«اۋىل اماناتى» جوباسى اۋىل تۇرعىندارىنىڭ تابىسىن ارتتىرۋعا، كاسىپكەرلىكتى دامىتۋعا جانە اۋىلدىق اۋماقتاردا جاڭا جۇمىس ورىندارىن قۇرۋعا مۇمكىندىك بەرىپ وتىر. وسى باعدارلاما اياسىندا ۇلان اۋدانىنىڭ توعاناس اۋىلىندا جاڭا تۋريستىك دەمالىس ايماعى سالىنۋدا.

(سۋرەت:https://www.gov.kz/)

جوبانىڭ قاتىسۋشىسى، جەرگىلىكتى كاسىپكەر مەرۋەرت باۋىرجانقىزىنىڭ ايتۋىنشا، بۇگىندە دەمالىس ۇيلەرىنىڭ قۇرىلىسى اياقتالۋ ساتىسىندا. بارلىق قۇرىلىس جۇمىستارى بەلگىلەنگەن مەرزىمدە جۇرگىزىلىپ جاتىر.

«بۇل جوبا مەن ءۇشىن ۇلكەن مۇمكىندىك بولدى. ءوز اۋىلىمدا تۋريزم سالاسىن دامىتۋدى ارماندادىم. قازىرگى تاڭدا دەمالىس ۇيلەرىنىڭ قۇرىلىسى سوڭعى كەزەڭىندە. الداعى ۋاقىتتا بۇل جەرگە جىل ون ەكى اي بويى كەلۋشىلەرگە قىزمەت كورسەتەتىن زاماناۋي دەمالىس ايماعى اشىلادى»، – دەيدى كاسىپكەر.

جاڭا دەمالىس ايماعى تابيعاتى اسەم وڭىردە ورنالاسقان. مۇندا دەمالۋشىلار ءۇشىن بارلىق قولايلى جاعدايلار جاسالماق: جايلى قوناق ۇيلەر مەن جىلىجاي ۇلگىسىندەگى دەمالىس ۇيلەرى، – بالالارعا ارنالعان ويىن الاڭى، وتباسىلىق دەمالىس ايماقتارى، تابيعي تازا تاعامدار ۇسىناتىن اسحانا مەن جازعى شاتىرلى ورىندار بار.

دەمالىس ورنى تەك جاز مەزگىلىندە عانا ەمەس، جىلدىڭ ءتورت مەزگىلىندە دە جۇمىس ىستەيتىن بولادى. قىستا قوناقتار اتقا ءمىنۋ جانە تابيعات اياسىندا دەمالۋ، كوكتەم مەن كۇزدە ەكوتۋريزم باعىتىنداعى شارالار ۇيىمداستىرىلماق.

بۇل باستاما اۋىل تۇرعىندارى ءۇشىن جاڭا جۇمىس ورىندارىن اشۋعا، سونداي-اق اۋىل ەكونوميكاسىن دامىتۋعا جول اشادى.

«اۋىل اماناتى» جوباسى – اۋىل كاسىپكەرلەرى ءۇشىن ناقتى مۇمكىندىك. وسىنداي جوبالار ارقىلى اۋىلدا ءومىر ساپاسىن ارتتىرىپ، تۋريزم مەن شاعىن بيزنەستى دامىتامىز»، – دەيدى مەرۋەرت باۋىرجانقىزى.

جاڭا تۋريستىك نىساننىڭ اشىلۋى توعاناس اۋىلىنىڭ دامۋىنا تىڭ سەرپىن بەرىپ، ءوڭىردىڭ ىشكى تۋريزم الەۋەتىن ارتتىرۋعا ۇلەس قوساتىنى ءسوزسىز.

Abai.kz