ورىستىڭ ۇلى اكتريساسى ف.رانەۆسكايا: «مەن «ويناۋ» دەگەن ءسوزدى مويىندامايمىن. كارتا ويناۋعا بولادى، شاشكا وينا، بايگە وينا. ال ساحنادا ءومىر ءسۇرۋ كەرەك»، - دەيدى.

ال استانا قالاسى اكىمدىگىنىڭ مۋزىكالىق جاس كورەرمەندەر تەاترىنىڭ اكتريساسى گۇلدانا ابدىسادىق ساحنادا ءومىر سۇرە الاتىن ونەر يەسى. تەاتر قويىلىمدارىنىڭ كوپشىلىگىندە باستى كەيىپكەرلەردى ويناپ، كورەرمەن جۇرەگىنە جول تابا بىلگەن ساحنا مامانى. ۇنەمى ىزدەنىس ۇستىندە جۇرەتىن اكتريسانىڭ ونەردەگى جولى 2016 جىلى باستالعان بولاتىن. ويتكەنى، سول جىلى اقتوبە قالاسىندا حالىقارالىق «بالاۋسا» تەاترلار فەستيۆالى ۇيىمداستىرىلدى. اتالمىش ونەر دوداسى گۇلدانانىڭ جۇلدىزىڭ جاققان سايىس بولدى. گۇلدانا ءوزىنىڭ توپتاس دوستارىمەن ش.ايتماتوۆتىڭ «ءجاميلا» دراماسىمەن باق سىنايدى. باستى رولدە گۇلدانا ابدىسادىق.

قازاق تەاترىندا تۇڭعىش ءجاميلا بەينەسىن كسرو حالىق ءارتيسى ف.ءشارىپوۆا كەسكىندەگەن بولاتىن. ءجاميلا - فاريدا ءشارىپوۆانىڭ باعىن اشىپ، كەسەكتى بەينەلەرگە جول اشسا، گۇلداناعا دا، ءجاميلا ساتتىلىك الىپ كەلدى. اتالعان فەستيۆالدە ءجاميلا ءرولى ءۇشىن گۇلدانا ابدىسادىق «ەڭ ۇزدىك ايەل بەينەسى» نوميناتسياسىنا يە بولعان ەدى. ماراپاتتاۋ ساتىندە، قازىلار القاسىنىڭ توراعاسى، قر ەڭبەك سىڭىرگەن قايراتكەرى، رەجيسسەر اسحات ماەميروۆ جاس اكتريسا گۇلداناعا اق باتاسىن بەردى. سول اق باتا گۇلدانانى «تەاتر» اتتى سيقىرلى الەمنىڭ ەسىگىنە جول اشتى.

گۇلدانا بۇگىنگى تاڭدا استانا قالاسى اكىمدىگىنىڭ مۋزىكالىق جاس كورەرمەندەر تەاترىنىڭ تالانتتى اكتريساسى.

د.يسابەكوۆتىڭ «گاۋحارتاس» مۋزىكالىق دراماسىن تەاتر سۇيەر قاۋىم جاقسى بىلەدى. اتالمىش قويىلىمدا گۇلدانا - سالتانات بەينەسىن نۇسقالايدى. گۇلدانانىڭ سالتاناتى ەركەلىگى وزىنە جاراسقان، ومىرگە ءماز، قانداي جاعداي بولماسىن وپتيميزممەن قارسى الاتىن كەيىپكەر. گۇلدانا - سالتانات ساحنادا كەلىن وبرازىمەن ءومىر سۇرەدى. گۇلدانا - سالتانات كىمگە قالاي، قاي داۋىستا سويلەۋ كەرەك ەكەنىن بىلەدى. گۇلدانا - سالتانات ەنەسىمەن باسقا كەيىپتە، قايىن ىنىسىمەن باسقا، كۇيەۋى تاستانمەن بولەك، ال قايىن اتاسىمەن مۇلدەم وزگە قارىم-قاتىناس جاسايدى. ەنەسىنە ەنەگە دەگەن قۇرمەت، ايەل رەتىندە سىيلاسۋى گۇلدانا - سالتاناتقا ۇيلەسىمدى جاراسادى. گۇلدانا - سالتاناتتىڭ قايىن ءىنىسى قايىركەنگە دەگەن وزىنشە ءازىلى، سىرلاسۋى سالتانات بولمىسىن مۇلدەم باسقا ارناعا بۇرعانداي. ويتكەنى، سالتاناتتىڭ قايىن ىنىسىنە دەگەن قارىم-قاتىناسىنان قازاق جەڭگەلەرىنە ءتان ءازىل، ەركەلىك كورىنىپ ەرەكشەلەنىپ تۇرادى. ال گۇلدانا  -سالتانات كۇيەۋى تاستانمەن بايلانىستى جاقسارتقىسى كەلەدى. گۇلدانا - سالتانات تاستانعا ارقا سۇيەپ، كۇيەۋىنەن جىلۋلىق ىزدەيدى. ال سالتاناتتىڭ قايىن اتاسىنىڭ الدىنداعى ۇياڭدىعى قازاق كەلىندەرىنىڭ بويىنداعى جاقسى قاسيەت. اتالعاندار گۇلدانا ويىنىنداعى سالتاناتتىڭ وزگەشەلىگى.

گۇلدانا ابدىسادىقتىڭ  جۇلدىزدى رولدەرىنىڭ ءبىرى - م.وماروۆانىڭ «CHANEL №5» دەرەكتى دراماسىنداعى ناتاليا ساتس ءرولى بولدى. گۇلدانا كەيىپتەۋىندەگى ناتاليا ساتس - بويىندا اقسۇيەكتىك باسىم، قانداي جاعداي بولماسىن شىدامدىلىق تانىتاتىن جىگەرلى جان. گۇلدانا - ناتاليانىڭ كيىم-كيىسى، ءجۇرىس-تۇرىسى ءبارى وزگەشە. باسقالارعا ۇقسامايدى. وسى ارقىلى گۇلدانا داڭقتى رەجيسسەردىڭ بولمىسىن اشادى. اكتريسانىڭ ەكى ءرولى دە، ەرەكشە. ەكەۋى ءبىر-بىرىنە ۇقسامايدى.

الەمگە تانىمال اكتريسا مەريلين مونرو:

«ساحنادا دا، ومىردە دە ەڭ قيىن ءرول – ءوزىڭ بولۋ»، - دەيدى. شىنىمەن دە، اكتەرلىك ماماندىق ءۇشىن ەڭ قيىنى وسى. ال گۇلدانا ابدىسادىق وسى قيىندىقتى تەاتر الاڭىندا جەڭە ءبىلدى. ونى اكتريسانىڭ ساحناداعى كەيىپكەرلەرىنەن، اكتەرلىك شەبەرلىگىنەن بايقايمىز. گۇلدەي نازىك، وتتاي  اسەرلى گۇلدانا ابدىسادىق سۇيىكتى كورەرمەندەرىن ءالى تالاي بەينەلەرىمەن قۋانتپاق.

باحتيار تۇرسىن،

تەاترتانۋشى

Abai.kz