت ەتۋ كەرەكپىز!
جاسىرارى جوق، بۇگىندگىدەي جاھاندانۋ پروتسەستەرىنەن تۋىنداعان اقپاراتتار لەگىنىڭ ەسەلەپ وسۋىنە بايلانىستى، ەلىمىزدە كامەلەتكە تولماعاندار اراسىنداعى سۋيتسيد پروبلەماسى وتكىر دە وزەكتى ماسەلەگە اينالىپ وتىر.
بۇل تەرمين بۇگىندە - جاسوسپىرىمدەر اراسىندا اۋتودەسترۋكتيۆتى مىنەز-قۇلىقتىن الدىن-الۋ ماسەلەلەرى دەپ اتالادى. مەملەكەت تاراپىنان جاسوسپىرىمدەر اراسىندا اۋتودەسترۋكتيۆتى مىنەز-قۇلىقتىن الدىن-الۋ بويىنشا بىرقاتار شارالار قولعا الىنعان.
دەسە دە، قازاقستاننىڭ بالا قۇقىقتارى جونىندەگى ۋاكىل دينارا زاكيەۆا: «مۇنداي قاسىرەتتى وقيعالارعا سەبەپ بولاتىن نەگىزگى ماسەلەلەردىڭ قاتارىنا: جالعىزدىقتى، اتا-انالارىمەن، تۋىستارىمەن، قۇرداستارىمەن قارىم-قاتىناستىڭ كۇردەلىلىگىن، بۋللينگتى، قورقىتىپ-ۇركىتۋدى جانە الەۋمەتتىك جەلىنىڭ اۋقىمدى اقپاراتتار لەگىن جاتقىزامىز»، – دەيدى.
ءبىز وسى ماسەلە جونىندە مامان پىكىرىن ءبىلۋ ءۇشىن مەكتەپ پسيحولوگى جاميليا حودجاەۆا حانىمعا حابارلاستىق...
جاميليا حودجاەۆا، مەكتەپ پسيحولوگى:
– قازىرگى قوعامدا بالالار مەن جاسوسپىرىمدەر اراسىنداعى اۋتودەسترۋكتيۆتى مىنەز-قۇلىق ماسەلەسى الاڭداتارلىق دەڭگەيگە جەتىپ وتىر. بۇل قۇبىلىستىڭ ارتىندا كوبىنە جالعىزدىق سەزىمى، تۇسىنبەۋشىلىك، اتا-انامەن نەمەسە قاتارلاستارىمەن قارىم-قاتىناستىڭ بۇزىلۋى سياقتى پسيحولوگيالىق جانە الەۋمەتتىك سەبەپتەر جاتادى.
ءجاسوسپىرىم كەزەڭ – تۇلعانىڭ ءوزىن ىزدەۋ، ءوزىن-ءوزى تانۋ كەزەڭى. وسى ۋاقىتتا كەز كەلگەن ءسوز، قىلىق نەمەسە نازارسىزدىق بالا پسيحيكاسىنا اۋىر اسەر ەتۋى مۇمكىن. سول سەبەپتى مەكتەپ پسيحولوگتارى، مۇعالىمدەر جانە اتا-انالار بالانىڭ ىشكى دۇنيەسىن تۇسىنۋگە تىرىسىپ، وعان سەنىم مەن قولداۋ كورسەتۋى قاجەت.
قايعىلى جاعدايدىڭ الدىن الۋ شارالارىنا مىنالار جاتادى:
- وقۋشىلاردىڭ ەموتسيونالدىق جاعدايىن تۇراقتى باقىلاۋ;
- مەكتەپتە پسيحولوگيالىق ترەنينگتەر وتكىزۋ;
- «سەنىم تەلەفونى» مەن «سەنىم جاشىگىن» ۇيىمداستىرۋ;
- ءار بالامەن جەكە اڭگىمە جۇرگىزۋ جانە وتباسى مەن مەكتەپتىڭ بىرلەسكەن ارەكەتى.
بالاعا ماحاببات پەن قامقورلىق كورسەتۋ – ەڭ ءتيىمدى پروفيلاكتيكا. ەگەر بالا ءوزىن قاجەت ەكەنىن سەزىنسە، قيىندىقتى جەڭۋگە كۇشى دە ارتادى. ءسۋيتسيدتىڭ الدىن الۋ – تەك پسيحولوگتىڭ نەمەسە مۇعالىمنىڭ عانا ەمەس، بۇكىل قوعامنىڭ مىندەتى. ءاربىر بالانىڭ ءومىرى — باعا جەتپەس قازىنا، ونى ساقتاپ قالۋ ءۇشىن ءبارىمىز بىرىگىپ ارەكەت ەتۋىمىز كەرەك.
Abai.kz
