بۇگىن رەسپۋبليكا كۇنىنە وراي وبلىس اكىمى بەيبىت يساباەۆ ءوڭىردىڭ بىرقاتار تۇرعىندارىنا مەملەكەتتىك ناگرادالار تابىس ەتتى. پرەزيدەنتتىڭ جارلىعىمەن مەملەكەتتىك ناگرادالارمەن ەلىمىزدىڭ تاۋەلسىزدىگىن نىعايتۋعا، الەۋمەتتىك-ەكونوميكالىق، مادەني جانە قوعامدىق دامۋىنا ەلەۋلى ۇلەس قوسقان 35 ەڭبەككەر ازامات ماراپاتتالدى. سالتاناتتى شارا تالدىقورعانداعى ب. ريموۆا اتىنداعى دراما تەاترىندا ءوتتى، - دەپ حابارلايدى جەتىسۋ وبلىسى اكىمىنىڭ باسپاسوز قىزمەتى.

كوپشىلىكتى مەرەكەمەن قۇتتىقتاعان ءوڭىر باسشىسى 35 جىل بۇرىن قابىلدانىپ، ەلدىڭ تاۋەلسىزدىككە جەتۋىنىڭ كونستيتۋتسيالىق جانە ساياسي نەگىزىن قالاعان مەملەكەتتىك ەگەمەندىك تۋرالى دەكلاراتسيانىڭ رولىنە توقتالدى. سونداي-اق وسى قۇجاتتىڭ قازىرگى دامۋ كەزەڭىندەگى تاريحي ماڭىزدىلىعىن دا اتاپ ءوتتى. سونداي-اق ول ايماقتىڭ سوڭعى ءۇش جىلداعى نەگىزگى جەتىستىكتەرىنە ەرەكشە نازار اۋدارىپ، وعان قول جەتكىزۋدە ەل تاۋەلسىزدىگى، حالىقتىڭ بىرلىگى مەن ءاربىر ازاماتتىڭ ەڭبەگى بار ەكەنىن ايتتى.

- سىزدەردى رەسپۋبليكا كۇنىمەن جانە مەملەكەتتىك ەگەمەندىك تۋرالى دەكلاراتسيانىڭ قابىلدانعانىنا 35 جىل تولۋىمەن شىن جۇرەكتەن قۇتتىقتايمىن! مەملەكەت باسشىسى قاسىم-جومارت توقاەۆ اتاپ وتكەندەي، «بۇل قۇجات – ءبىزدىڭ مەملەكەتتىك ەگەمەندىگىمىزدىڭ ىرگەتاسى، ەلدىگىمىزدىڭ باستاۋى». سوندىقتان ونىڭ ەلىمىزدىڭ مەملەكەتتىك دەربەستىگىن ايقىنداۋداعى ماڭىزى زور. تاۋەلسىزدىكتىڭ باستاۋى بولعان بۇل قۇجاتتا العاش رەت حالىقتىڭ وزىندىك مادەنيەتى مەن ءداستۇرىن نىعايتۋعا نازار اۋدارىلىپ، بىرلىك پەن كەلىسىم دامۋدىڭ بەرىك نەگىزىنە اينالدى. بۇگىنگى تاڭدا الدىمىزدا بەيبىتشىلىككە، ءوزارا تۇسىنىستىك پەن ىنتىماقتاستىققا سۇيەنە وتىرىپ، قول جەتكىزگەن جەتىستىكتەردى ساقتاۋ مەن ودان ءارى ەسەلەۋ مىندەتى تۇر. قاشاندا وتانىمىز قازاقستاننىڭ، تۋعان ولكەمىز جەتىسۋدىڭ ەڭسەسى بيىك، مەرەيى ۇستەم بولسىن، - دەگەن ب.يساباەۆ بۇدان ءارى ماراپاتتاۋ راسىمىنە كوشىپ، جۇمىسشى ماماندىقتار جىلىنا وراي بۇگىن استانادا جەرلەسىمىز «تالدىقورعان جىلۋ سەرۆيس» مەكەمەسىنىڭ سلەسارى مارات جولداسبايۇلى مەرگەنباەۆ پرەزيدەنتىمىزدىڭ قولىنان مەملەكەتتىك ناگرادا العانىن اتاپ ءوتتى.

جالپى وبلىستىڭ 35 تۇرعىنى مەملەكەتتىك ناگرادامەن ماراپاتتالدى. سالتاناتتى ءىس-شارا اياسىندا «قۇرمەت»، «پاراسات»، III دارەجەلى «ەڭبەك داڭقى» وردەندەرىمەن، «ەرەن ەڭبەگى ءۇشىن»، «شاپاعات» مەدالدارىمەن ونەركاسىپ، اۋىل شارۋاشىلىعى، كوممۋنالدىق شارۋاشىلىق، جول قۇرىلىسى، ءبىلىم بەرۋ، دەنساۋلىق ساقتاۋ، مادەنيەت، الەۋمەتتىك قورعاۋ، سونداي-اق كاسىپكەرلىك سالالارىندا ەڭبەك ەتەتىن وبلىس تۇرعىندارى ماراپاتتالدى. ولاردىڭ قاتارىندا تالدىقورعان قالاسى اكىمىنىڭ مۇگەدەكتىگى بار ادامدار ماسەلەلەرى جونىندەگى شتاتتان تىس كەڭەسشىسى ۆاديم درۋزين، الاكول اۋدانىنىڭ «قالقامان» شق باسشىسى بولاتبەك قاپسالاموۆ، «سارقان جىلۋ» مكك جۇرگىزۋشىسى قاناپيا تۇقىمبەكوۆ، كەربۇلاق اۋدانىنىڭ «قىزىلجار» وندىرىستىك كووپەراتيۆىنىڭ باسشىسى ايدىن نۇرتازين، «تەكەلى تاۋ-كەن وڭدەۋ كەشەنى» جشس ەلەكترومونتەرى الەكساندر ۆينوكۋروۆ، «تامشىبۇلاق» قوعامدىق بىرلەستىگىنىڭ باسشىسى جانات تولەمىسوۆا، «الاكول جولدارى» جشس ارنايى تەحنيكا جۇرگىزۋشىسى سەرگەي بولدىرەۆ، ەسكەلدى اۋدانىنىڭ «ۆاحيتوۆ» شق باسشىسى رۋستام ۆاحيتوۆ، اقسۋ اۋدانى ە. سيقىموۆ اتىنداعى مەكتەپ جانىنداعى ينتەرناتى بار ورتا مەكتەپ مۇعالىمى ايناگۇل جيەنباەۆا، سارقان اۋدانى «تاستۇما» شق باسشىسى كەنجەتاي تازابەكوۆا، تالدىقورعان قالاسى مۋزىكالىق كوللەدجىنىڭ وقىتۋشىسى گۇلزيفا راحىمحانوۆا جانە باسقا دا ازاماتتار بار.

ماراپاتتالۋشىلار مەرەكەگە وراي پىكىر ءبىلدىرىپ، جەرلەستەرىنە تىلەكتەرىن جەتكىزدى. سولاردىڭ ءبىرى «سارقان جىلۋ» مكك جۇرگىزۋشىسى قاناپيا تۇقىمبەكوۆ:

- ءبىزدىڭ كاسىپورىن سارقان قالاسىنا جىلۋ بەرۋمەن اينالىسادى. بۇگىن رەسپۋبليكا كۇنىنە ارنالعان سالتاناتتى جينالىسقا قاتىستىم. ماعان ءىىى دارەجەلى «ەڭبەك داڭقى» وردەنى بەرىلدى. بۇل - ۇلكەن قۇرمەت ءارى جاۋاپكەرشىلىك. مەملەكەت باسشىسىنا ەڭبەك ادامدارىنا قامقورلىق جاساعانى ءۇشىن العىسىمدى بىلدىرەمىن، - دەدى ول.

بۇل پىكىرگە ءىىى دارەجەلى «ەڭبەك داڭقى» وردەنىمەن ماراپاتتالعان تەكەلى قالاسىنىڭ تۇرعىنى دا قوسىلدى:

- تەكەلى تاۋ-كەن وڭدەۋ كەشەنىندە 13 جىلدان بەرى جۇمىس ىستەپ كەلەمىن. ەڭبەك جولىمدى ەلەكتريك بولىپ باستاپ، كەزەكشى ەلەكترومونتەرگە دەيىن كوتەرىلدىم. جۇمىس وڭاي ەمەس، ارتىلار مىندەت وتە جاۋاپتى. بىراق قازىر كوپ پروتسەستەر اۆتوماتتاندىرىلىپ جاتىر. ەلىمىزدىڭ يگىلىگى ءۇشىن بۇدان بىلاي دا جۇمىس ىستەي بەرەمىن. بۇگىنگى ماراپات مەن ءۇشىن جاعىمدى توسىنسىي بولدى، - دەيدى الەكساندر ۆينوكۋروۆ.

- ماعان بەرىلگەن «شاپاعات» مەدالى - كەدەرگىسىز ورتا قۇرۋ، مۇگەدەكتىگى بار ادامدارعا نىساندارعا ەركىن كىرىپ-شىعۋىنا جاعداي جاسالۋ ءۇشىن جۇمىس ىستەيتىن بارلىق ارىپتەستەرىمنىڭ، تۇتاس كوماندامىزدىڭ ورتاق ەڭبەگى. بۇل باعىتتا وڭىردە كوپ ءىس اتقارىلدى. ونىڭ ىشىندە سپورتشىلاردى قولداۋ بويىنشا دا سولاي دەۋگە بولادى. مىسالى، تالدىقورعان پاراسپورتسمەندەرى جوعارى سپورتتىق ناتيجەلەرگە قول جەتكىزەتىن ءتۇرلى جارىستارعا قاتىسا الادى. ارينە، الدا ءالى تالاي جۇمىس بار، ال بۇگىنگى ماراپات مەن ءۇشىن ۇلكەن موتيۆاتسيا بولدى. جەرلەستەرىمدى رەسپۋبليكا كۇنىمەن قۇتتىقتاپ، بارلىق باستامالارىنا ساتتىلىك تىلەيمىن، - دەدى تالدىقورعان قالاسى اكىمىنىڭ مۇگەدەكتىگى بار ادامدار ماسەلەلەرى جونىندەگى شتاتتان تىس كەڭەسشىسى، «Elstar.kz» قوعامدىق بىرلەستىگىنىڭ باسشىسى، وڭىردەگى الەۋمەتتىك نىسانداردىڭ قولجەتىمدىلىگى جونىندەگى مونيتورينگتىك توپتىڭ وكىلى ۆاديم درۋزين.

- كاسىپكەرلىكتە، اتاپ ايتقاندا، كوكسۋ اۋدانىنىڭ ساۋدا جانە قوعامدىق تاماقتانۋ سالاسىندا 30 جىلدان بەرى جۇمىس ىستەپ كەلەمىن. مەن زەينەتكەرلىك دەمالىسقا شىقسام دا، جۇبايىممەن بىرگە وتباسىلىق بيزنەستى دامىتۋعا بار كۇش-جىگەرىمدى جۇمساۋدامىن. قازىر 40-قا جۋىق ادامدى جۇمىسپەن قامتىپ وتىرمىز. پرەزيدەنتتىڭ جارلىعىمەن ماعان رەسپۋبليكا كۇنىنە وراي «شاپاعات» مەدالىن بەردى. ءوڭىر ەكونوميكاسىنىڭ دامۋىنا قوسقان ۇلەسىمدى جوعارى ناگراداعا لايىق دەپ بىلگەندەرىنە قۋانىشتىمىن، - دەدى كوكسۋ اۋدانىنان كەلگەن جەكە كاسىپكەر قاتيرا كۇزباەۆا.

سالتاناتتى شارا جەتىسۋ وبلىسىنىڭ شىعارماشىلىق ۇجىمدارى مەن ارتىستەرىنىڭ قاتىسقان ۇلكەن مەرەكەلىك كونتسەرتپەن جالعاستى.

Abai.kz