كاريب ايماعىن جايپاپ وتكەن "مەليسسا" داۋىلى سالدارىنان 49 ادام قازا تاپتى. تاعى ونداعان ادام حابار-وشارسىز كەتكەن. ەڭ كوپ ءولىم گايتيدە تىركەلدى. مىڭداعان ادام جارىقسىز قالدى. ەكونوميكالىق شىعىن كولەمى 52 ملرد دوللارعا جەتۋى مۇمكىن، دەپ حابارلايدى اl Jazeera باسىلىمى.

ەڭ كوپ ادام ءولىمى گايتي ەلىندە تىركەلدى – كەمىندە 30 ادام قازا تاۋىپ، 20-سى ءىز-ءتۇزسىز جوعالعان. Reuters اگەنتتىگىنىڭ حابارلاۋىنشا، يامايكادا 19 ادام، دومينيكان رەسپۋبليكاسىندا ءبىر ادام مەرت بولعان.

"مەليسسا" – اتلانتيكا تاريحىنداعى ەڭ قۋاتتى داۋىلداردىڭ ءبىرى. ول سەيسەنبى كۇنى يامايكاعا سوعىپ، 5-ساناتتاعى داۋىل دەڭگەيىنە جەتتى. جەلدىڭ ەكپىنى ساعاتىنا 295 شاقىرىمعا دەيىن كۇشەيگەن. داۋىل يامايكانىڭ باتىسىن قيراتقان سوڭ، كۋباعا جەتىپ، 3-ساناتتاعى دەڭگەيدە سوققان.

اقش-تىڭ ۇلتتىق ۋراگان ورتالىعىنىڭ دەرەگىنشە، داۋىل كەيىن باگام ارالدارىنىڭ ۇستىنەن ءوتىپ، بەرمۋد ارالدارىنا قاراي باعىت العان. قازىر ايماقتاعى مىڭداعان ادام جارىقسىز وتىر: يامايكادا ەلەكتر تۇتىنۋشىلارىنىڭ 70 پايىزىنا دەيىن جارىق وشكەن.

بۇۇ وكىلى دەننيس زۋلۋدىڭ ايتۋىنشا، اپات سالدارى بۇرىن-سوڭدى بولماعان دەڭگەيدە اۋىر. اقش مەملەكەتتىك دەپارتامەنتى يامايكا، گايتي، باگام جانە كۋباعا كومەك كورسەتۋ ءۇشىن توتەنشە جاعداي توبى جىبەرگەنىن حابارلادى.

AccuWeather كومپانياسىنىڭ ەسەبى بويىنشا، "مەليسسا" داۋىلىنىڭ الدىن الا باعالانعان ەكونوميكالىق شىعىنى 48-52 ميلليارد دوللار ارالىعىندا بولۋى مۇمكىن.

Abai.kz