قازاقستان رەسپۋبليكاسىنىڭ جاساندى ينتەللەكت جانە تسيفرلىق دامۋ مينيسترلىگى، «قازاقتەلەكوم» اق جانە Perplexity AI, Inc. كومپانياسى ءوزارا تۇسىنىستىك تۋرالى مەموراندۋمعا قول قويدى. قۇجات اياسىندا قازاقستان ازاماتتارى Perplexity Pro قىزمەتىن ءبىر جىل بويى تەگىن پايدالانا الادى.

كەلىسىم ميلليونداعان ازامات: ستۋدەنتتەر مەن ماماندار ءۇشىن  جاڭا مۇمكىندىكتەرگە جول اشادى. ولار كاسىبي دامۋ، زەرتتەۋ، ءبىلىم الۋدا زاماناۋي جاساندى ينتەللەكت قۇرالدارىن پايدالانا الادى. سونداي-اق مەموراندۋم Alem.AI نەگىزىندە ازىرلەمە(R&D) مەن عىلىمي-زەرتتەۋ جۇمىستارىن قولداۋ، قازاقستاندا داتا-ورتالىقتاردى دامىتۋ جونىندەگى بىرلەسكەن باستامالاردى جۇزەگە اسىرۋدى كوزدەيدى.

«بۇل كەلىسىم ميلليونداعان قازاقستاندىققا بۇرىن تەك شەكتەۋلى پايدالانۋشىلارعا عانا قولجەتىمدى بولعان قۋاتتى جاساندى ينتەللەكت تەحنولوگيالارىن پايدالانۋعا مۇمكىندىك بەرەدى. ءبىز ءبىلىم مەن يننوۆاتسيا ءاربىر ازاماتقا قولجەتىمدى بولاتىن تسيفرلىق ەكوجۇيەنى قالىپتاستىرىپ جاتىرمىز»، - دەدى قازاقستان رەسپۋبليكاسىنىڭ پرەمەر-ءمينيسترىنىڭ ورىنباسارى - جاساندى ينتەللەكت جانە تسيفرلىق دامۋ ءمينيسترى جاسلان ماديەۆ.

«قازاقستان الدىڭعى قاتارلى جاساندى ينتەللەكت ۇلگىلەرىن جاھاندىق بىلىممەن بىرىكتىرۋدىڭ ماڭىزىن دۇرىس باعالادى. بۇل ءاربىر ازامات ءۇشىن جي تەحنولوگيالارىن قولجەتىمدى ەتۋدىڭ تاماشا جولى. قازاقستاننىڭ جي جانە تسيفرلىق دامۋ مينيسترلىگىمەن ارىپتەستىك - جاساندى ينتەللەكتىنى بارلىق سالادا جەدەل ەنگىزۋگە مۇمكىندىك بەرەدى»، - دەدى Perplexity كومپانياسىنىڭ جاھاندىق ماسەلەلەر جونىندەگى ۆيتسە-پرەزيدەنتى جانە تەحنيكالىق ديرەكتورىنىڭ ورىنباسارى دجەرري ما.

«Perplexity AI كومپانياسىمەن ىنتىماقتاستىق قازاقستان ءۇشىن جاڭا مۇمكىندىكتەرگە جول اشادى. ءبىز جاساندى ينتەللەكت تەحنولوگيالارىنىڭ تەك ماماندارعا عانا ەمەس، ستۋدەنتتەرگە، مەكتەپ وقۋشىلارىنا، كاسىپكەرلەرگە جانە باسقا ازاماتتارعا دا قولجەتىمدى بولۋىن قالايمىز.«قازاقتەلەكوم» اق وسى ەكوجۇيەنى دامىتۋعا بەلسەندى قاتىسىپ، زاماناۋي تسيفرلىق شەشىمدەردى ادامداردىڭ كۇندەلىكتى ءومىرىنىڭ ءبىر بولىگىنە اينالدىرۋ جوبالارىن قولدايتىن بولادى»، - دەدى «قازاقتەلەكوم» اق باسقارما توراعاسى باعدات مۋسين.

كەلىسىمنىڭ ينيتسياتورى جانە ۇيلەستىرۋشىسى - Astana IT University ەكەنىن ايتا كەتۋ كەرەك.

Perplexity AI كومپانياسىمەن ارىپتەستىك ۋنيۆەرسيتەتتىڭ حالىقارالىق ىنتىماقتاستىقتى دامىتۋ، سونداي-اق ءبىلىم مەن عىلىمعا جاساندى ينتەللەكت تەحنولوگيالارىن ەنگىزۋ باعىتىنداعى ۇمتىلىسىن كورسەتەدى. الەمدەگى يننوۆاتسيالىق كومپانيالاردىڭ بىرىمەن ارىپتەستىك گەنەراتيۆتى جاساندى ينتەللەكت قۇرالدارىن وقۋ پروتسەسىنە ەنگىزۋگە، ماشينالىق وقىتۋ سالاسىنداعى زەرتتەۋلەردى دامىتۋعا جانە حالىقارالىق اكادەميالىق بايلانىستاردى نىعايتۋعا مۇمكىندىك بەرەدى. بۇل ستۋدەنتتەر مەن وقىتۋشىلار ءۇشىن جاڭا تسيفرلىق قۇزىرەتتەردى قالىپتاستىرۋعا جانە جاھاندىق جي ەكوجۇيەسىنە قاتىسۋعا جول اشادى.

مەموراندۋمعا قول قويۋ قازاقستاننىڭ «ءبىلىمدى ۇلتتى» قالىپتاستىرۋ جولىنداعى تاعى ءبىر ماڭىزدى قادامى، وعان سايكەس جاساندى ينتەللەكت ءبىلىم بەرۋ، عىلىم جانە ادامي كاپيتالدى دامىتۋ پروتسەسىنە ۇلەس قوسادى.

Perplexity تۋرالى

Perplexity - جاساندى ينتەللەكت نەگىزىندەگى ينتەللەكتۋالدى جۇيە، ول سەنىمدى دەرەككوزدەرگە سۇيەنە وتىرىپ، سۇراقتارعا ءدال جاۋاپ بەرەدى جانە دەرەككوزدەرگە سىلتەمەلەردى ۇسىنادى. سونىمەن قاتار، ول تەرەڭ زەرتتەۋلەر جۇرگىزۋگە جانە اقپاراتتى ءتيىمدى ىزدەۋگە كومەكتەسەدى. 2022 جىلى قۇرىلعان كومپانيانىڭ ماقساتى - ءداستۇرلى ىزدەۋ جۇيەلەرىنىڭ مۇمكىندىكتەرىن جاساندى ينتەللەكت ينتەرفەيستەرىمەن بىرىكتىرە وتىرىپ، اقپارات ىزدەۋدىڭ ساپاسىن ارتتىرۋ. قازىرگى تاڭدا Perplexity الەم بويىنشا اپتاسىنا 150 ميلليوننان استام سۇراققا جاۋاپ بەرەدى. قوسىمشا ءموبيلدى دۇكەندەردە جانە https://www.perplexity.com سايتىندا قولجەتىمدى.

Abai.kz